CƏMİYYƏT
Dövlət Miqrasiya Xidmətinə əcnəbilər və vətəndaşlığı olmayan şəxslər tərəfindən 9512 müraciət daxil olub
Bakı, 15 dekabr, AZƏRTAC
Azərbaycan Respublikasının Dövlət Miqrasiya Xidməti (DMX) tərəfindən 2016-cı ilin noyabr ayı ərzində miqrasiya sahəsində dövlət siyasətinin həyata keçirilməsi, miqrasiya proseslərinə dövlət nəzarətinin gücləndirilməsi, idarə edilməsi və tənzimlənməsi, o cümlədən qanunsuz miqrasiyanın qarşısının alınması istiqamətində müvafiq tədbirlər həyata keçirilib.
DMX-dən AZƏRTAC-a bildiriblər ki, ay ərzində 1855 əcnəbi tərəfindən Azərbaycan Respublikasında olma, habelə müvəqqəti və daimi yaşama qaydalarına əməl etmədən inzibati qanunvericiliyin tələblərinin pozulması halları müəyyən edilib. Onlardan 17-nin Azərbaycan Respublikası ərazisində müvəqqəti və ya daimi yaşamaq üçün əsas verən sənədləri itirildiyindən yenisi ilə əvəz olunub, 190 nəfərin ölkə ərazisində yaşamaları leqallaşdırılıb, 1260 əcnəbinin Azərbaycan Respublikası ərazisini 48 saat ərzində tərk etmələri, 388 əcnəbinin isə inzibati qaydada ölkə hüdudlarından kənara çıxarılmaları barədə qərarlar qəbul edilib.
Ümumiyyətlə, ay ərzində Azərbaycan Respublikasının Dövlət Miqrasiya Xidmətinə əcnəbilər və vətəndaşlığı olmayan şəxslər tərəfindən ölkədə müvəqqəti olma müddətlərinin uzadılması, müvəqqəti və daimi yaşamaq üçün icazələrin verilməsi, vətəndaşlığa qəbul, xitam, bərpa, eləcə də vətəndaşlıq mənsubiyyətinin və qaçqın statusunun müəyyənləşdirilməsi, həmçinin əmək fəaliyyətinin həyata keçirilməsi üçün iş icazələrinin verilməsi və mövcud iş icazələrinin müddətlərinin uzadılması ilə bağlı 9512 müraciət daxil olub. Müraciətlərin hər biri ayrı-ayrılıqda Azərbaycan Respublikası qanunvericiliyinin tələblərinə uyğun olaraq araşdırılıb və müvafiq qərarlar qəbul edilib.
Ötən ay ərzində olduğu yer üzrə qeydiyyatla bağlı 45709 əcnəbinin müraciəti qeydə alınıb.
Dövlət Miqrasiya Xidməti tərəfindən ay ərzində respublikanın ayrı-ayrı bölgələrində 4 maarifləndirmə tədbiri keçirilib, o cümlədən 80 şəxsə səyyar xidmət göstərilib. Qanunsuz miqrasiyaya qarşı DMX tərəfindən keçirilmiş tədbirlər zamanı İraq vətəndaşı Ahmad Abdulhaq İsmael saxlanılıb.
Araşdırma zamanı Ahmad Abdulhaq İsmaelin İraq vətəndaşlarının təhsil adı altında xarici ölkələrə göndərilmələrini təşkil etdiyi məlum olub. Belə ki, Ahmad Abdulhaq İsmael İraqın Kərkük şəhərində fəaliyyət göstərən “Karkuk Center for Education Services” şirkətinə rəhbərlik etdiyi dövr ərzində İraq vətəndaşlarının təhsil məqsədilə İordaniya, Rusiya, Ukrayna, Malayziya, Hindistan kimi ölkələrə göndərilmələrini təşkil edib. 2016-cı ildən başlayaraq Ahmad Abdulhaq İsmael öz həmvətənlərini aldadaraq Azərbaycana göndərilməsini təşkil etməyə başlayıb. Ahmad Abdulhaq İsmael ölkəmizdə fəaliyyət göstərən ali təhsil müəssisələrində təhsil almaq adı altında 30 İraq vətəndaşının müəyyən məbləğdə ödəniş qarşılığında Azərbaycana gətirilməsini təşkil edib və onları müxtəlif ünvanlarda yerləşdirib. Lakin həmin əcnəbilərin burada ali təhsil müəssisələrinə qəbul edilmələri üçün zəruri prosedurları yerinə yetirməyib və həmvətənlərindən dələduzluq yolu ilə aldığı küllü miqdarda vəsaiti mənimsəyib.
Aşkar edilmiş faktlarla bağlı Ahmad Abdulhaq İsmaelin müvafiq məsuliyyətə cəlb edilməsi istiqamətində tədbirlər görülür.
Dövlət Miqrasiya Xidməti tərəfindən qanunsuz miqrasiyaya qarşı mübarizə çərçivəsində tədbirlər davam etdirilir.