ELM VƏ TƏHSİL
Dövlət İdarəçilik Akademiyasında növbəti qısamüddətli ixtisasartırma kursları keçirilib
Azərbaycan Respublikasının Prezidenti yanında Dövlət İdarəçilik Akademiyasında oktyabrın 13-17-də “Dövlətin sosial siyasəti: mahiyyət, prioritetlər və həyata keçirilmə mexanizmləri” və “Azərbaycan Respublikasında ailə, qadın və uşaq siyasəti” istiqamətləri üzrə qısamüddətli ixtisasartırma kursları keçirilib.
Akademiyadan AZƏRTAC-a verilən məlumata görə, kurslara dövlət hakimiyyətinin mərkəzi, şəhər, rayon miqyaslı orqanlarının, müvafiq nazirlik, komitə və idarələrinin rəhbər işçiləri cəlb olunublar.
“Dövlətin sosial siyasəti: mahiyyət, prioritetlər və həyata keçirilmə mexanizmləri” istiqaməti üzrə kursların əsas məqsədi Azərbaycanda sosial siyasət və onun əsas istiqamətləri, sığorta-pensiya sisteminin inkişaf perspektivləri, məşğulluq strategiyasının həyata keçirilməsi, məşğulluq strategiyası: mümkün hədəflər və yeni çağırışlar, əmək münasibətlərinin tənzimlənməsində başlıca hüquqi sənədlər, təhsil dövlət siyasətinin tərkib hissəsi kimi: vəzifələr, prioritetlər, perspektivlər və s. mövzularla bağlı biliklərin dinləyicilərə çatdırılması və onlarla fikir mübadiləsinin aparılması olub.
Kurslarda əmək və əhalinin sosial müdafiəsi nazirinin müavinləri İdris İsayev və Mətin Kərimli, Dövlət Sosial Müdafiə Fondunun sədri Elman Mehdiyev, Milli Məclisin sosial siyasət komitəsinin sədri Hadı Rəcəbli, DİA-nın professor-müəllim heyəti müxtəlif mövzularda mühazirələrlə çıxış ediblər.
Qeyd olunan kursla yanaşı, “Azərbaycan Respublikasında ailə, qadın və uşaq siyasəti” istiqaməti üzrə qısamüddətli ixtisasartırma kursu da keçirilib. Kursun əsas məqsədi davamlı insan inkişafının planlaşdırılması və idarə olunması, qadınların ictimai-siyasi fəallığının təmin edilməsi, onların cəmiyyətin inkişafında rolu, Azərbaycan Respublikasında Ailə Məcəlləsi: reallıqlar və perspektivlər, ailə siyasəti: mövcud problemlər, ailə, qadın və uşaq siyasətinin həyata keçirilməsində ictimai-siyasi təşkilatların rolu və s. mövzularla bağlı biliklərin dinləyicilərə çatdırılması və onlarla fikir mübadiləsinin aparılması olub.
Bu kursda DİA-nın rektoru, akademik Urxan Ələkbərov, Prezident Administrasiyasının ictimai-siyasi məsələlər şöbəsinin sektor müdiri Elman Paşayev, Ailə, Qadın və Uşaq Problemləri üzrə Dövlət Komitəsinin sədr müavinləri Sədaqət Qəhrəmanova və Aynur Sofiyeva və başqaları mühazirələr oxuyublar.
Dövlət İdarəçilik Akademiyasında kurslar üzrə dinləyicilərin buraxılış mərasimi keçirilib və kursu müvəffəqiyyətlə bitirənlərə sertifikatlar təqdim edilib.