İDMAN


“Coca-Cola Məktəbli Kuboku” turniri və könüllülük fəaliyyəti ilə bağlı memorandumlar imzalanıb

A+ A

Bakı, 8 dekabr, Elşad Qəzvini, AZƏRTAC

Dekabrın 8-də Bakı Olimpiya Stadionunda Azərbaycan Futbol Federasiyaları Assosiasiyası (AFFA), Təhsil Nazirliyi və “Azerbaijan Coca-Cola Bottlers” şirkəti arasında futbol üzrə “Coca-Cola Məktəbli Kuboku” turniri ilə əlaqədar memorandumun imzalanması mərasimi keçirilib.

AZƏRTAC xəbər verir ki, memorandumu AFFA-nın baş katibi Elxan Məmmədov, təhsil nazirinin müavini Firudin Qurbanov və “Azerbaijan Coca-Cola Bottlers” şirkətinin baş direktoru Erdinc Güzel imzalayıblar.

2009-cu ildən keçirilən “Məktəbli Kuboku” turniri 2011-ci ildən AFFA, “Azerbaijan Coca-Cola Bottlers” və Təhsil Nazirliyinin dəstəyi ilə təşkil olunur. Uğurlu 5 illik əməkdaşlığın ardından tərəflər ölkənin ən kütləvi futbol layihəsi olan “Coca-Cola Məktəbli Kuboku”nun daha dörd il uzadılması qərara alınıb. Layihə respublika məktəblərinin 70 faizini əhatə edir.

Həmçinin Təhsil Nazirliyinin “BİR” Tələbə-Könüllü Proqramı ilə AFFA arasında könüllülük fəaliyyəti sahəsində qarşılıqlı əməkdaşlıq əlaqələrinin inkişafı və möhkəmləndirilməsi haqqında anlaşma memorandumu imzalanıb. Memorandumu təhsil nazirinin müavini Firudin Qurbanov və AFFA-nın baş katibi Elxan Məmmədov imzalayıb.

Anlaşma memorandumunda tələbələrin könüllülük fəaliyyətinə cəlb edilməsi, könüllülüyün təbliği ilə əlaqədar birgə tədbirlərin keçirilməsi nəzərdə tutulub. “BİR” Tələbə-Könüllü Proqramına daxil olan ali təhsil müəssisələrində AFFA tərəfindən keçirilən yerli və beynəlxalq tədbirlərdə könüllülərin iştirakı və onların təlimlərə cəlb edilməsi məsələsi də sənəddə yer alıb.

“BİR” Tələbə-Könüllü Proqramı ölkədə bir sıra irimiqyaslı tədbirlərin planlaşdırıldığı və bu tədbirlərin təşkilində tələbə-könüllülərin böyük rolunun olduğu nəzərə alınaraq, tələbə-könüllülərlə işin təşkilinin sistemləşdirilməsi, vahid məlumat bazasının yaradılması, tələbələrin könüllülük fəaliyyəti ilə məşğul olmasının stimullaşdırılması məqsədilə yaradılıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.