CƏMİYYƏT


Dövlət Miqrasiya Xidməti əcnəbi işçi heyətinin milli kadrlarla əvəzlənməsi məsələsinə nəzarəti gücləndirib

Bakı, 24 may, AZƏRTAC 

Mayın 24-də Xəzər-Avropa İnteqrasiya İşgüzar Klubu Dövlət Miqrasiya Xidmətinin (DMX) rəisi Firudin Nəbiyev ilə Klubun üzvlərinin görüşünü və biznes-forum təşkil edib. Tədbir çərçivəsində Xəzər Enerji Forumunun miqrasiya məsələlərinə həsr olunmuş xüsusi sessiyası keçirilib.

AZƏRTAC xəbər verir ki, tədbirdə çıxış edən F.Nəbiyev DMX-nin fəaliyyəti barədə məlumat verib. Bildirib ki, DMX biznes sektoru ilə fəal dialoq qurur, sahibkarları narahat edən məsələləri təhlil edərək hökumət qarşısında qaldırır və zərurət yarandığı halda qanunvericiliyə dəyişikliklər olunması üçün təkliflər verir.

Diqqətə çatdırıb ki, daxili əmək bazarının qorunması kimi mühüm missiyanı yerinə yetirən DMX əcnəbi işçi qüvvəsindən istifadənin qanuna müvafiq olaraq, tənzimlənməsi istiqamətində ardıcıl tədbir həyata keçirir. Xidmət Azərbaycanın inkişafından ilk növbədə ölkə vətəndaşlarının bəhrələnməsinin təmin olunması ilə bağlı Prezident İlham Əliyevin tapşırıqlarına uyğun olaraq, əcnəbilərin haqqı ödənilən əmək fəaliyyətinə yalnız müəyyənləşdirilmiş kvota çərçivəsində cəlb edilməsinə dövlət nəzarətini uğurla həyata keçirir. Əmək miqrasiyası kvotası hər il növbəti ilin başlanmasına üç ay qalmış Nazirlər Kabineti tərəfindən təsdiq edilir.

Bildirilib ki, miqrasiya sahəsində dövlət siyasətini, o cümlədən miqrasiya proseslərinə dövlət nəzarətini həyata keçirən DMX-nin iştirakı ilə 2013-cü ildə imzalanmış neft-qaz layihələrində milliləşdirilmə sahəsində əməkdaşlığa dair protokola uyğun olaraq, əcnəbi işçi heyətin mərhələlərlə milli kadrlarla əvəzlənməsi məsələlərinə nəzarət gücləndirilib. İşəgötürənlər tərəfindən işçi qüvvəsinə olan tələbatın ödənilməsi üçün yerli əmək ehtiyatlarından daha geniş və səmərəli istifadə olunmasına şərait yaradılmalıdır.

DMX əcnəbi işçilərin Azərbaycanda işə cəlb olunması məsələsinə diqqətlə yanaşır. Xidmətin marağındadır ki, ilk növbədə Azərbaycan vətəndaşları işlə təmin olunsunlar. Azərbaycanda əcnəbi işçilərin işə cəlb olunması kvota əsasında həyata keçirilir, bununla bağlı qanun 2016-cı ildə təsdiqlənib. Əcnəbilər üçün ayrılan kvotada ildən-ilə azalma müşahidə olunur. Bu, Azərbaycanda yüksək səviyyəli mütəxəssislərin olması və ölkəmizdə fəaliyyət göstərən şirkətlərin bəzi kadrların hazırlanmasına önəm verməsi ilə bağlıdır.

F.Nəbiyev qeyd edib ki, Prezident İlham Əliyevin rəhbərliyi ilə ölkəmizdə özəl sektora və sahibkarlığın inkişafına dövlət dəstəyinin gücləndirildiyi, əlverişli biznes və investisiya mühitinin formalaşdığı vaxtda DMX də qanunvericiliyin tələblərinə uyğun olaraq, səlahiyyətləri çərçivəsində sahibkarlarla əməkdaşlıq əlaqələrinin daha da möhkəmləndirilməsinin tərəfdarıdır. Bununla bağlı Xidmət tərəfindən hər zaman özəl və biznes sektora diqqət göstərilir, Xidmət rəhbərliyinin iştirakı ilə sahibkarlarla çoxsaylı görüşlər keçirilir, onları maraqlandıran məsələlərin mümkün qədər tez həlli üçün qanunauyğun iş aparılır. Bununla belə, sahibkarlıq fəaliyyəti göstərən fiziki və hüquqi şəxslərin şikayətlərinə baxılması sahəsində şəffaflığın və obyektivliyin təmin edilməsi, bu sahədə şəxslərin hüquqlarının və qanunla qorunan maraqlarının müdafiəsi məqsədilə Azərbaycan Prezidentinin 2016-cı il 3 fevral tarixli Fərmanına uyğun olaraq, Dövlət Miqrasiya Xidmətinin Apellyasiya Şurası və Şuranın Katibliyi yaradılıb. Təqdirəlayiq haldır ki, sahibkarlıq fəaliyyəti göstərən fiziki və hüquqi şəxslərdən Xidmətə hər hansı şikayət daxil olmayıb.

DMX rəisi məlumat verib ki, hazırda Azərbaycanın Miqrasiya Məcəlləsinə uyğun olaraq, ölkədə sahibkarlıq fəaliyyəti ilə məşğul olma, xarici hüquqi şəxsin Azərbaycan Respublikasındakı filial və nümayəndəliyinin rəhbəri və onun müavini vəzifəsini, o cümlədən Azərbaycan Respublikasında təsis edilmiş, təsisçisi və ya təsisçilərdən ən azı biri xarici hüquqi və ya fiziki şəxs olan hüquqi şəxsin rəhbəri və onun müavini vəzifəsini tutması əsası ilə Azərbaycanın ərazisində müvəqqəti yaşamaq üçün icazə verilməsi barədə Xidmətə müraciətlər daxil olur. Bu müraciətlərin araşdırılması zamanı müvafiq əsasın olmadığı və bəzi hallarda qanunsuz miqrasiya hallarına rast gəlinir. Bu kimi hallar təəssüf doğurur. Sahibkarlar dövlətimizin başçısının onlara diqqət və qayğısına adekvat münasibət göstərməli, qanunlara riayət etməlidirlər.

“Ölkəmizə gələn xarici vətəndaşların sayının günbəgün artması Azərbaycanın sürətli iqtisadi inkişafı, ölkəmizdə insan hüquqlarının qorunması istiqamətində görülən işlər, siyasi sabitlik və geosiyasi mövqeyimizlə bağlıdır. Azərbaycanda mötəbər tədbirlərin keçirilməsi bir daha göstərir ki, ölkəmizdə miqrasiya məsələlərinin tənzimlənməsinə yüksək səviyyədə yanaşılır. Respublikamızda etnik, dini, milli mənsubiyyətindən asılı olmayaraq, hər bir əcnəbiyə ölkə vətəndaşları ilə eyni münasibət göstərilir. Eyni zamanda, “ASAN Viza” sistemi tətbiq olunandan sonra Azərbaycana gələn xarici vətəndaşların sayı artıb. Bu, onu göstərir ki, dövlət tərəfindən xarici vətəndaşların ölkəmizə turist kimi gəlməsinə əhəmiyyət verilir”, - deyə F.Nəbiyev vurğulayıb.

Xidmət rəisi deyib ki, DMX-nin elektron xidmətləri istifadəyə verilib. Burada müraciətlərin elektron formada qəbulu həyata keçirilir. Vahid Miqrasiya Məlumat Sistemi vasitəsilə biz miqrantı ölkəyə gəldiyi andan çıxanadək nəzarətdə saxlaya bilirik. Bununla yanaşı, DMX “ASAN xidmət” mərkəzlərində də bir sıra xidmətlər həyata keçirir.

Görüşdə biznes forum iştirakçılarının mövzu ilə bağlı təklifləri, eləcə də Xəzər-Avropa İnteqrasiya İşgüzar Klubuna üzv şirkətləri maraqlandıran məsələlər müzakirə olunub. Biznes forum çərçivəsində şirkətlər Azərbaycanın miqrasiya siyasəti ilə bağlı onları maraqlandıran suallara cavab tapıb, təkliflər irəli sürüblər.

Xəzər-Avropa İnteqrasiya İşgüzar Klubu sədrinin birinci müavini və baş icraçı direktoru Telman Əliyev görüşə, o cümlədən klubun üzvləri tərəfindən səsləndirilən təkliflərə göstərilən diqqətə görə F.Nəbiyevə minnətdarlığını bildirib. T.Əliyev Klubun 2002-ci ilin iyununda Xəzər-Qara dəniz regionunda fəaliyyət göstərən nəhəng neft-qaz şirkətlərinin dəstəyi ilə yaradıldığını və onun sədrinin Prezident İlham Əliyev olduğunu xüsusi vurğulayıb. Bildirib ki, təsis olunduğu ilk gündən Xəzər-Avropa İnteqrasiya İşgüzar Klubu neft sahəsindən əldə olunan gəlirlərin qeyri-neft sektorunun inkişafına cəlb olunmasına kömək edir. Sıralarında 5 mindən çox şirkət və təşkilatı birləşdirən Klub dünyanın 50 ölkəsində fəaliyyət göstərir və dövlət qurumları ilə özəl sektor arasında dialoqa dəstək istiqamətində fəal iş aparır.

Tədbirdə F.Nəbiyevə Xəzər-Avropa İnteqrasiya İşgüzar Klubunun fəxri üzvlük sertifikatı təqdim olunub.

Biznes forumda şirkət rəhbərləri, diplomatik korpusun nümayəndələri iştirak ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.