REGİONLAR


Cəlilabadın və Lənkəranın ədliyyə işçiləri peşə bayramlarını yüksək əhval-ruhiyyə ilə qeyd ediblər

A+ A

Cəlilabad, Bağır Əliyev, AZƏRTAC

Noyabrın 22-də Cəlilabadda və Lənkəranda ədliyyə işçilərinin peşə bayramına həsr olunmuş silsilə tədbirlər keçirilib.

AZƏRTAC xəbər verir ki, Cəlilabad rayonunun ədliyyə işçiləri və rayon ictimaiyyətinin nümayəndələri əvvəlcə Azərbaycan xalqının ümummilli lideri Heydər Əliyevin abidəsi önünə gül dəstələri düzərək dahi rəhbərin əziz xatirəsini ehtiramla yad ediblər.

Heydər Əliyev Mərkəzində keçirilən tədbirin iştirakçıları Ulu Öndərin həyat və fəaliyyətini, Cəlilabad rayonuna səfərlərini əks etdirən eksponatlar və fotoşəkillərlə tanış olublar.

Tədbirdə çıxış edən Cəlilabad Rayon İcra Hakimiyyətinin başçısı Əziz Əzizov ədliyyə işçilərini peşə bayramı münasibətilə təbrik edib. O, Azərbaycan ədliyyəsinin şanlı tarixindən və inkişaf yolundan, ümummilli lider Heydər Əliyevin Azərbaycana rəhbərliyinin bütün dövrlərində ədliyyə sisteminə göstərdiyi diqqət və qayğıdan, Prezident İlham Əliyevin tapşırıqları ilə aparılan ədliyyə və məhkəmə islahatlarından danışıb.

Tədbirdə rayon məhkəməsinin əməkdaşlarının bir qrupuna icra hakimiyyətinin fəxri fərmanları verilib.

Cəlilabad Rayon Məhkəməsinin sədri Əliəjdər Ələkbərov ölkəmizdə məhkəmə-hüquq islahatlarının nümunəvi fəaliyyət üçün real zəmin yaratdığını qeyd edərək bildirib ki, təkcə bu ilin əvvəlindən Cəlilabad məhkəməsində 6 mindən çox hüquqi və mülki işə baxılıb.

Digər çıxış edənlər ədliyyə sistemində çalışanlara xoş arzularını çatdırıb, uğurlar diləyiblər.

X X X

Lənkəranın ədliyyə işçiləri, rayon rəhbərliyi, hüquq-mühafizə orqanlarının əməkdaşları Heydər Əliyev Xatirə Parkına gələrək Ümummilli Liderin abidəsi önünə gül düzərək, Ulu Öndərin xatirəsini ehtiramla yad ediblər.

Lənkəran Rayon Məhkəməsində və Lənkəran Ağır Cinayətlər Məhkəməsində keçirilən tədbirlərdə ölkəmizdə ədliyyə sistemində həyata keçirilən islahatlardan, qazanılan uğurlardan danışılıb, vətəndaş cəmiyyətinin inkişafında, qanunun aliliyinin, insan hüquq və azadlıqlarının qorunmasında ədliyyə işçilərinin əməyi yüksək qiymətləndirilib.

Bildirilib ki, ümummilli lider Heydər Əliyevin 2000-ci il 11 noyabr tarixli Sərəncamına əsasən, hər il noyabrın 22-si ölkəmizdə ədliyyə işçilərinin peşə bayramı günü kimi qeyd olunur. Müstəqil Azərbaycan dövlətinin ədliyyə tarixinin ən şərəfli anları 1918-ci ildə Azərbaycan Xalq Cümhuriyyətinin yaranması ilə bağlıdır. Ölkəmizdə aparılan demokratik islahatlar, insan hüquq və azadlıqlarının müdafiəsi sahəsində həyata keçirilən tədbirlər nəticəsində respublikamız BMT Təhlükəsizlik Şurasının qeyri-daimi, Avropa Şurasının isə tamhüquqlu üzvü seçilib.

Diqqətə çatdırılıb ki, Prezident İlham Əliyevin 2009-cu il 6 fevral tarixli Sərəncamı ilə təsdiq edilmiş “Azərbaycan ədliyyəsinin inkişafına dair 2009-2013-cü illər üçün Dövlət Proqramı” ölkəmizdə ədliyyə orqanlarının cəmiyyətdə rolunu daha da artırıb.

Çıxış edənlər ədliyyə işçilərini əlamətdar gün münasibətilə təbrik edib, ölkəmizdə ədliyyə sisteminin inkişafına göstərilən qayğıya görə Prezident İlham Əliyevə minnətdarlıqlarını bildirdilər.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.