Bakı, 6 dekabr, AZƏRTAC

Əmlak Məsələləri Dövlət Komitəsi (ƏMDK) tərəfindən keçirilən intensiv açıq hərraclar vasitəsilə dövlət əmlaklarının özəlləşdirilməsi ölkəyə investisiya cəlb olunması və qeyri-neft sektorunun inkişafı baxımından mühüm əhəmiyyət daşıyır. Hər dəfə hərraclara fərqli təyinata, iqtisadi sahəyə, investisiya paketinə və ölçülərə malik müxtəlif əmlaklar çıxarılır. Əmlakların coğrafiyası da genişdir. Belə ki, paytaxtdan tutmuş respublikanın müxtəlif şəhər və rayonlarınadək müxtəlif növ daşınmaz dövlət əmlakları hərrac vasitəsilə potensial investorlara təklif olunur.

Komitədən AZƏRTAC-a bildirilib ki, dekabrın 6-da təşkil olunun növbəti belə hərracda 5 kiçik dövlət müəssisə və obyekti, 2 istifadəsiz qeyri-yaşayış sahəsi və 5 nəqliyyat vasitəsi özəlləşdirilib.

Hazırda Özəlləşdirmə portalına (privatization.az) daxil olaraq əmlakı seçib sifariş verməklə çox rahat şəkildə hərraca qatılmaq olur. Portalda hərraca çıxarılan hər bir əmlakın coğrafi yerləşməsi, vəziyyəti barədə fotoşəkillər və digər zəruri informasiyalarla tanış olmaq mümkündür. Hərracların elanı, gedişatı və nəticələri barədə aktiv ictimai məlumatlandırma komitənin saytı, Özəlləşdirmə portalı, eləcə də “facebook” sosial şəbəkəsindəki rəsmi səhifə və yeni yaradılmış “privatization.az” səhifəsi vasitəsilə həyata keçirilir. Bu “facebook” səhifəsi sosial şəbəkə vasitəsilə izləyiciləri məhz hərraclar barədə intensiv məlumatlandırmaq üçün yaradılıb. Səhifədə hər bir hərrac tarixi üçün özəlləşdirilməyə çıxarılan kiçik müəssisə, qeyri-yaşayış sahəsi və nəqliyyat vasitəsi barədə detallı paylaşımlar edilir və əmlaka sifariş qaydası göstərilir.

Hərracı müşahidə etmək üçün də heç bir məhdudiyyət yoxdur. Yəni istənilən vətəndaş və ya media nümayəndəsi hərrac günü komitənin İnformasiya Texnologiyaları Mərkəzinə (Bakı, Heydər Əliyev pr., 139A) gəlib hərrac prosesini izləyə bilər.

Budəfəki hərracda özəlləşdirilmiş 2 kiçik müəssisə və 2 istifadəsiz qeyri-yaşayış sahəsi paytaxtda, digər 3 kiçik müəssisə və obyekt isə Şirvan, Sabirabad və Saatlıda yerləşir. Hərracda ən yüksək qiymətə satılan daşınmaz əmlak paytaxtın Nizami rayonunda yerləşən qeyri-yaşayış sahəsi olub. Belə ki, bu əmlak 180 min manata özəlləşdirilib. Yüksək qiymətə satılmış növbəti əmlak 74 min 800 manata özəlləşdirilən “Vüqar” şadlıq evi olub. Həmin əmlak paytaxtın Suraxanı rayonu, Qaraçuxur qəsəbəsində yerləşir. Nizami rayonunda yerləşən digər qeyri-yaşayış sahəsi isə 55 min manata özəlləşdirilib.

Qeyd edək ki, tamamilə şəffaf, rahat və ictimaiyyətin bütün təbəqələrinə açıq şəraitdə keçirilən belə hərraclar əmlak sahibi olmaq istəyən hər bir vətəndaş üçün böyük imkandır. Çünki hərraca çıxarılan dövlət əmlakları çoxçeşidlidir və investorların maraqlarına uyğundur. Nəhəng müəssisələrdən, səhmdar cəmiyyətlərdən tutmuş kiçik obyektlərə və nəqliyyat vasitələrinə kimi müxtəlif əmlaklar potensial alıcılara təqdim olunur. Vətəndaşların hərraclarda özəlləşdirdikləri belə əmlaklar iqtisadi baxımdan onlar üçün mənfəət mənbəyidir. Əmlaka yiyələnən istənilən vətəndaş sonradan onu biznes predmetinə çevirə, icarəyə verə və ya digər qanunla icazə verilən məqsədlər üçün istifadə edə bilər.

Ümumiyyətlə, yeni başlanılan bu özəlləşdirmə prosesi ölkədə iri və orta portfelli sahibkarlığın inkişafına dəstək verir. Eləcə də, müxtəlif iqtisadi sahələrdə, o cümlədən pambıqçılıq, quşçuluq, tikinti, nəqliyyat, xidmət və sair sahələrin canlanmasına və inkişafına təkan olur. Belə müəssisələr və obyektlərdə fəaliyyət yenidən daha müasir şərtlərlə bərpa edilir və bununla da iqtisadi aktivliyə və yeni iş yerlərinin yaradılmasına səbəb olur.

Komitə tərəfindən növbəti hərrac dekabrın 13-də keçiriləcək. Hərraca çıxarılan 101 əmlakdan 23-ü səhmdar cəmiyyəti, 43-ü kiçik dövlət müəssisə və obyekti, 19-u istifadəsiz qeyri-yaşayış sahəsi və 16-sı nəqliyyat vasitəsidir. Həmin hərracdakı əmlaklarla http://www.privatization.az/index.php/az/component/content/article?layout=edit&id=916 linkində tanış olmaq olar.