CƏMİYYƏT
Dövlət Qulluğu Məsələləri üzrə Komissiya 2014-cü il üzrə hesabatını təqdim edib
Bakı, 27 fevral, Aidə Quluzadə, AZƏRTAC
Fevralın 27-də Beynəlxalq Mətbuat Mərkəzində Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın 2014-cü il üzrə fəaliyyəti və dövlət orqanlarında etik davranış qaydalarına əməl edilməsinin vəziyyəti barədə illik hesabatı mövzusunda “dəyirmi masa” keçirilib.
AZƏRTAC xəbər verir ki, tədbirdə çıxış edən Komissiyanın sədr müavini Vəfadar Misirov bildirib ki, hesabat dövründə Komissiya tərəfindən dövlət qulluğuna qəbulda neqativ halların qarşısı alınıb və bu, qurumun fəaliyyəti dövründə ən böyük nailiyyətlərdən biri olub. Dövlət qulluğuna qəbulla bağlı keçirilən test imtahanı və müsahibə mərhələsində Komissiyanın tətbiq etdiyi yeniliklərdən danışan sədr müavini keçirilən müsabiqə və müsahibələr nəticəsində 4786 nəfərin vakant dövlət qulluğu vəzifəsinə təyin olunduğunu deyib.
Komissiyanın dövlət orqanları ilə sıx əməkdaşlığından danışan V.Misirov onların böyük əksəriyyətinin öz fəaliyyətlərində dövlət qulluğuna dair qanunvericiliyin tələblərinə riayət etdiyini bildirib. “Lakin bəzi dövlət orqanları tərəfindən qanunvericiliyin tələblərinin pozulması faktları da aşkarlanıb”, - deyə o, əlavə edib.
Məlumat verilib ki, mərkəzi icra hakimiyyəti orqanları tərəfindən etik davranış qaydalarının pozulması ilə bağlı dövlət qulluqçularına tətbiq edilmiş 253 intizam tənbeh tədbirinin təhlili zamanı müəyyən olunub ki, Əmək və Əhalinin Sosial Müdafiəsi Nazirliyi üzrə 125, Dövlət Sosial Müdafiə Fondu üzrə 32, Ekologiya və Təbii Sərvətlər Nazirliyi üzrə 26, Təhsil Nazirliyi üzrə 14, Maliyyə Nazirliyi üzrə 13, İqtisadiyyat və Sənaye Nazirliyi üzrə 13, Energetika Nazirliyi üzrə 13, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi üzrə 4, Dövlət Statistika Komitəsi üzrə 4, Milli Televiziya və Radio Şurası üzrə 2, Müəllif Hüquqları Agentliyi üzrə 2 dövlət qulluqçusuna intizam tənbeh tədbiri tətbiq edilib.
Mərkəzi icra hakimiyyəti orqanlarında tətbiq edilmiş 253 intizam tənbeh tədbirindən 234-ü töhmət, 10-u vəzifə maaşının azaldılması, 4-ü daha aşağı vəzifəyə keçirilmə, 5-i dövlət qulluğundan azad edilmə olub.
Komissiyanın insan resurslarının idarə edilməsi və dövlət qulluğuna kadrların seçilməsi şöbəsinin müdiri Afaq Hüseyn deyib ki, 2007-2014-cü illər ərzində Komissiya tərəfindən dövlət qulluğuna qəbulla bağlı keçirilən müsabiqə və müsahibələrə ümumilikdə 153 dövlət orqanı üzrə 13387 vakant dövlət qulluğu vəzifəsi çıxarılıb. Müsabiqə və müsahibələrdə 58527 namizəd iştirak edib, onlardan 5485 nəfəri vakant vəzifələrə uyğun hesab edilib, 4786 nəfəri isə müvafiq vəzifələrə təyin olunub.
Komissiyanın hüquq şöbəsinin müdiri Vüqar Əsgərov dövlət qulluqçularının etik davranış qaydalarına nəzarət və etik məsələlər üzrə maarifləndirmə sahəsində görülən işlərdən danışıb. Bildirilib ki, etik davranış qaydalarının pozulması ilə bağlı Komissiyaya daxil olan 34 şikayət ərizəsi araşdırılıb və qanunvericiliyin tələblərini pozan dövlət orqanları tərəfindən 343 dövlət qulluqçusu barədə intizam tənbeh tədbiri tətbiq edilib. Onlardan 319 nəfərə töhmət verilib, 10 nəfər dövlət qulluğundan azad edilib, 10 nəfərin vəzifə maaşı azaldılıb, 4 nəfər aşağı vəzifəyə keçirilib.