CƏMİYYƏT
Nazir müavini Caspian European Clubda sosial sahədə aparılan islahatlardan danışıb
Oktyabrın 21-də Caspian European Clubun (CEIBC) üzvləri ilə əmək və əhalinin sosial müdafiəsi nazirinin müavini İdris İsayev arasında görüş olub.
AZƏRTAC xəbər verir ki, görüşdə klubun gördüyü işlər, fəaliyyət prinsipləri barədə qısa məlumat verilib, o cümlədən dövlət və özəl qurumlar arasında işgüzar əlaqələrin inkişaf etdirilməsinin klubun əsas məqsədlərindən olduğu vurğulanıb.
Əmək və sosial müdafiə sistemində aparılan islahatlar barədə klub üzvlərini məlumatlandıran İ.İsayev qeyd edib ki, idarəçilik sisteminin, habelə əhaliyə xidmətin müasir prinsiplər əsasında təşkili məqsədi ilə informasiya və kommunikasiya texnologiyalarından istifadə olunması bu gün Əmək və Əhalinin Sosial Müdafiəsi Nazirliyinin (ƏƏSMN) əsas prioritetlərindən biridir. Bu sahədə aparılan işlər uğurlu nəticələr verir. Belə ki, “Elektron hökumət” portalının statistikasına əsasən, nazirlik tərəfindən əhaliyə göstərilən “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” və “Əmək müqaviləsi bildirişləri barədə məlumatların işçilər tərəfindən əldə edilməsi” xidmətləri ən çox istifadə olunan elektron xidmətlərdir. Bu elektron xidmətlərdən istifadə edənlərin sayının çoxluğu əmək müqaviləsi bildirişlərinin EİS-də qeydiyyatdan keçirilməsini nəzərdə tutan islahat tədbirində işəgötürənlərin və işləyən əhalinin fəal iştirakını göstərir.
Nazir müavini bildirib ki, həmin xidmətlərin tətbiqinin hüquqi əsası Azərbaycan Respublikasının Əmək Məcəlləsinə edilən dəyişikliklərdən irəli gəlib. Dəyişikliklərə əsasən, əmək müqaviləsi bildirişi - əmək müqaviləsinin bağlanılmasının, ona dəyişiklik edilməsinin və ya xitam verilməsinin ƏƏSMN-in elektron informasiya sistemində (EİS) elektron qaydada qeydiyyata alınması məqsədi ilə işəgötürən tərəfindən həmin EİS-ə daxil edilən elektron sənəddir. Əmək müqaviləsi müvafiq bildiriş formasında sistemdə qeydiyyata alındıqdan və bu barədə işəgötürənə elektron qaydada məlumat göndərildikdən sonra hüquqi qüvvəyə minir. Cari ilin 20 oktyabr tarixinə olan məlumata əsasən, “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” elektron xidməti vasitəsilə EİS-ə 1 milyon 424 min 160 əmək müqaviləsi bildirişi daxil edilib. Onların 87,4 faizi və ya 1 milyon 245 min 267 ədədi əmək müqaviləsinin bağlanması, 8,6 faizi və ya 122 min 24 ədədi əmək müqaviləsinə dəyişikliyin edilməsi, 45 faizi və ya 56 min 869 ədədi əmək müqaviləsinə xitamın verilməsi ilə bağlı əmək müqaviləsi bildirişləridir. Daxil edilmiş bildirişlərin 98,7 faizi elektron imza ilə təsdiq edilib.
İ.İsayev EİS-də qeyd olunan tarixə aktiv olan bildirişlərin sayının 1 milyon 164 min 552 ədəd təşkil etdiyini, onların 93,8 faizinin hüquqi şəxs statusunda olan işəgötürənlərlə əmək müqaviləsi bağlayaraq əmək fəaliyyətində olan işçilər üzrə olduğunu diqqətə çatdırıb. Sahibkarlıq fəaliyyəti ilə məşğul olan, fiziki şəxs statusunda olan işəgötürənlərlə əmək müqaviləsi bağlayaraq əmək fəaliyyətində olan işçilər üzrə sistemdə 72 min 481 aktiv bildiriş mövcuddur ki, bu da bütün aktiv bildirişlərin 6,2 faizini təşkil edir. Qeyd olunan tarixə 46 min 659 işəgötürən bildirişlərin EİS-ə daxil edilməsi üçün qeydiyyata düşmüşdür ki, bunun da 45,4 faiz hüquqi şəxs statusunda olan işəgötürənlər, 54,6 faiz isə sahibkarlıq fəaliyyəti ilə məşğul olan fiziki şəxs statusunda olan işəgötürənlərdir. Nazir müavini vurğulayıb ki, aparılan təhlillərə əsasən, təxminən 350 mindən artıq əmək müqaviləsi bildirişlərinin bundan sonra sistemə daxil ediləcəyi gözlənilir.
İ.İsayev yeni yaradılan bu sistemin önəmli cəhətləri barədə məlumat verərək, onun ilk növbədə əmək münasibətlərinin elektron müstəvidə şəffaflaşdırılmasına, işçilərin, eləcə də işəgötürənlərin hüquqlarının təminatına dövlət nəzarəti mexanizminin təkmilləşməsinə, işçilərin əmək və gələcək sosial təminatı üçün hüquqi əsasın yaranmasına, əmək bazarı haqqında dolğun məlumat bazasının formalaşmasına səbəb olduğunu bildirib.
CEIBC-nin baş icraçı direktoru Telman Əliyev bildirib ki, biznes- forumlar çərçivəsində iqtisadiyyatın müxtəlif sahələri üzrə şirkətlərin problemləri və təklifləri müzakirə olunur. Forumların yekununda CEIBC və dövlət qurumlarının birgə işçi qrupu tərəfindən müvafiq təkliflər hazırlanaraq baxılmaq üçün hökumətə və Milli Məclisə təqdim ediləcək.
Daha sonra nazir müavini klub üzvlərinin suallarını cavablandırıb.