Masallı-Yardımlı, Bağır Əliyev, AZƏRTAC

Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramının icrası, təbliği və tətbiqi vəziyyəti ilə bağlı ictimai dinləmələr insan hüquqları üzrə müvəkkil (Ombudsman) Elmira Süleymanovanın iştirakı ilə cənub bölgəsində davam edir.

AZƏRTAC xəbər verir ki, iyulun 13-də Masallı və Yardımlı rayonlarında keçirilən ictimai dinləmələrdə rayon icra hakimiyyətlərinin, məhkəmə, polis, prokurorluq orqanlarının, bələdiyyələrin, yerli qeyri-hökumət təşkilatlarının təmsilçiləri, ictimaiyyətin nümayəndələri iştirak ediblər.

Masallıdakı Heydər Əliyev Mərkəzində keçirilən tədbirdən əvvəl insan hüquqları üzrə müvəkkil Elmira Süleymanova və rayon icra hakimiyyətinin başçısı Rafil Hüseynov ümummilli lider Heydər Əliyevin abidəsi önünə gül dəstələri düzərək, xatirəsini ehtiramla yad ediblər.

Tədbirdə çıxış edən Masallı Rayon İcra Hakimiyyətinin başçısı Rafil Hüseynov son illər rayonda sosial-iqtisadi inkişaf və insan hüquqlarının qorunması sahəsində görülən işlərdən danışıb.

İnsan hüquqları üzrə müvəkkil Elmira Süleymanova çıxışında 1990-cı illərin əvvəllərində ölkəmizdə yaşanan gərgin siyasi vəziyyətdən söhbət açıb, ulu öndər Heydər Əliyevin ikinci dəfə hakimiyyətə gəlməsindən sonra respublikanın dirçəliş yoluna qədəm qoyduğunu, Ümummilli Liderin siyasi kursunun bu gün Prezident İlham Əliyev tərəfindən uğurla davam etdirildiyini bildirib.

Azərbaycanda insan hüquq və azadlıqlarının qorunması sahəsində aparılan dövlət siyasəti nəticəsində ölkəmizin 230-dan çox beynəlxalq konvensiyaya qoşulduğunu vurğulayan E.Süleymanova ölkəmizdə insan hüquqlarının təmin olunmasının prioritet məsələlərdən olduğunu diqqətə çatdırıb.

Müzakirələrdə Əməkdar Müəllim, şəhər 1 nömrəli tam orta məktəbin direktoru Mirqabil Hüseynov, Qafqaz Müsəlmanları İdarəsinin cənub bölgəsi üzrə qazisi Mirqiyas Təhməzov, Həsənli kənd sakini Nazilə Hüseynova, Masallı Rayon İcra Hakimiyyəti başçısının müavini Gülşən Xəlilova və başqaları çıxış edərək insan hüquq və azadlıqları ilə bağlı təkliflərini bildiriblər.

Tədbirdən sonra insan hüquqları üzrə müvəkkil Elmira Süleymanova Masallı Rayon Polis Şöbəsində müvəqqəti saxlama yerinə baxış keçirib, rayon sakinlərinin müraciətlərini dinləyib.

Həmin gün Yardımlı Rayon Mədəniyyət Mərkəzində keçirilən ictimai dinləmələrdə rayon icra hakimiyyətinin, ərazi icra nümayəndəliklərinin, məhkəmə, polis, prokurorluq orqanlarının, bələdiyyələrin, yerli qeyri-hökumət təşkilatlarının təmsilçiləri, ictimaiyyətin nümayəndələri iştirak ediblər.

Əvvəlcə insan hüquqları üzrə müvəkkil Elmira Süleymanova və Yardımlı Rayon İcra Hakimiyyətinin başçısı Ayaz Əsgərov ulu öndər Heydər Əliyevin abidəsi önünə gül dəstələri düzərək xatirəsini ehtiramla yad ediblər.

Tədbirdə çıxış edən Yardımlı Rayon İcra Hakimiyyətinin başçısı Ayaz Əsgərov bildirib ki, insan hüquq və azadlıqlarının səmərəli müdafiəsi dövlət siyasətinin ən başlıca xəttini təşkil edir. Yardımlı rayonunda dövlət orqanları tərəfindən Milli Fəaliyyət Proqramından irəli gələn vəzifələrlə əlaqədar vətəndaş hüquq və azadlıqlarının qorunması istiqamətində ardıcıl tədbirlər həyata keçirilir.

Vətəndaşların müraciət etmək imkanlarının genişləndirilməsi məqsədi ilə rayon icra hakimiyyətinin saytında elektron müraciət linki yaradılıb, [email protected] elektron poçt ünvanı vasitəsilə vətəndaşların müraciətləri qəbul edilir və araşdırılaraq cavablandırılır. Müntəzəm olaraq Yardımlı Rayon İcra Hakimiyyətində və yerlərdə əhalinin qəbulları keçirilir. Onların müraciətlərinin həlli üçün operativ tədbirlər görülür.

Ombudsman Elmira Süleymanova qeyd edib ki, insan hüquq və azadlıqlarının müdafiəsinin səmərəliliyini artırmaq əsas vəzifələrdən biridir. Bu məqsədlə qəbul olunan Milli Fəaliyyət Proqramı uğurla həyata keçirilir.

Tədbirdə Milli Fəaliyyət Proqramının icrası istiqamətində görülən işlər barədə ətraflı məlumat verilib.

Müzakirələrdə rayon ağsaqqallar şurasının sədri Heybət Mirzəyev, Heydər Əliyev Mərkəzinin direktoru Məleykə Abışova, rayon veteranlar şurasının sədri Hüseyn Vəliyev və başqaları çıxış edərək insan hüquqlarının müdafiəsi sahəsində görülən işlərdən danışıb, bu işi daha da yaxşılaşdırmaq məqsədilə təkliflərini bildiriblər.

Tədbirdən sonra insan hüquqları üzrə müvəkkil Elmira Süleymanova Yardımlı Rayon Polis Şöbəsində müvəqqəti saxlama yerində yaradılan şəraitlə tanış olub, rayon sakinləri ilə görüşüb.