ELM VƏ TƏHSİL
Dövlət İmtahan Mərkəzinin nəzarətçi-müəllimlər üçün təlimləri yekunlaşıb
Bakı, 3 fevral, AZƏRTAC
Dövlət İmtahan Mərkəzi (DİM) tərəfindən nəzarətçi-müəllimlər üçün keçirilən təlimlər başa çatıb.
DİM-dən AZƏRTAC-a bildiriblər ki, mərkəz tərəfindən müxtəlif ali təhsil müəssisələrinin və AMEA-nın nəzdindəki 22 elmi-tədqiqat institutunun əməkdaşları üçün son seminar‑məşğələlər keçirilib. DİM-in inzibati binasında keçirilən və mərkəzi aparatın məsul şəxsləri tərəfindən aparılan bu seminarlara 204 əməkdaş cəlb olunub.
Seminar-məşğələlərdə nəzarətçilərin imtahan prosesi ilə əyani surətdə tanış olmaları məqsədilə imtahan texnologiyasına aid film nümayiş etdirilib. İmtahan prosedurlarının daha səmərəli izahını təmin etmək üçün seminar-məşğələlər 20-25 nəfərlik qruplarla keçirilib, real imtahanda tətbiq edilən sənəd və vəsaitlərdən istifadə olunub.
Yanvarın 10-dan fevralın 1-dək keçirilmiş və respublika ərazisini əhatə edən bu prosesə 78 rayonun 1558 təhsil müəssisəsindən 4490 nəzarətçi‑müəllim qatılıb. Seminar-məşğələlərin keçirilməsinin əsas məqsədi imtahan texnologiyalarını və imtahanın gedişi üzrə qaydaları izah etmək, nəzarətçi-müəllimlərin fərdi keyfiyyətləri ilə tanışlıq, şəxsi anket məlumatlarını dəqiqləşdirmək, abituriyent auditoriyasının - imtahan zalının idarə olunmasında professionallıq baxımından mühüm məqamları qeyd etməkdir. Həmçinin imtahanın gedişində ortaya çıxan problemləri sistemləşdirərək həlli yollarını sadalamaq, nəzarətçi-müəllimlərin xüsusi hallarda operativ qərar qəbul etmək qabiliyyətlərini interaktiv üsullarla - sorğu-suallarla ortaya çıxarmaqdır.
Cari ildə keçirilən seminarlara yeni, təcrübəsi az olan və ya nəzarətçi kimi göstəriciləri qənaətbəxş sayılmayan müəllimlər dəvət ediliblər. Hazırda “Nəzarətçilərin elektron qeydiyyatı” sistemində ümumilikdə 14 min 817 nəzarətçi-müəllim haqqında məlumat var. Təlimlərə qatılmayan digər müəllimlər isə təyin olunduqları imtahandan bir neçə gün əvvəl seminar-məşğələlərə cəlb ediləcəklər. Təlimlərdə iştirak edən müəllimlər DİM tərəfindən keçiriləcək sınaq imtahanlarında nəzarətçi kimi dəvət olunacaqlar. Bu da onların seminarlarda qazandıqları nəzəri biliklərin təcrübədə tətbiqinə kömək edəcək. Sınaq imtahanlarında nəzarətçi kimi özünü doğruldan müəllimlər digər imtahanlara da cəlb olunacaqlar.