CƏMİYYƏT
DST: Ötən həftə Ebola virusuna 99 yeni yoluxma halı qeydə alınıb
Bakı, 30 yanvar, AZƏRTAC
Yanvarın 18-dən 25-dək Qvineya, Liberiya və Sierra Leonedə Ebola virusuna 99 yeni yoluxma halı qeydə alınıb. Bu, son yeddi ay ərzində ən aşağı göstəricidir.
AZƏRTAC Rusiya KİV-lərinə istinadən xəbər verir ki, bu barədə Dünya Səhiyyə Təşkilatı (DST) İcraiyyə Komitəsinin Cenevrədə keçirilən 136-cı sessiyasında məlumat verilib.
Sessiyada vurğulanıb ki, Ebola virusuna yoluxanların sayı ən aşağı səviyyəyə düşsə də, bu qorxulu xəstəliklə mübarizə istiqamətində profilaktik tədbirlər davam etdirilməlidir.
DST-nin yanvarın 25-dək apardığı hesablamalara görə, Ebola virusuna 22,1 min nəfər yoluxub, onlardan 8,8 min nəfər dünyasını dəyişib. Ən çox ölüm halı Liberiyada qeydə alınıb: virusa yoluxan 8,6 min nəfərdən 3,7 mini ölüb. İkinci yerdə Sierra Leone (10,5 min nəfər yoluxandan 2 mini ölüb) gəlir. Qvineyada isə yoluxanların sayı 2,9 min nəfər təşkil edir. Onlardan ölənlərin sayı 1,9 min nəfərdir. Eyni zamanda, bu təhlükəli virus Mali, Nigeriya, Seneqal, İspaniya, Böyük Britaniya və ABŞ-da da özünü göstərib. Ancaq Nigeriyanı çıxmaq şərti ilə bu ölkələrdə Ebolaya yoluxanların sayı 10 nəfərdən çox olmayıb. Nigeriyada isə 28 nəfər bu virusa yoluxub, onlardan 8-i ölüb.
DST İcraiyyə Komitəsinin yanvarın 26-dan başlayan sessiyası fevralın 3-dək davam edəcək. Sessiya iştirakçıları ana və uşaq ölümü problemini, vaksinasiya, habelə qlobal miqyasda epilepsiya və uşaqlar arasında piylənmə məsələlərini də müzakirə edəcəklər.
Qeyd edək ki, Azərbaycan Respublikasının səhiyyə naziri Oqtay Şirəliyev DST İcraiyyə Komitəsinin sessiyasında iştirak edir.