CƏMİYYƏT
Dörd ildir axtarışda olan şəxsin arvadı tərəfindən qətlə yetirildiyi müəyyənləşib VİDEO
Bakı, 24 iyul, AZƏRTAC
Respublikanın polis və prokurorluq orqanlarının əməkdaşlarının birgə həyata keçirdikləri əməliyyat-axtarış, eləcə də istintaq tədbirləri nəticəsində itkin düşmüş şəxs kimi 2013-cü il yanvarın 26-dan axtarışda olan Göygöl rayonunun Qırıxlı kənd sakini İlham Qəhrəmanovun qətlə yetirildiyini müəyyən edilib.
Daxili İşlər Nazirliyinin mətbuat xidmətindən AZƏRTAC-a bildiriblər ki, Göygöl Rayon Polis Şöbəsinin (RPŞ) rəhbərliyinin xüsusi nəzarəti altında həyata keçirilən əməliyyat nəticəsində İ.Qəhrəmanovun 2013-cü ildə həyat yoldaşı Göygöl rayon sakini Aynurə Qəhrəmanova tərəfindən ailə münaqişəsi zəminində qətlə yetirildiyi və həyətdəki tövlədə basdırıldığı məlum olub.
Cinayəti törətməkdə şübhəli bilinən A.Qəhrəmanova Göygöl RPŞ əməkdaşlarının həyata keçirdikləri əməliyyat-axtarış tədbirləri nəticəsində saxlanılaraq istintaqa təqdim edilib. O, ifadəsində həyat yoldaşını qətlə yetirəndən sonra həyətdəki yardımçı tikilidə basdırdığını etiraf edib.
Yaradılan əməliyyat-istintaq qrupu tərəfindən yardımçı tikilidə qazıntı işləri aparılıb. Mərhumun meyitinin qalıqları ekshumasiya olunaraq Məhkəmə Tibbi Ekspertiza və Patoloji Anatomiya Birliyinə göndərilib.
Göygöl RPŞ əməkdaşlarının keçirdikləri digər əməliyyat-axtarış tədbirləri nəticəsində Qarabağ məhəlləsində yerləşən gölün kənarında qeyri-aşkar şəraitdə rayon sakini Aftandil Əliyevin qətlə yetirməkdə şübhəli bilinən şəxslər də saxlanılıb. A.Əliyevi qətlə yetirməkdə şübhəli bilinən Göygöl rayon sakinləri, əvvəllər məhkum olunmuş Seymur Əhmədov və qohumu Röyal Mamaedov həyata keçirilən əməliyyat-axtarış tədbirləri nəticəsində tutularaq istintaqa təqdim edilib.
Saxlanılan şəxslər ifadələrində A.Əliyev ilə birlikdə gölün kənarında spirtli içki qəbul edəndən sonra aralarında yaranan mübahisə zamanı onu döyərək qətlə yetirdiklərini bildiriblər.
Hər iki faktla bağlı Cinayət Məcəlləsinin müvafiq maddələri ilə cinayət işləri başlanılıb, araşdırmalar davam etdirilir.