Bakı, 26 may, AZƏRTAC

Xəzər dənizinin Azərbaycan sektorundakı “Şahdəniz” qaz yatağından hasil edilən qazın Gürcüstan və Türkiyəyə nəqli məqsədilə inşa edilən Cənubi Qafqaz Boru Kəməri layihəsi üzrə işlər plan əsasında nəzərdə tutulan vaxtdan əvvəl yerinə yetirilir.

Energetika Nazirliyinin mətbuat xidmətindən AZƏRTAC-a verilən məlumata görə, bu barədə nazirlikdə Dövlət Xüsusi Mühafizə Xidmətinin, Əmlak Məsələləri Dövlət Komitəsinin, Kənd Təsərrüfatı Nazirliyinin, Ekologiya və Təbii Sərvətlər Nazirliyinin, habelə bp şirkətinin nümayəndələrinin iştirakı ilə keçirilən iclasda məlumat verilib.

İclasda Nazirlər Kabinetinin tapşırığı əsasında Cənubi Qafqaz Boru Kəmərinin genişləndirilməsi istiqamətində xüsusi mühafizə zolağının yaradılması ilə bağlı Dövlət Xüsusi Mühafizə Xidmətinin irəli sürdüyü təkliflər müzakirəyə çıxarılıb. Cənubi Qafqaz Boru Kəmərinin əhəmiyyətindən danışan energetika naziri Natiq Əliyev layihə üzrə işlərin plan əsasında nəzərdə tutulmuş vaxtdan əvvəl yerinə yetirildiyini diqqətə çatdırıb. Qeyd edib ki, ətraf mühitə və sosial sahəyə təsirlərin minimuma endirilməsi, eləcə də layihələrin birləşdirilməsi sayəsində əsaslı və əməliyyat xərclərinə qənaət məqsədilə bu kəmər də Bakı-Tbilisi-Ceyhan əsas ixrac boru kəməri ilə eyni tikinti dəhlizində inşa olunur. Boru kəmərinin uzunluğu 691 kilometrdir ki, bunun da 443 kilometri Azərbaycana, 248 kilometri Gürcüstana aiddir.

O bildirib ki, neft-qaz layihələrinin 30 ilə hesablandığı əsas gətirilərək Qərb istiqamətində tikiləcək 86 keçidin saxlanması təklif edilir. Xüsusi Dövlət Mühafizə Xidməti kəmərin təhlükəsizliyi məqsədilə görülən işlərin yüksək səviyyədə təmini və asanlaşdırılması, habelə xərclərə qənaət məqsədilə keçidlərin müvəqqəti deyil, uzunmüddətli tikilməsini vacib hesab edir.

İclas zamanı bu sahədə qarşıda duran perspektivlərə diqqət yönəlib, irəli sürülən bütün təkliflərin mövcud qayda və standartlara uyğunluğunun araşdırılması, vəziyyətin birgə təhlilindən sonra işçi qrupu tərəfindən yekun təkliflərin hazırlanaraq təqdim olunması qərara alınıb.