ELM VƏ TƏHSİL
Dəniz Akademiyasında “Açıq qapı günü” keçirilib
Bakı, 9 sentyabr, Elvin Camalov, AZƏRTAC
Sentyabrın 9-da Azərbaycan Dövlət Dəniz Akademiyasında “Açıq qapı günü” – yenicə tələbə adını qazanan gənclər və onların valideynləri ilə görüş keçirilib.
AZƏRTAC xəbər verir ki, görüşdə gəmiçiliyin rəhbər işçiləri, donanma rəisləri, gəmi təmiri zavodlarının direktorları, Bakı Gəmiqayırma Zavodunun və gəmiçiliyin alyans tərəfdaşı olan “Caspian Marine Services” şirkətinin nümayəndələri iştirak ediblər.
Azərbaycan Dövlət Dəniz Akademiyasının rektoru Çingiz Əliyev builki tələbə qəbulunun yekunları, akademiyada tədrisin təşkili, tələbələr üçün yaradılan şərait barədə məlumat verib.
Bildirib ki, 2016-2017-ci tədris ili üçün müəyyən edilmiş qəbul planında nəzərdə tutulan 370 yerə 309 abituriyent daxil olub. İlk dəfə olaraq onların arasında 600-dən yuxarı bal toplayanlar da var. Hazırda Dəniz Akademiyasında 1200-ə yaxın tələbə təhsil alır. Son iki ildə onların müvəffəqiyyət göstəricilər 67,5 faizdən 80,45 faizə, keyfiyyət göstəriciləri isə 13,5 faizdən 36,7 faizə yüksəlib. Bu gün akademiyada 63 tələbə əlaçı, 305 nəfər isə əla və yaxşı oxuyanlardır.
Ç.Əliyevin sözlərinə görə, Azərbaycan Dövlət Dəniz Akademiyasının beynəlxalq əlaqələri genişlənir. Artıq 10 ölkədən 17 ali məktəb ilə əməkdaşlıq edilir. Onların arasında Rusiya, Türkiyə, Polşa, Ukrayna, Latviya, Bolqarıstan və sair ölkələrin aparıcı dənizçilik universitetləri və akademiyaları var.
Sosial məsələlərə gəldikdə isə Ç.Əliyev qeyd edib ki, tələbələr dərs vəsaitləri, yataqxana, geyim forması və gündə 2 dəfə isti yeməklə pulsuz təmin olunur.
“Azərbaycan Xəzər Dəniz Gəmiçiliyi” QSC sədrinin birinci müavini Zamiq İsmayılov Xəzərdə ticarət gəmiçiliyinin və neft donanmasının tarixi, respublikamızda dəniz nəqliyyatının inkişafı, ölkə rəhbərliyinin gəmiçilik qarşısında qoyduğu vəzifələr, strateji hədəflər barədə ətraflı söhbət açıb, təqdimatla çıxış edib.
Z.İsmayılov bildirib ki, ulu öndər Heydər Əliyev həm sovet dönəmində, həm də müstəqillik illərində dəniz nəqliyyatına böyük qayğı göstərib, Prezident İlham Əliyevin diqqəti sayəsində bu sahədə struktur islahatları uğurla davam etdirilir, gəmiçiliyin müasir standartlara uyğun çevik bir şirkətə çevrilməsi istiqamətində əhəmiyyətli addımlar atılır. Azərbaycan Xəzər Dəniz Gəmiçiliyi hazırda istər regionda, istərsə də bütövlükdə MDB məkanında texniki imkanlarına və maddi texniki bazasına görə liderlər sırasındadır.
Z.İsmayılov yeni, müasir gəmilərin istismarında bilikli və mükəmməl savada malik kadrlara ehtiyac duyulduğunu söyləyərək qeyd edib ki, akademiyanı müvəffəqiyyətlə bitirən məzunların əksəriyyəti Azərbaycan Xəzər Dəniz Gəmiçiliyində, Bakı Gəmiqayırma Zavodunda, bir sıra digər yerli və xarici şirkətlərdə çalışırlar.
“Bu gün gəmiçilikdə akademiyanı müxtəlif vaxtlarda bitirmiş 790-a yaxın məzun işləyir, onların 274-ü rəhbər işçidir. Məzunlar yalnız Xəzərdə deyil, həm də beynəlxalq sularda işləmək imkanlarına malikdirlər”, - deyə Z.İsmayılov vurğulayıb.
Bakı Gəmiqayırma Zavodunun direktor müavini İmanverdi Həsənov Xəzər hövzəsində ən böyük və ən müasir sənaye müəssisələrindən olan bu müəssisədə gənclərin karyera imkanlarından, iş şəraitindən, həyata keçirilən layihələrdən danışıb, bilikli mütəxəssislərə istehsalatda həmişə yer olduğunu vurğulayıb.
Daha sonra gənclərin və valideynlərin sualları səsləndirilib, gənclər və valideynlər öz ürək sözlərini bildirib, 500-600 baldan yuxarı nəticə göstərən 9 tələbəyə noutbuk və tələbə biletləri təqdim edilib.
Sonda görüş iştirakçıları Dəniz Akademiyasının auditoriyaları və laboratoriyaları ilə tanış olub.