İQTİSADİYYAT


Dağıstanın nümayəndə heyəti Sumqayıtın sənaye müəssisələrində olmuşdur

Sumqayıt, 27 aprel (AzərTAc). Rusiya Federasiyasının Dağıstan Respublikası Baş nazirinin müavini Rizvan Qazımaqomedov başda olmaqla Azərbaycana gəlmiş nümayəndə heyəti aprelin 27-də Sumqayıt texnoparkında (STP) olmuşdur. Bu iri istehsalat kompleksi hazırda Azərbaycanın çoxprofilli innovasiya mühəndisliyi mərkəzinə çevrilmişdir.
Sumqayıt texnoparkının direktoru Sahib Musayev qonaqları müəssisənin strukturu ilə tanış etmişdir. Bildirilmişdir ki, postsovet məkanında nadir müəssisə sayılan və AZENCO SC-nin tərkibinə daxil olan bu texnopark 2009-cu ildə işə salınmışdır. Texnoparkın açılışında ölkə Prezidenti İlham Əliyev iştirak etmişdir. Texnoparkı altı departament idarə edir. Onların hər birində bir neçə zavod vardır. Hazırda müəssisənin 17 zavodunda respublika əhəmiyyətli hər cür məhsul, o cümlədən kabel, transformator, yüksək gərginlikli avadanlıq, hidroturbinlər, su nasosları, elektrik mühərrikləri, borular və s. istehsal edilir. Texnoparkın rəhbərinin dediyinə görə, ilin sonunadək burada daha dörd zavod işə salınacaqdır. Bütövlükdə STP-də 30 müəssisə, o cümlədən gəmiqayırma zavodu fəaliyyət göstərəcəkdir, burada körpü də tikiləcəkdir.
Bu nəhəng sənaye müəssisəsinin işə salınması nəticəsində yeni iş yerləri açılmışdır. Hazırda burada təqribən 4,5 min adam çalışır. Onlardan 1,5 nəfəri istehsalatda, qalanları isə tikinti işlərindədir. Həmçinin bildirilmişdir ki, əməkçilərin orta əməkhaqqı səviyyəsi respublika üzrə göstəricidən yüksəkdir.
Sonra qonaqlar avtobusla müəssisənin zavodlarını gəzmişlər. Onlar kabel zavoduna və mis, alüminium milləri istehsalı sexinə, plastik borular, qaynar sinkləmə, yüksək voltlu elektrik avadanlığı, günəş kollektorları istehsalı zavodlarına, dəqiq emal, metal konstruksiyalar və s. mərkəzlərinə baxmışlar.
Qonaqlar, həmçinin ümumi ərazisi 2,8 hektar olan polimer məhsul istehsalı zavodunda olmuşlar. Hazırda burada 400 adam işləyir. Bu zavod texnoparkın ilk işə salınmış müəssisələrindəndir. Əvvəlcə burada cəmi beş xətt işləyirdi. Zavod genişləndirildikdən sonra xətlərin sayı 25-ə çatdırıldı. Onların hər biri saatda 1300 kiloqram polietilen boru emal edir. İstehsalın idarə olunması tamamilə avtomatlaşdırılmışdır. Mütəxəssislər belə hesab edirlər ki, bu, istehsal edilən məhsulun – müasir tələblərə cavab verən çoxtəbəqəli polietilen və alüminium təbəqəli polipropilen boruların yüksək keyfiyyətini təmin edir.
Zavod 50 il zəmanət verməklə sutkada yüksək təzyiqə və korroziyaya davamlı 396 ton polietilen boru buraxmağa qadirdir. Qaz və su təchizatında, kanalizasiya xətlərinin çəkilişində və başqa məqsədlərlə istifadə olunan bu borulara ölkəmizdə və beynəlxalq bazarlarda böyük tələbat vardır. Mütəxəssislərin fikrincə, bu, nəinki respublikada, həm də regionda ən perspektivli müəssisədir.
Sonra qonaqlar Sumqayıtda Alternativ və bərpa olunan enerji mənbələri üzrə dövlət agentliyi tərəfindən tikilmiş “Azgüntex” zavodunda olmuşlar. Bu günlərdə müəssisənin açılışında ölkə Prezidenti İlham Əliyev iştirak etmişdir. Burada günəş modullarının istehsalına başlanmışdır. Zavodda alternativ və bərpa olunan enerji sahəsində tanınmış beynəlxalq şirkətlərin ən müasir texnologiyalarından istifadə olunur. Burada istehsal edilən 42 vattdan 250 vattadək gücündə günəş panelləri 60 fotoelementlə təchiz olunmuşdur ki, bu da müəssisə mütəxəssislərinin fikrincə, sabit enerji istehsalına imkan verir. Küçələrin daha səmərəli işıqlandırılması, yaşayış binalarının, müxtəlif sosial və məişət obyektlərinin enerji təchizatının yaxşılaşdırılması məqsədilə zavodda yüksək texnoloji LED lampalarının istehsalı nəzərdə tutulmuşdur. Müəssisə ilə tanışlıq zamanı qeyd edilmişdir ki, zavod tamamilə kompyuterləşdirilmiş, Wi-Fi şəbəkəsi yaradılmışdır. İstər əmək prosesi, istərsə də ayrıca sağlamlıq zalı, işçilərin istirahəti üçün yaradılmış şəraitin uğurlu vəhdəti qonaqların diqqətini cəlb etmişdir.
Hələlik müəssisədə 33 adam çalışır. Üç növbəli iş rejiminə keçdikdən sonra işçilərin sayı 130 nəfərə çatdırılacaqdır.
Qonaqlara tezliklə Yüksək Texnologiyalar Parkının salınacağı ərazi də göstərilmişdir. Burada optik linzalar, şüşə və bazalt liflər, akkumulyatorlar və s. istehsalı üzrə 15 zavod yaratmaq planlaşdırılır.
Sumqayıtın sənaye müəssisələri ilə tanışlıqdan sonra Dağıstan nümayəndə heyəti Binə qəsəbəsindəki “Qrintek” istixanasına getmiş, istehsal prosesi ilə tanış olmuşdur.
Səfər çərçivəsində qonaqlar Qəbələ və Xaçmaz rayonlarına da gedəcəklər.
 

© Materiallardan istifadə edərkən hiperlinklə istinad olunmalıdır