QAN YADDAŞI
Dövlət İqtisad Universiteti şəhidlərini ehtiramla yad edib
Bakı, 19 yanvar, AZƏRTAC
Azərbaycan Dövlət İqtisad Universitetində (UNEC) 20 Yanvar hadisələrinin 27 illiyinə həsr edilən tədbir keçirilib.
UNEC-dən AZƏRTAC-a bildirilib ki, universitetin şəhid məzun və tələbələrinin xatirəsinə ucaldılan memorial abidənin önündə təşkil edilən tədbirdə müəllimlər və şəhid ailələri iştirak ediblər.
Tədbir iştirakçıları memorial abidənin önünə gül dəstələri düzərək şəhidlərin əziz xatirəsini bir dəqiqəlik sükutla yad ediblər.
UNEC-in rektoru, professor Ədalət Muradov 20 Yanvar faciəsinin başvermə səbəblərindən danışıb, 27 il əvvəl törədilən qətliamın insanlığa qarşı qatı cinayət olduğunu, yaddaşlara Qara Yanvar gecəsi kimi həkk olunan bu tarixin həm şəhidlərin anım günü, həm də Azərbaycanın ərazi bütövlüyü uğrunda mübarizə aparan xalqımızın birlik, fəxr və şərəf günü sayıldığını vurğulayıb. Şəhid tələbələrin hər zaman qürur mənbəyi olduqlarını deyən rektor, UNEC-də onların adının daim hörmət və ehtiramla xatırlandığını bildirib.
Ə.Muradov 20 Yanvar hadisələrinə siyasi-hüquqi qiymət verilməsi barədə də danışıb. Qeyd edilib ki, bu hadisələrə dövlət səviyyəsində lazımi siyasi-hüquqi qiymət yalnız ümummilli lider Heydər Əliyevin hakimiyyətə gəlişindən sonra verilib. Ulu öndər həyatını təhlükə qarşısında qoyaraq, Azərbaycanın Moskvadakı daimi nümayəndəliyinə gəlib qanlı faciənin təşkilatçılarını dünya ictimaiyyəti qarşısında qəzəblə qınayıb, ifşaedici və cəsarətli bəyanat verib. Daha sonra Ümummilli Liderin təşəbbüsü ilə Naxçıvan Muxtar Respublikasının Ali Məclisi 20 Yanvar faciəsinə ilk dəfə siyasi qiymət verib.
Etimad Əzizov qardaşı - UNEC-in şəhid tələbəsi Habil Əzizov ilə bağlı xatirələrini bölüşüb.
Tədbirdə digər çıxış edənlər şəhid ailələrinə olan dövlət dəstəyindən söz açıblar.