ELM VƏ TƏHSİL
Dövlət Dəniz Akademiyasında Bilik Günü qeyd olunub
AZƏRTAC xəbər verir ki, müəllim və tələbə heyətinin, o cümlədən valideynlərin də iştirak etdiyi tədbir dövlət himninin səsləndirilməsi ilə başlanıb.
ADDA-nın rektoru Rasim Bəşirov ali məktəbdə təhsil alan və buraya yeni qəbul olunan tələbələrin yeni dərs ilində uğurlu nəticələrə imza atacaqlarına əmin olduğunu bildirərək, onlara uğurlar arzulayıb.
Yeni tədris ilinin başlanması münasibətilə müəllim və tələbələri təbrik edən “Azərbaycan Xəzər Dəniz Gəmiçiliyi” QSC-nin sədri Rauf Vəliyev tarixə nəzər salaraq ölkəmizdə gəmiçiliyin möhkəm təməl üzərində bərqərar olduğunu diqqətə çatdırıb. Bildirilib ki, iqtisadiyyatda köklü struktur islahatlarının davam etdirilməsi, dəniz gəmiçiliyi sahəsində yerli və beynəlxalq daşımaların artırılması, ölkənin rəqabət qabiliyyətinin və tranzit potensialının gücləndirilməsi məqsədilə Prezident İlham Əliyevin 2013-cü il 22 oktyabr tarixli Sərəncamı ilə respublikada mövcud olan iki böyük donanmanın əsasında “Azərbaycan Xəzər Dəniz Gəmiçiliyi” QSC yaradılıb. Zəngin və qədim gəmiçilik ənənələrinə söykənən Səhmdar Cəmiyyət respublikamızın inkişafında üzərinə düşən vəzifəni bundan sonra da layiqincə yerinə yetirmək və ölkə iqtisadiyyatına öz töhfələrini vermək əzmindədir.
Azərbaycanda gəmiçiliyin inkişafının neft sənayesinin yaranması və tərəqqisi ilə sıx bağlı olduğunu deyən R.Vəliyev diqqətə çatdırıb ki, Prezident İlham Əliyevin uzaqgörən siyasəti nəticəsində neft kapitalının insan kapitalına çevrilməsi istiqamətində uğurlu addımlar atılmaqdadır. Bu siyasət peşəkar kadrların yetişdirilməsinə, təhsilin müasirləşməsinə yönəlib. “Dənizçi peşəsi elə bir vəzifədir ki, burada peşəkarlıq daim ön planda olmalıdır. Bu gün bizə peşəkar kadrlar lazımdır. Odur ki, ixtisaslı dənizçilərin hazırlanmasında keyfiyyətə üstünlük verilməlidir. Hər bir valideyn əmin olmalıdır ki, onların övladları burada peşəkar dənizçi kimi yetişəcək və yüksək məvacibli iş yerləri ilə təmin olunacaqlar”, - deyə QSC sədri vurğulayıb.
Dövlət Dəniz Administrasiyasının rəis müavini Şahlar Məmmədov öz tələbəlik illərinin xatirələrindən danışaraq, gələcək dənizçilərə uğurlar arzulayıb.
Sonra “Azərbaycan Xəzər Dəniz Gəmiçiliyi” QSC-nin sərnişin gəmilərində 2-ci mexanik işləyən Çingiz Rzayev çıxış edərək, oğlunun bu il 450 balla ADDA-nın naviqasiya fakültəsinə qəbul olunduğunu bildirib. Övladının dənizçi peşəsini seçməsindən duyduğu sevinci dilə gətirən ata tələbələr üçün yaradılan şəraitə görə QSC-nin rəhbərliyinə və akademiyanın müəllim heyətinə minnətdarlığını çatdırıb.
Yüksək balla “Dəniz naviqasiyası mühəndisliyi” ixtisasına daxil olmuş I kurs tələbəsi Ramazan ƏIiyev və akademiyanın IV kurs tələbəsi, dərs əlaçısı Cavidan Qasımlı dənizçi adına layiq olmaq üçün var qüvvə ilə çalışacaqlarını, onlara göstərilən etimadı doğruldacaqlarını bildiriblər.
Sonda 500-dən çox bal toplayaraq I kursa qəbul olunmuş tələbələrə hədiyyələr təqdim olunub.