İQTİSADİYYAT


Doqquz ayda Azərbaycanla Çin arasında ticarət dövriyyəsi 56 faiz artıb

A+ A

Bakı, 11 noyabr, AZƏRTAC

Doqquz ayda Azərbaycanla Çin arasında ticarət dövriyyəsi 56 faiz artıb.

İqtisadiyyat Nazirliyinin mətbuat xidmətindən AZƏRTAC-a bildirilib ki, bu barədə iqtisadiyyat naziri Şahin Mustafayevin ölkəmizdə səfərdə olan Çin iş adamlarından ibarət nümayəndə heyəti ilə görüşü zamanı deyilib.

Nazir Şahin Mustafayev Azərbaycan və Çin arasında siyasi-iqtisadi əməkdaşlığın uğurla inkişaf etdiyini, rəsmi və işgüzar səfərlərin, imzalanan sənədlərin ölkələrimiz arasında əlaqələrin genişlənməsində mühüm rol oynadığını vurğulayıb. Azərbaycan-Çin iqtisadi əlaqələrinin inkişafında iş adamlarının fəaliyyəti xüsusilə önəmlidir. Hazırda Azərbaycanda Çin kapitalına əsaslanan 77 şirkət fəaliyyət göstərir. Bu şirkətlər neft-qaz sektoru ilə yanaşı, qeyri-neft sahəsində də uğurlu layihələr həyata keçirirlər. Diqqətə çatdırılıb ki, Azərbaycanda fəaliyyət göstərən sement zavodları Çin şirkətləri tərəfindən tikilib.

Azərbaycan-Çin ikitərəfli əməkdaşlığının inkişafında ticarət əlaqələrinin əhəmiyyətini qeyd edən Şahin Mustafayev bu ilin 9 ayında Azərbaycan və Çin arasında ticarət dövriyyəsinin 56 faiz artdığını vurğulayıb. Qeyd olunub ki, Azərbaycan Çinlə əlaqələrin daha da inkişafında maraqlıdır və energetika, nəqliyyat, tranzit yükdaşımaları, investisiya sahələrində əlaqələrin genişləndirilməsi üçün böyük potensial var. Nazir Şahin Mustafayev Çin şirkətlərini fəal əməkdaşlığa dəvət edib.

Çinin “CNPC” şirkətinin İdarə Heyətinin üzvü Vanq Şihonq Azərbaycan-Çin siyasi-iqtisadi əlaqələrinin yüksək səviyyədə olduğunu qeyd edib, təmsil etdiyi şirkətin fəaliyyəti barədə məlumat verib. Vanq Şihonq Azərbaycanda Qaz Emalı və Kimya Kompleksinin yaradılması layihəsindən danışaraq, 2016-cı ildə “CNPC” şirkəti ilə SOCAR arasında Anlaşma Memorandumunun imzalandığını və layihənin uğurla reallaşdırılacağına əminliyini vurğulayıb. Bildirilib ki, “CNPC” şirkəti Azərbaycanla əməkdaşlığın genişləndirilməsində maraqlıdır.

Görüşdə Çin şirkətlərinin azərbaycanlı həmkarları ilə əlaqələrinin genişləndirilməsi imkanları barədə müzakirələr aparılıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.