ELM VƏ TƏHSİL
Danimarkada yaşayan azərbaycanlı alim beynəlxalq cəmiyyətin rəhbəri seçilib
Stokholm, 15 iyun, Rauf Əliyev, AZƏRTAC
Danimarka Krallığında yaşayan azərbaycanlı alim, Kopenhagen Universitetinin nevrologiya üzrə professoru Məsud Aşina Beynəlxalq Baş ağrıları Cəmiyyətinin rəhbəri olub.
Danimarka "Vətən" Cəmiyyətindən AZƏRTAC-a bildirilib ki, həmyerlimiz 1300 üzvü olan Beynəlxalq Baş ağrıları Cəmiyyətinin prezidenti vəzifəsinə səsvermə yolu ilə 2019-2021-ci illər üzrə seçilib.
Məsud Aşina nevrologiya və baş ağrıları sahəsində tanınmış alimdir. Həmyerlimizin fəaliyyəti nəticəsində miqren xəstəliyinə səbəb olan amillərin tədqiqatı aparılıb. Bir çox vacib nailiyyətlər məhz Məsud Aşinanın adı ilə bağlıdır. Hazırda o, Kopenhagen Universitetinin baş ağrıları sahəsində fəaliyyət göstərən elmi qrupunun rəhbəri kimi fəaliyyət göstərir.
Qeyd edək ki, Beynəlxalq Baş ağrıları Cəmiyyəti baş ağrılarından əziyyət çəkən insanların rifahı naminə fəaliyyət göstərən peşəkar təşkilatdır. Cəmiyyətin məqsədi dünyada bu sahə üzrə elm və təhsilin inkişafına dəstək vermək, məlumatlılığı artırmaqdır.
Rauf Əliyev
AZƏRTAC-ın xüsusi müxbiri
Stokholm