İQTİSADİYYAT
Dövlət Sosial Müdafiə Fondunun gəlirlərində artım müşahidə olunmuşdur
Bakı, 22 may (AZƏRTAC). Cari ilin yanvar-aprel aylarında Dövlət Sosial Müdafiə Fondunun (DSMF) gəlirləri 874,6 milyon manat təşkil etmişdir ki, bu da cari ilin proqnoz göstəricisindən 22,6 milyon manat və ya 2,7 faiz çoxdur.
DSMF-dən AZƏRTAC-a bildirmişlər ki, hesabat dövründə məcburi dövlət sosial sığorta haqları üzrə daxilolmalar proqnozdan 22,7 milyon manat və ya 5,1 faiz çox olmaqla 463,8 milyon manat təşkil etmişdir. Bu da 2012-ci ilin müvafiq dövrünə nisbətən 13,9 faiz və ya 56,7 milyon manat çoxdur.
Məcburi dövlət sosial sığorta haqları üzrə daxilolmaların 63,8 faizi və ya 295,9 milyon manatı qeyri-büdcə sektorunun payına düşür. Həmin sektorun ödədiyi məcburi dövlət sosial sığorta haqlarının məbləği proqnoza nisbətən 54,8 milyon manat və ya 22,7 faiz, əvvəlki ilin müvafiq dövrünə nisbətən isə 21,1 faiz və ya 51,5 milyon manat çox olmuşdur.
Cari ildə sahibkarlıq fəaliyyəti ilə məşğul olan fiziki şəxslərin və torpaq pay mülkiyyətçilərinin sosial sığortaya cəlb edilməsinə nəzarət gücləndirilmişdir. Nəticədə, əvvəlki ilin müvafiq dövrü ilə müqayisədə sahibkarlıq fəaliyyəti ilə məşğul olan fiziki şəxslərdən daxilolmalar 50,9 faiz, torpaq pay mülkiyyətçilərindən daxilolmalar isə 85,4 faiz artmışdır.
Hesabat dövründə büdcədən maliyyələşən təşkilatlar üzrə daxilolmalar 167,9 milyon manat təşkil etmişdir. Həmin təşkilatların ödədiyi məcburi dövlət sosial sığorta haqları əvvəlki ilin müvafiq dövrünə nisbətən 3,2 faiz və ya 5,1 milyon manat artmış, proqnoz 84 faiz icra olunmuşdur.
Sair gəlirlər (sanatoriya-kurort yollayışlarının qismən dəyərinin ödənilməsi və s.) üzrə daxilolmalar 1,5 milyon manat təşkil etmişdir. Dövlət büdcəsindən 409,2 milyon manat məbləğində transfert Fondun xəzinə hesabına köçürülmüşdür.
Daxilolmaların səviyyəsi pensiya və müavinətlərin vaxtında maliyyələşdirilməsinə imkan vermişdir.
Cari ilin ilk dörd ayında DSMF-nin xərcləri 821,9 milyon manat olmuşdur. Pensiya və müavinətlərin maliyyələşdirilməsi üçün Fond tərəfindən 808,1 milyon manat vəsait yönəldilmişdir ki, bu da əvvəlki ilin müvafiq dövrünə nisbətən 39,1 milyon manat və ya 5,1 faiz çoxdur. Pensiya xərcləri 2012-ci ilin müvafiq dövrünə nisbətən 5 faiz və ya 37,7 milyon manat artaraq 789,5 milyon manat təşkil etmişdir.
Azərbaycan Respublikası Prezidentinin müvafiq sərəncamına əsasən 2013-cü ilin yanvarın 1-dən bütün növ əmək pensiyalarının sığorta hissəsinə 1,1 faizlik artım tətbiq olunmuşdur.
Cari ilin yanvar-aprel aylarında əhaliyə 18,7 milyon manat məbləğində müavinət ödənilmişdir ki, bunun da 30,7 faizi hamiləliyə və doğuma görə, 29,3 faizi əmək qabiliyyətinin müvəqqəti itirilməsinə görə, 16,6 faizi dəfn üçün, 23,5 faizi isə digər müavinətlərin payına düşür.
DSMF-nin digər xərcləri 13,8 milyon manat (o cümlədən DSMF-nin aparatının və yerli orqanlarının saxlanılmasına 5,4 milyon manat, pensiya və müavinətlərin əhaliyə çatdırılması, bank əməliyyatlarının aparılması üzrə xidmət haqqı xərclərinə 3,3 milyon manat, Azərbaycan Həmkarlar İttifaqları Konfederasiyası vasitəsilə maliyyələşdirilən xərclərə 4,8 milyon manat) təşkil etmişdir ki, bu da 2012-ci ilin müvafiq dövrünün göstəricisindən 1,5 milyon manat və ya 12,3 faiz çoxdur.