CƏMİYYƏT
Cəmiyyətin hər bir üzvü narkomaniyaya qarşı mübarizədə fəal iştirak etməlidir
Prezident İlham Əliyevin 2013-cü il 24 iyun tarixli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı”nda narkomanlığa qarşı mübarizənin gücləndirilməsi, antinarkotik təbliğat, narkomanlığa düçar olmuş şəxslərin sağlam həyata qaytarılması, qanunvericiliyin təkmilləşdirilməsi və digər məsələlərlə bağlı qarşıya ciddi vəzifələr qoyulub. Bəşəriyyətin gələcəyi üçün ən dəhşətli bəla olan narkomaniyaya qarşı mübarizədə yalnız dövlətin deyil, eləcə də cəmiyyətin hər bir üzvünün fəal rol oynaması zəruridir.
AZƏRTAC xəbər verir ki, bu barədə oktyabrın 21-də Qaradağ rayonunun Lökbatan qəsəbəsindəki Heydər Əliyev Mərkəzində rayon icra hakimiyyətinin və Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının birgə təşkilatçılığı ilə keçirilən rayon müşavirəsində ətraflı söhbət açılıb.
Əvvəlcə tədbir iştirakçıları Heydər Əliyev Mərkəzində Ulu Öndərin zəngin irsi ilə yaxından tanış olublar.
Sonra məktəblilərin narkomaniyanın fəsadlarını əks etdirən əl işlərindən ibarət sərgi nümayiş etdirilib, narkomaniyanın törətdiyi bəlalardan bəhs edən videoçarx göstərilib.
Tədbirdə çıxış edən Qaradağ Rayon İcra Hakimiyyəti başçısının birinci müavini, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Qaradağ rayon komissiyasının sədri Emil Abbasov rayonda narkomaniya probleminə qarşı mübarizə tədbirlərindən danışıb. O, narkomaniyanın heç bir yaş sərhədi tanımayaraq cavanlaşmasını genefond üçün mühüm təhlükə kimi qiymətləndirib. Bildirib ki, bu qəbildən olan tədbirlərin əsas məqsədi cəmiyyətdə narkomaniya probleminin müzakirəsi və bu dəhşətli sosial bəla ilə mübarizənin daha səmərəli yollarının araşdırılmasından ibarət olduğunu vurğulayıb.
Tədbirdə Qaradağ Rayon Gənclər və İdman İdarəsinin rəisi Elçin Abbasov cari ilin doqquz ayı ərzində rayonda bu istiqamətdə görülən işlər barədə məlumat verib.
Müşavirədə gənclərə narkomanlardan uzaq olmaq və bu bəlaya qarşı mübarizənin önündə getmək tövsiyə edilib.
Sonda hər bir iştirakçıya narkomaniyanın fəsadlarını əks etdirən broşürlər paylanılıb.