SİYASƏT
DAXİLİ İŞLƏR NAZİRLİYİ MƏTBUAT XİDMƏTİNİN MƏLUMATI
Son illər Azərbaycan Respublikasının Prezidenti cənab Heydər Əliyevin rəhbərliyi ilə həyata keçirilən ardıcıl və məqsədyönlü siyasət nəticəsində ölkəmizin tərəqqisinə və xalqımızın sosial rifahının yüksəldilməsinə yönələn islahatların aparılması üçün başlıca qarant olan sabitlik yaradılmış, qanunçuluğun və hüquq qaydalarının möhkəmləndirilməsi məqsədi ilə əməli tədbirlər görülmüşdür.
Respublikada qanunun aliliyinin, demokratikləşdirmə, hüquqazidd əmələ görə cəzanın labüdlüyü və humanistlik prinsipləri vəhdətinin təmini, eləcə də güclü dövlətçilik intizamı və dövlət orqanları arasında normal, işgüzar münasibətlərin yaradılması – bütün sahələrdə olduğu kimi, hüquq-mühafizə siyasətinin də ardıcıl həyata keçirilməsinə, o cümlədən cinayətkarlıqla mübarizənin uğurla aparılmasına imkan vermişdir.
Möhtərəm Prezidentimiz tərəfindən fəaliyyəti dəfələrlə yüksək qiymətləndirilən daxili işlər orqanlarının bu sahədəki işinin məqsədyönlü təşkili nəticəsində, 1994-cü ildən başlayaraq cinayətkarlıqla mübarizənin yüksələn xətlə inkişafı təmin edilmişdir.
1992-ci illə müqayisədə əhalinin sayının 1 milyon nəfərdən çox artmasına, kriminogen duruma bu və ya digər şəkildə təsir göstərən amillərin mövcudluğuna baxmayaraq, həmin ilə nisbətdə ötən il cinayətlərin sayı bütövlükdə 34,9 faiz, o cümlədən ağır və xüsusilə ağır cinayətlər 37,6 faiz, qəsdən adamöldürmələr və ölümə cəhdlər 2,2 dəfə, quldurluq və soyğunçuluqlar 3,5 dəfə, oğurluqlar 4 dəfə, odlu silahla törədilən cinayətlər 6 dəfədən çox azalmışdır. Cinayətlərin açılma göstəriciləri də köklü surətdə yaxşılaşaraq 63,9 faizdən 92,7 faizədək yüksəlmişdir.
Cinayətkarlıqla mübarizənin uğurla aparılmasını insan hüquq və azadlıqlarının təmin edilməsi sahəsində əsas istiqamətlərdən biri hesab edən Azərbaycan Respublikasının daxili işlər orqanları fəaliyyəti məhz bu prinsiplər üzərində qurur.
Daxili İşlər Nazirliyi tərəfindən son illər bu istiqamətdə köklü dönüş yaradılması, nəzarət və tələbkarlığın artırılması, şəxsi heyət arasında mənəvi-psixoloji iqlimin sağlamlaşdırılması, əməkdaşların humanizm ideyaları, qanunlara, hüquqi və etik normalara hörmət ruhunda tərbiyəsi üzrə bir sıra təşkilati-praktiki tədbirlər həyata keçirilmişdir. Eyni zamanda, şəxsi heyətin daxili işlər orqanları əməkdaşı adına ləkə gətirənlərdən qətiyyətlə təmizlənməsi, qanunları, insan və vətəndaş hüquqlarını pozan, cinayət törədən işçilərin ifşa olunaraq məsuliyyətə cəlb edilməsi üçün ciddi ölçülər götürülmüşdür.
Qeyd edilməlidir ki, daxili işlər orqanları kadrları sıralarının hərc-mərclik dövründə qanunsuz yollarla xidmətə qəbul edilmiş şəxslərdən ardıcıl olaraq təmizlənməsi işləri nəticəsində, hələ 1993-1996-cı illərdə xidmətlə bir araya sığmayan hərəkətlərə, qatı intizamsızlığa yol vermiş, habelə cinayətkarlığa yuvarlanmış 5 mindən çox əməkdaş xaric edilmişdir.
1996-2001-ci illər ərzində isə vətəndaşlarla kobud rəftara, onların polisə əsassız gətirilməsinə və saxlanılmasına, qanunsuz məsuliyyətə cəlb edilməsinə, hüquqlarının digər şəkildə pozulmasına görə 740 əməkdaşa müxtəlif intizam tənbehləri verilmiş, 91 nəfər daxili işlər orqanlarında xidmətdən xaric olunmuşdur.
Görülmüş bu və ya digər tədbirlər nəticəsində bütövlükdə əməkdaşlar arasında xidməti və icra intizamının möhkəmlənməsinə, şəxsi heyətin peşə hazırlığı səviyyəsinin yüksəlməsinə, insan və vətəndaş hüquqlarına daha ciddi riayət edilməsinə nail olunmuşdur.
Bununla yanaşı bəzi əməkdaşlar tərəfindən qanunçuluğun və insan hüquqlarının pozulması hallarına yol verilməsinə dair daxil olan siqnallar və vətəndaşların müraciətləri ciddi narahatçılıq doğurur, daxili işlər orqanlarının önəmli fəaliyyətinə və uğurlarına kölgə salan mənfi təzahürlərin qarşısının alınması üçün qətiyyətli tədbirlər görülməsini zəruri edir.
Dövlətimizin başçısının və nazirliyin rəhbərliyinin xüsusi diqqət mərkəzində saxladıqları qanunçuluğa və insan hüquqları prinsiplərinə riayət edilməsinə nəzarət məqsədi ilə ötən ilin sonlarında vətəndaşlardan daxil olmuş şikayətlər əsasında nazirlikdə xüsusi komissiya yaradılaraq paytaxtın bir neçə rayonunda qəfləti yoxlamalar keçirilmişdir.
Həmin yoxlamalar zamanı, nəqliyyat vasitələrinin əsassız təqibi və saxlanılması, ehtiyac olmadan vətəndaşlardan şəxsiyyəti təsdiq edən sənəd tələb edilməsi, onlarla kobud rəftar, bəzi əməkdaşların dostlarını tərk edərək təyinatdan kənar fəaliyyətlə məşğul olması kimi mənfi hallar, bütövlükdə polis əməkdaşı adına ləkə gətirən hərəkətlərə yol verilməsi faktları aşkar olunmuşdur.
Aparılmış araşdırmalarla intizam qaydalarını, vətəndaşların hüquqlarını pozduqlarına, xidməti fəaliyyətlə bir araya sığmayan hərəkətlərə yol verdiklərinə görə daxili işlər nazirinin 7 yanvar 2002-ci il tarixli əmri ilə Nazirliyin paytaxtdakı orqan və hissələrinin 19 əməkdaşı daxili işlər orqanlarından xaric edilmiş və 22 nəfər digər növ intizam tənbehinə cəlb olunmuşdur.
Daxili İşlər Nazirliyinin qeyd olunan əmri Respublika daxili işlər orqanlarında elan edilməsi üçün yerlərə göndərilmiş, habelə şəxsi heyət arasında qanunçuluğun və nizam-intizamın möhkəmləndirilməsi məqsədi ilə əlavə tədbirlər müəyyən edilmişdir. Nazirliyin xidmətlərinin və ərazi orqanlarının rəhbərlərindən asayişin mühafizəsi, ictimai qaydanın, insan və vətəndaş hüquq və azadlıqlarının təmini işinin qüsursuz və səmərəli təşkili üzrə əməli tədbirlər görülməsi, post-patrul və yol-patrul xidmətinin aparılması işində, bütövlükdə əməliyyat-xidməti fəaliyyətdə qanunçuluğun gücləndirilməsi və bu yönümdə görüləcək işlərin ciddi nəzarətdə saxlanması tələb edilmişdir.
Daxili İşlər Nazirliyi ölkə ictimaiyyətini əmin edir ki, şəxsi heyət arasında rast gəlinən mənfi təzahürlərin qarşısı qətiyyətlə alınacaq, daim öz xalqı ilə bir olan, Vətənə və dövlətçiliyə sədaqəti ilə seçilən, daxili işlər orqanlarında apardığı xidmətdən mənəvi qürur duyan Azərbaycan polisi müdrik siyasətçi və böyük öndər, zati-aliləri cənab Heydər Əliyevin rəhbərliyi ilə ölkədə yaradılmış sabitliyin dönməzliyinin qorunub-saxlanılması, cinayətkarlıqla mübarizənin daha da gücləndirilməsi, ictimai təhlükəsizliyin və insan hüquqlarının etibarlı təmini üçün bundan sonra da qüvvə və səylərini əsirgəməyəcəkdir.
7 yanvar 2002-ci il