Bakı, 1 dekabr, AZƏRTAC

Qafqaz Müsəlmanları İdarəsinin sədri şeyxülislam Allahşükür Paşazadə, Bakı və Azərbaycan arxiyepiskopu

Aleksandr, Roma Katolik Kilsəsinin Azərbaycandakı apostol prefekturasının ordinarisi Vladimir Fekete, Azərbaycandakı Dağ yəhudiləri icmasının rəhbəri Milix Yevdayev, Avropa yəhudilərinin Bakı icmasının sədri Gennadi Zelmanoviç, Alban-udi xristian dini icmasının sədri Robert Mobili Azərbaycan Prezidenti İlham Əliyevə müraciət ünvanlayıblar.

Müraciətdə Azərbaycanda fəaliyyət göstərən dini konfessiyaların rəhbərləri Beynəlxalq Tolerantlıq Günü münasibətilə multikultural ənənələrin və dinlərarası münasibətlərin inkişafındakı xidmətlərə görə yüksək mükafat – “Azərbaycan Respublikası Prezidentinin Fəxri Diplomu”na layiq görüldüklərinə görə dövlətimizin başçısına minnətdarlıqlarını bildirirlər.

Qeyd edilir ki, bu gün sivilizasiyaların qovuşduğu Azərbaycanda təşəkkül tapmış davamlı tolerantlıq mühiti cəmiyyətimizdə milli mənəvi həmrəyliyi və ictimai-siyasi sabitliyi şərtləndirən tarixi nailiyyətdir. Dinindən, dilindən, milli mənsubiyyətindən asılı olmayaraq Azərbaycanın bütün vətəndaşları ölkəmizdə mövcud olan söz, vicdan və dini etiqad azadlığından, dövlət-din münasibətlərindən və demokratik, hüquqi şəraitdən lazımınca yararlanırlar. Azərbaycanda müsəlmanlarla yanaşı, pravoslav, katolik, yəhudi, alban-udi icmaları da milli mənəvi dəyərlərdən sərbəst istifadə edərək ölkəmizdə gedən böyük quruculuq işlərində yaxından iştirak edirlər. Vurğulanır ki, bu gün Azərbaycanda bütün sahələrdə əldə olunan nailiyyətlər təməli ulu öndər Heydər Əliyev tərəfindən qoyulan və mütərəqqi tarixi ənənələrdən bəhrələnən uğurlu siyasətin məntiqi nəticəsidir.

Müraciətdə qeyd edilir ki, Prezident İlham Əliyevin və xanımı, Heydər Əliyev Fondunun prezidenti Mehriban Əliyevanın dəstəyi ilə bizim hər zaman təbliğ etdiyimiz və dünyaya multikulturalizmin nümunəsi kimi təqdim etdiyimiz Azərbaycanın tolerantlıq modeli sivilizasiyalararası dialoqun və mədəni əlaqələrin inkişafına, qarşılıqlı anlaşma və dostluq kimi bəşəri dəyərlərin təşviqinə və təkamülünə öz töhfəsini verməkdədir. “Dövlətimizin bütün dini konfessiyalar üçün yaratdığı eyni şəraitin və bərabər münasibətin ən parlaq təzahürlərindən biri də multikultural ənənələrin və dinlərarası münasibətlərin inkişafındakı xidmətlərə görə bizə təqdim etdiyiniz Fəxri Diplomda əksini tapır”, - deyə din xadimləri bildirirlər.

Müraciətdə Prezident İlham Əliyevin milli mənəvi dəyərlərin, tarixi abidələrin qorunması, dini məbədlərin, məscid, kilsə və sinaqoqların bərpası və inşası sahəsində böyük işlər görmüş bir rəhbər olduğu qeyd edilir.

Dini konfessiyaların rəhbərləri Azərbaycan xalqının gələcəyi və rifahı naminə dövlətimizin başçısının fəaliyyətini hər zaman bəyəndiklərini və dəstəklədiklərini vurğulayırlar.