CƏMİYYƏT
Cenevrədə BMT Uşaq Hüquqları Komitəsinin 74-cü sessiyası başlanıb
Bakı,17 yanvar, AZƏRTAC
Cenevrədə BMT Uşaq Hüquqları Komitəsinin 74-cü sessiyası başlanıb.
AZƏRTAC BMT Xəbərlər Mərkəzinə istinadla bildirir ki, BMT İnsan haqları üzrə Ali Komissarının müavini Keyt Gilmor Komitə üzvləri qarşısında çıxış edərək bildirib ki, öz evlərini tərk etməyə məcbur olmuş uşaqların düşdüyü ağır vəziyyət narahatlıq doğurur.
Keyt Gilmor deyib: “Qlobal miqrasiya və sığınacaq axtarışı ilə bağlı böhranın dərinləşməsi bütün dünyada uşaqların hüquqlarına son dərəcədə mənfi təsir göstərib. Bu gün miqrantların orta hesabla hər səkkiz nəfərindən biri uşaqdır. Dünyada bütün uşaqların orta hesabla hər 200 nəfərindən biri qaçqındır. Bütövlükdə münaqişələr nəticəsində 26 milyon uşaq köçkün vəziyyətinə düşüb”.
K.Gilmor miqrant uşaqların Avropa sahillərinə çatmağa çalışarkən onların dənizdə boğulması, habelə sığınacaq və müdafiə axtaran uşaqların istismar və ayrı-seçkiliklə üzləşməsi faktlarını xatırladaraq vurğulayıb ki, beynəlxalq birlik uşaqların müdafiəsi ilə bağlı öhdəliklərini yerinə yetirmir.
Sessiyanın gedişində Sent-Vinsent və Qrenadina, Barbados, Estoniya, Konqo Demokratik Respublikası, Mərkəzi Afrika Respublikası, Gürcüstan və Malavi Uşaq Hüquqları barədə Konvensiyanın yerinə yetirilməsinə dair məruzələr təqdim edəcəklər.
Uşaq Hüquqları barədə Konvensiya dünyada ən universal müqavilələrdən biridir. 1989-cu ildə BMT Baş Məclisi tərəfindən qəbul edilmiş bu sənəd 1990-cı ildə qüvvəyə minib. Konvensiyaya 196 dövlət, o cümlədən BMT-nin üzvü olmayan Vatikan və Fələstin də qoşulub.
54 maddədən ibarət olan Konvensiyanın məqsədi uşaqların təhsil almaq, layiqli həyat səviyyəsi, zorakılığın və ayrı-seçkiliyin bütün formalarından müdafiə hüquqlarını təmin etməkdir.
BMT üzvü olan dövlətlərdən yalnız ABŞ Uşaq Hüquqları barədə Konvensiyanı ratifikasiya etməyib.
2000-ci ildə Konvensiyaya iki fakültativ protokol qəbul edilib. Bu sənədlərdən biri uşaqların silahlı münaqişələrdə iştirakı barədə, digəri isə uşaq alveri, uşaq fahişəliyi və uşaq pornoqrafiyası barədədir. 2011-ci ildə Konvensiyaya üçüncü fakültativ protokol qəbul edilib. Bu protokol uşaqların BMT-yə şikayətlər göndərməsinə imkan verir.
BMT Uşaq Hüquqları Komitəsinə 18 ekspert daxildir. Komitə uşaq hüquqları barədə beynəlxalq Konvensiyanın tələblərinin yerinə yetirilməsinə nəzarət məqsədilə yaradılıb. Komitə üzvləri milli məruzələri müzakirə edəndən sonra həmin ölkələrdə uşaqların vəziyyəti barədə öz nəticələrini şərh edir və hökumətlərə tövsiyələr göndərirlər.
Komitənin 74-cü sessiyası yanvarın 16-dan fevralın 3-dək davam edəcək.