İQTİSADİYYAT
“Caspian Energy Forum 2017”nin Azərbaycanda İKT sektorunun inkişafına həsr olunmuş xüsusi sessiyası keçirilib
Bakı, 14 dekabr, AZƏRTAC
Dekabrın 14-də Bakıda Azərbaycan Respublikasının rabitə və yüksək texnologiyalar nazirinin müavini Elmir Vəlizadənin rəhbərliyi ilə biznes-forum, “Caspian Energy Forum 2017”nin Azərbaycanda İKT sektorunun inkişafına həsr olunmuş xüsusi sessiyası təşkil olunub.
AZƏRTAC xəbər verir ki, biznes-forum, “Caspian Energy Forum 2017”nin xüsusi sessiyası Azərbaycanın ümummilli lideri Heydər Əliyevin xatirəsinə ehtiram əlaməti olaraq bir dəqiqəlik sükutla açılıb.
Biznes-forumda çıxış edən Azərbaycan Respublikasının rabitə və yüksək texnologiyalar nazirinin müavini Elmir Vəlizadə Azərbaycan Respublikası Rabitə və Yüksək Texnologiyalar Nazirliyinin 2016-cı il ərzindəki fəaliyyəti barədə məlumat verib. Görüş zamanı özəl sektorun dövlət tərəfindən həyata keçirilən İKT layihələrdə iştirak imkanları, həmçinin “Caspian European Club” (“Caspian Business Club”) şirkətlərini maraqlandıran məsələlər müzakirə olunub.
E.Vəlizadə genişzolaqlı internet, mobil və stasionar rabitə, rəqəmsal televiziya, sputnik xidməti sahələrinin, xarici banklar və beynəlxalq maliyyə institutları ilə birgə İKT layihələrinin həyata keçirilməsi üzrə əməkdaşlığın inkişafına toxunub. O həmçinin ixracyönümlü məhsulların istehsalına istiqamətlənmiş layihələrin inkişaf perspektivlərindən söhbət açıb. E.Vəlizadə, o cümlədən innovasiya inkişafının əhəmiyyətini vurğulayıb. Bununla əlaqədar startapların inkişafı və yeni texnologiyanın tətbiqini xüsusilə qeyd edib.
Biznes-forumda “Caspian European Club”un (“Caspian Business Club”) yarandığı gündən mövcud olan sahə klublarının, xüsusilə də Cabir Cümşüdovun rəhbərlik etdiyi “Caspian European İT Club”un və Səbinə Məmmədlinin rəhbərlik etdiyi “Caspian European Telecommunication Club”un fəal rolu vurğulanıb.
Rabitə və Yüksək Texnologiyalar Nazirliyinin rəhbərliyi ilə baş tutan konstruktiv dialoq zamanı şirkətlərin təklifləri dinlənilib, biznesmenlərin üzləşdikləri problemlər müzakirə olunub və onların həlli yolları nəzərdən keçirilib.
“Caspian European Club”un (“Caspian Business Club”) sədrinin birinci müavini və baş icraçı direktoru Telman Əliyev bildirib ki, Azərbaycanda biznes-hökumət dialoqunun əsası ümummilli lider Heydər Əliyev tərəfindən qoyulub. Sahibkarlarla 2002-ci il aprelin 25-də keçirilmiş tarixi görüş iqtisadiyyatın bütün sahələrinin inkişafına təkan verdi. Məhz buna görə Azərbaycan Prezidenti, “Caspian European Club”un (“Caspian Business Club”) sədri İlham Əliyev klub təsis etməklə qarşıya dövlətlə biznes arasında daimi dialoqun yaradılması, “Caspian European Club”un (“Caspian Business Club”) keçirdiyi görüşlər çərçivəsində problemlərin operativ həll edilməsi, həmçinin sahibkarların problem və təkliflərinin nazirlik və dövlət qurumları rəhbərləri tərəfindən öyrənilməsi məqsədini qoymuşdu. “Caspian European Club”un (“Caspian Business Club”) mövcud olduğu 15 il ərzində tərəfimizdən Xəzər-Qara dəniz və Baltik regionunun 17 ölkəsinin dövlət və hökumət rəhbərləri, nazirləri ilə görüşlər təşkil edilmişdi, - deyə Telman Əliyev qeyd edib.
Telman Əliyev, həmçinin bildirib ki, “Caspian European Club” (“Caspian Business Club”) 2002-ci ilin iyununda Xəzər-Qara dəniz regionunda fəaliyyət göstərən nəhəng neft-qaz şirkətlərinin dəstəyi ilə yaradılıb. “Caspian European Club”un (“Caspian Business Club”) sədri Azərbaycan Respublikasının Prezidenti İlham Əliyevdir. Telman Əliyevin sözlərinə görə, yarandığı ilk gündən “Caspian European Club” (“Caspian Business Club”) neft sahəsindən əldə olunan gəlirlərin qeyri-neft sektorunun inkişafına cəlb edilməsinə kömək edir. Sıralarında 5 mindən artıq şirkət və təşkilatı birləşdirən “Caspian European Club” (“Caspian Business Club”), dünyanın 50 ölkəsində fəaliyyət göstərir və dövlət qurumları ilə özəl sektor arasında dialoqa dəstək istiqamətində fəal iş aparır.
O, “Caspian European Club” (“Caspian Business Club”) və “Caspian Energy İnternational Media Group” ilə sıx əməkdaşlığa və biznesmenlərə göstərilən dəstəyə görə Elmir Vəlizadəyə minnətdarlığını bildirib.
Telman Əliyev qeyd edib ki, 2017-ci il aprelin 12-də keçiriləcək 4-cü Beynəlxalq “Caspian Energy Forum 2017” iqtisadiyyatın nəqliyyat, maliyyə, yanacaq-enerji kompleksi, İKT, aqrosənaye və başqa sahələrinə həsr olunmuş daha bir neçə sessiyadan ibarət olacaq. Xüsusi sessiyalar çərçivəsində “Caspian European Club”un (“Caspian Business Club”) üzv şirkətlərinin və ümumilikdə özəl sektorun problemləri dərindən öyrəniləcək, onlar maraqlandıqları suallara cavab almaq imkanı əldə edəcəklər.
Biznes-forumda Elmir Vəlizadəyə “Caspian European Club”un (“Caspian Business Club”) fəxri üzvlük sertifikatı təqdim olunub. Bundan əlavə, “Caspian European Club”un (“Caspian Business Club”) yeni şirkətlərinə də sertifikatlar verilib.
Biznes-forumda rəhbər və menecerlər, Azərbaycan, Qazaxıstan, Rusiya və Türkiyədən olan 120-dən artıq biznesmen, həmçinin Azərbaycanda akkreditə olunmuş diplomatik nümayəndəliklərin başçılarının və beynəlxalq təşkilatların 23 nümayəndəsi iştirak edib.