Bakı, 23 iyun, Əziz Məmmədov, AZƏRTAC

İyunun 23-də Ə.Əliyev adına Azərbaycan Dövlət Həkimləri Təkmilləşdirmə İnstitutunda (AzDHTİ) davamlı tibbi təhsil sahəsində görülən işlərə həsr edilmiş tədbir keçirilib.

AZƏRTAC xəbər verir ki, tədbirdə səhiyyə naziri Oqtay Şirəliyevin “Həkimlərin bilik və bacarıqlarının təkmilləşdirilməsi sahəsində əlavə tədbirlər barədə” Əmr imzalaması diqqətə çatdırılıb. Qeyd edilib ki, bu Əmr Azərbaycan Respublikası Prezidentinin 25 may 2006-cı il tarixli 413 nömrəli Fərmanı ilə təsdiq edilmiş “Səhiyyə Nazirliyi haqqında Əsasnamə”nin 14.5-ci bəndi rəhbər tutulmaqla hazırlanıb.

Tədbirdə çıxış edən AzDHTİ-nin rektoru, professor Nazim Qasımov, İnstitutun prorektoru Təyyar Eyvazov və Səhiyyə Nazirliyinin kadrlar, elm və təhsil şöbəsinin mütəxəssisi Təranə Əhmədova qeyd ediblər ki, Əmrə əsasən, tibbi təhsil prosesinin təkmilləşdirilməsi və onun beynəlxalq standartlara uyğunlaşdırılması məqsədilə səlahiyyətli şəxslərə və qurumlara “Həkimlərin bilik və vərdişlərinin təkmilləşdirilməsinə dair müvəqqəti qaydalar”ın təsdiq edilməsi, səhiyyə idarə və müəssisələrinin rəhbərlərinin öz işlərində bu qaydaları əsas tutması barədə müvafiq tapşırıqlar verilib. Bundan əlavə, AzDHTİ-nin sinir xəstəlikləri, anesteziologiya və reanimotologiya, mikrobiologiya və epidemiologiya, otorinolarinqologiya və kardiologiya kafedralarında 2017/2018-ci tədris ilindən başlayaraq pilot layihəsi üçün təhsilin təkmilləşdirilməsi proqramları və kursları təşkil edilməsi barədə tapşırıq da Əmrdə öz əksini tapıb.

Diqqətə çatdırılıb ki, davamlı tibbi təhsil sisteminin tətbiqinin əsas məqsədi əhaliyə göstərilən tibbi xidmətlərin yüksək keyfiyyətini təmin etməkdir. Qeyd edilib ki, elmin və səhiyyənin sürətli inkişafı ilə əlaqədar həkimlərin bilik və vərdişlərinin səviyyəsinin artırılması çox vacibdir. Fasiləsiz tibbi təhsil sistemi həkimlərin peşəkarlığını və onların məsuliyyətini artırmağa imkan verəcək.

Çıxış edənlər bildirdilər ki, davamlı tibbi təhsil praktik tibb fəaliyyəti ilə məşğul olan həkimlərin bilik, bacarıq və peşəkar vərdişlərinin inkişaf etdirilməsinə yönəldilmiş təhsil prosesidir. Davamlı tibbi təhsil ali tibb təhsilini təsdiq edən sənədin verildiyi gündən başlayır və həkimin peşəkar fəaliyyəti dövrü davam edir. Davamlı tibbi təhsil təkmilləşdirmə kursları və toplanma sistemi metodlarından birgə yaxud ayrılıqda istifadə edilməklə həyata keçirilir. Metoddan asılı olmayaraq davamlı tibbi təhsilin zəruri miqdarının hesablanması davamlı tibbi təhsilin kreditləri vasitəsilə həyata keçirilir. Sertifikasiya dövrü ərzində həkim hər il orta hesabla 48 kredit olmaqla minimum 240 kredit toplamalıdır.