SİYASƏT


Dövlət müstəqilliyinin bəhrələri
Culfa rayonunun Gülüstan kəndində kompleks quruculuq işləri aparılıb

A+ A

Culfa, 13 oktyabr, AZƏRTAC

Bu il xalqımız dövlət müstəqilliyinin 25-ci ildönümünü qeyd edir. Müstəqillik illərində Naxçıvan Muxtar Respublikası ulu öndər Heydər Əliyevin siyasi xəttinin davam etdirilməsi nəticəsində sürətlə inkişaf edib, müasir görkəm alıb. Muxtar respublikanın kompleks abadlaşan yaşayış məntəqələrindən biri də Culfa rayonunun Gülüstan kəndidir. İnsanlar hələ qədim zamanlardan bu kənddə məskunlaşıb, tarixin müxtəlif dövrlərində kənd inkişaf edərək ticarət və sənətkarlıq mərkəzi kimi şöhrət qazanıb. Tarixi abidələri, qədim yaşayış yerləri, təbii sərvətləri ilə yanaşı, bu gün Gülüstan kəndi həm də müasir inkişafı ilə diqqəti cəlb edir. Bu il kənddə geniş quruculuq işləri aparılıb, yeni sosial obyektlər inşa olunub.

Naxçıvan-Ordubad magistralı - Culfa şəhər və Gülüstan kənd

 avtomobil yolu yenidən qurulub

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, Culfa rayonunda aparılan abadlıq-quruculuq işləri yol infrastrukturunu da əhatə edib. Bu sahədə həyata keçirilən tədbirlərin davamı olaraq oktyabrın 13-də Naxçıvan-Ordubad magistralı - Culfa şəhər və Gülüstan kənd avtomobil yolu yenidənqurma işlərindən sonra istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov yolun açılışını bildirən lenti kəsib, sakinləri təbrik edərək deyib: Culfa şəhərinin giriş avtomobil yolunun və Gülüstan kənd yolunun yenidən qurularaq istifadəyə verilməsi mühüm əhəmiyyət daşıyır. Çünki Culfa şəhərinin abadlığı, inkişafı haqqında ilk təəssürat şəhərin giriş yolundan yaranır. Ona görə də yol yenidən quruldu, ətrafda abadlıq işləri aparıldı.

Sonra Ali Məclisin Sədri yolda görülən yenidənqurma işləri ilə maraqlanıb.

Məlumat verilib ki, uzunluğu 11 kilometr olan Naxçıvan-Ordubad magistralı - Culfa şəhər və Gülüstan kənd avtomobil yolu, dəmiryolun üzərindən keçən 65 paqonmetrlik körpü əsaslı şəkildə yenidən qurulub. Yol yatağı genişləndirilərək 10 metrə çatdırılıb, yola asfalt örtük döşənib, 2150 metr məsafədə piyada yolu salınıb, işıqlandırma sistemi quraşdırılıb, 38 su keçidi qoyulub, 520 metrlik beton kanal çəkilib.

Ali Məclisin Sədri yol kənarlarında yaşıllıqların salınması barədə tapşırıqlar verib.

Gülüstan kəndində yeni məktəb binası 

istifadəyə verilib

Muxtar respublikada təhsilin inkişafına hərtərəfli qayğı göstərilir. Hər il onlarla yeni məktəb binası tikilərək və ya əsaslı şəkildə yenidən qurularaq müəllim və şagirdlərin istifadəsinə verilir.

Oktyabrın 13-də Gülüstan kənd tam orta məktəbinin açılışı olub.

Naxçıvan Muxtar Respublikası Ali Məclisinin Sədri Vasif Talıbov açılış tədbirində iştirak edib.

Məktəbin direktoru Bəhrəm İsmayılov çıxış edərək deyib ki, muxtar respublikamızda bütün sahələr kimi, təhsil quruculuğu da diqqətdə saxlanılır. Bunun bariz nümunələrindən biri də bu gün açılışına toplaşdığımız Gülüstan kənd tam orta məktəbidir. Məktəbdə yaradılan şərait kollektiv qarşısında mühüm vəzifələr qoyur. Bu vəzifələri dərindən dərk edən pedaqoji heyət vətənpərvər gənclərin yetişdirilməsi yolunda səylə çalışacaq.

Naxçıvan Muxtar Respublikası Ali Məclisinin Sədri Vasif Talıbov Gülüstan kənd tam orta məktəbinin yeni binasının istifadəyə verilməsi münasibətilə kollektivi təbrik edərək deyib: Təhsil hər bir ölkənin gələcəyidir. Təhsilə qoyulan sərmayə ölkənin gələcəyinə qoyulan sərmayədir. Bu amili əsas götürən ümummilli liderimiz Heydər Əliyev deyirdi ki, “Bizim təhsil sistemimiz müstəqil Azərbaycanın gələcək inkişafını təmin etməlidir”.

Ali Məclisin Sədri deyib: Ölkəmizin gələcək təminatçıları məktəblərdə hazırlanır. Bu işdə müəllimlərin üzərinə mühüm vəzifələr düşür. Ona görə də müəllimlər üzərlərinə düşən məsuliyyəti dərk etməli, məktəblərdə təhsilli, vətənpərvər və fiziki cəhətdən sağlam gənc nəsil yetişdirilməlidir. Bunun üçün, ilk növbədə müəllimlər ixtisaslarını təkmilləşdirməli, müasir tədris metodlarını mənimsəməli, müəllim-şagird münasibətləri qarşılıqlı hörmət və tələbkarlıq əsasında qurulmalıdır. Gənclər isə yaxşı təhsil almalı, peşə öyrənməli, özlərini gələcəyə hazırlamalıdırlar. Bu gün istifadəyə verilən Gülüstan kənd tam orta məktəbində bu vəzifələrin yerinə yetirilməsi üçün hərtərəfli şərait yaradılmışdır. Məktəbin nailiyyətləri onu deməyə əsas verir ki, məktəbdə tələbkarlıq var, tədrisin səviyyəsi yüksəkdir. Ali məktəblərə qəbulda Gülüstan kənd tam orta məktəbinin məzunlarının göstəriciləri kəmiyyət və keyfiyyət baxımından qənaətləndiricidir.

Qazanılan nailiyyətlərə görə kollektivə təşəkkür edən Ali Məclisin Sədri deyib ki, məktəbin yetirmələri Azərbaycanın gələcək inkişafına, müstəqilliyimizin möhkəmlənməsinə öz töhfələrini verəcəklər. Bu gün Azərbaycanda təhsil prioritet sahədir. Dövlətimiz yeni məktəb binaları tikməklə, müasir tədris şəraiti yaratmaqla, müəllimlər isə yaradılan şəraitdən səmərəli istifadə edərək təhsilli və vətənpərvər gənclər yetişdirməklə ölkəmizin gələcək inkişafına təminat verirlər.

Ali Məclisin Sədri Gülüstan kənd tam orta məktəbində qarşıya qoyulan vəzifələrin uğurla yerinə yetiriləcəyinə və nailiyyətlərin daha da artacağına əminliyini bildirib, kollektivə tədrisdə uğurlar arzulayıb, açılışı bildirən lenti kəsib.

Məlumat verilib ki, 156 şagird yerlik məktəbdə 4-ü elektron lövhəli olmaqla 13 sinif otağı, kimya-biologiya və fizika laboratoriyaları, hərbi kabinə, kompüter otağı, müəllimlər otağı, şahmat otağı, kitabxana, bufet, idman zalı və açıq idman qurğuları var. Kompüter otağında 13 kompüter quraşdırılıb və internetə qoşulub. Kitabxanada 945 dərslik və 1337 bədii ədəbiyyat olmaqla, 2282 kitab kollektivin istifadəsinə verilib.

Gənclərin sağlam böyüməsində idmanın xüsusi yeri var. Gülüstan kənd tam orta məktəbində müasir idman zalı istifadəyə verilib. Hərbi kabinədə də lazımi şərait yaradılıb.

Ali Məclisin Sədri şagirdlərin fiziki və hərbi hazırlığına ciddi diqqət yetirilməsi barədə tapşırıqlar verib.

Təhsil ocağında dəqiq elmlərin tədrisi üçün hər cür şərait yaradılıb, fizika, kimya və biologiya laboratoriyalarında tədris proqramına uyğun ən müasir sınaq-təcrübə avadanlıqları quraşdırılıb, əyani vəsaitlər qoyulub.

Elektron lövhəli sinifdə Naxçıvan Dövlət Xalça Muzeyi ilə əlaqə yaradılıb və distant dərs keçirilib.

Məktəbin müəllimləri ilə görüşən Ali Məclisin Sədri deyib: Gülüstan kənd tam orta məktəbində yaradılan şərait imkan verəcəkdir ki, bundan sonra da məktəbdə ölkəmiz və xalqımız üçün yararlı gənclər yetişdirilsin. Gənclərin peşə sahibi olması, vətənpərvər böyüdülməsi bu gün qarşıda duran əsas vəzifədir. Bu il dövlət müstəqilliyimizin 25 ili tamam olur. Müstəqilliyimizin gələcək təminatçıları bu gün məktəblərdə hazırlanan gənclərdir. Ona görə də pedaqoji kollektiv gənclərin təhsilinə ciddi diqqət yetirməli, onların vətənpərvər böyüdülməsi qayğısına qalmalıdırlar.

Müəllim Günay Rəfizadə yaradılan müasir tədris şəraitinə görə kollektiv adından minnətdarlıq edib, qarşıya qoyulan vəzifələri və verilən tapşırıqları uğurla yerinə yetirəcəklərini bildirib.

Gülüstan kəndində yeni içməli su sistemi qurulub

Muxtar respublikanın kəndlərində quruculuq işləri aparılarkən sakinlərin sosial-məişət şəraitinin yaxşılaşdırılması da diqqət mərkəzində saxlanılır. Bu sahədə görülən işlər içərisində içməli su təminatı xüsusi yer tutur.

Oktyabrın 13-də Gülüstan kənd içməli su sisteminin açılışı olub.

Naxçıvan Muxtar Respublikası Ali Məclisinin Sədri Vasif Talıbov bu münasibətlə keçirilən tədbirdə iştirak edib.

Naxçıvan Muxtar Respublikası Dövlət Meliorasiya və Su Təsərrüfatı Komitəsinin sədri Əsgər Əsgərov məlumat verib ki, “Culfa şəhərinin və ətraf kəndlərin içməli su və kanalizasiya sistemlərinin yenidən qurulması” layihəsi çərçivəsində Culfa şəhərinin girişində yeni su anbarı və sutəmizləyici qurğu kompleksi inşa olunub. Tikinti işləri aparılarkən su anbarından Gülüstan kəndinədək 160 millimetrlik borularla 2 kilometr, kənddaxili isə 7,3 kilometr içməli su xətləri çəkilib, 157 abonent daimi və ekoloji təmiz içməli su ilə təmin olunub, sayğaclar quraşdırılıb.

Ali Məclisin Sədri Gülüstan kənd içməli su şəbəkəsinin istifadəyə verilməsini bildirən qurğunu işə salıb.

Kənd mərkəzi istifadəyə verilib

Oktyabrın 13-də Gülüstan kənd mərkəzinin açılışı olub.

Naxçıvan Muxtar Respublikası Ali Məclisinin Sədri Vasif Talıbov açılışı bildirən lenti kəsib.

Məlumat verilib ki, binada rabitə evi, polis sahə və baytarlıq məntəqələri, feldşer-mama məntəqəsi, kitabxana, Yeni Azərbaycan Partiyası ərazi ilk təşkilatı, inzibati ərazi dairəsi üzrə nümayəndəlik, statistika otağı, bələdiyyə və klub yerləşir. Kənd kitabxanаsında 6555 kitab var. İclas zalı müxtəlif tədbirlərin keçirilməsinə imkan verəcək.

Baytarlıq məntəqəsində dərman vasitələrini saxlamaq üçün soyuducu qoyulub, baytarlara nümunəvi iş şəraiti yaradılıb. Baxış zamanı qeyd olunub ki, Gülüstan kəndində əhalinin əsas məşğuliyyət sahəsinin heyvandarlıq, quşçuluq və arıçılıq olması baytarlıq xidmətinin nümunəvi təşkilini zəruri edir. Dezinfeksiya işlərinin vaxtlı-vaxtında aparılması kənddə yoluxucu xəstəliklərin yayılmasının qarşısını alıb.

Yeni Azərbaycan Partiyası Gülüstan kənd ərazi ilk təşkilatının sədri Kəmalə Səfərova deyib: Ərazi ilk təşkilatı üzrə Yeni Azərbaycan Partiyasının 108 üzvü var. Onlardan 42-si gənclər, 57-si isə qadınlardır. Gülüstan kəndində geniş quruculuq işləri aparılıb. Kənd müasir görkəmə qovuşub, yeni sosial obyektlər tikilib, Gülüstan türbəsi bərpa olunub. Kəndin tarixinin yaşadılmasına da, müasir inkişafına da lazımi qayğı göstərilir. Artıq kənddə işləmək də, təhsil almaq da, yaşamaq da çox rahatdır. Fəxr edirik ki, bu işlər Yeni Azərbaycan Partiyası tərəfindən görülür. Bundan sonra da ümummilli liderimiz Heydər Əliyevin siyasi xəttinə sadiq qalacaq, tikilənləri, qurulanları qoruyub saxlayacaq, ölkəmizin inkişafına öz töhfələrimizi verəcəyik.

Rabitə evində 384 nömrəlik yeni ATS quraşdırılıb, kəndə 1550 metr fiberoptik kabel xətti çəkilib, poçt xidməti təşkil olunub. Poçt şöbəsində kommunal xidmət haqlarının və digər ödənişlərin aparılması üçün lazımi şərait yaradılıb.

Ali Məclisin Sədri feldşer-mama məntəqəsində yaradılan şəraitlə tanış olub. Bildirilib ki, kənd mərkəzində feldşer-mama məntəqəsi üçün 4 otaq ayrılıb. Burada hər cür şərait yaradılıb, məntəqəyə soyuducu, təcili yardım və peyvənd çantaları, lazımi dərman vasitələri verilib. Yaradılan şərait əhaliyə göstərilən ilkin tibbi xidmətin hərtərəfli təşkilinə imkan verəcəkdir.

Binanın həyətində də abadlıq işləri aparılıb, yaşıllıqlar salınıb.

Gülüstan kəndində xidmət mərkəzi 

fəaliyyətə başlayıb

Həmin gün Gülüstan kəndində yeni xidmət mərkəzinin açılışı olub.

Ali Məclisin Sədri xidmət mərkəzinin açılışını bildirən lenti kəsib.

Mərkəzdə mağaza və bərbərxana yerləşir. Yaradılan şərait gündəlik ərzaq və sənaye mallarına olan tələbatın kəndin özündə ödənməsinə imkan verəcək. Xidmət mərkəzində 2 nəfər işlə təmin olunub.

Kənd sakinləri ilə görüşən Ali Məclisin Sədri deyib: Gülüstan kəndi öz adına layiq olaraq qurulub, müasirləşdirilib. Dövlətimiz tərəfindən bu tədbirlər ona görə həyata keçirilir ki, insanlar rahat yaşasın. Bu gün ölkəmiz inkişaf edir, sabitlik şəraitində yaşayırıq. Bu il dövlət müstəqilliyimizin 25-ci ildönümünü qeyd edəcəyik. Müstəqilliyimizin yaradıcısı ümummilli liderimiz Heydər Əliyevdir. Ulu Öndərin yolunun ölkə Prezidenti tərəfindən uğurla davam etdirilməsi nəticəsində ölkəmiz daha da inkişaf edir, şəhərlərimiz, kəndlərimiz müasirləşir, insanların yaşayış səviyyəsi yaxşılaşır. Müstəqilliyimizin möhkəmləndirilməsində, ölkəmizin inkişafında vətəndaşların da böyük əməyi vardır. Sakinlər bundan sonra da yaradılan şəraitdən səmərəli istifadə etməli, tikilənlər, qurulanlar qorunub saxlanılmalı, hər kəs ölkəmizin inkişafında pay sahibi olmalıdır.

Ali Məclisin Sədri dövlət müstəqilliyinin 25-ci ildönümü münasibətilə sakinləri təbrik edib, onlara firavan həyat arzulayıb.

Kənd sakini Surxay Məmmədov minnətdarlıq edərək deyib ki, yeni sosial obyektlərin tikilməsi, içməli su sisteminin çəkilməsi, yolun abadlaşması, Gülüstan türbəsinin bərpa olunması kəndin tarixində yeni inkişaf mərhələsinin əsasını qoyub, kənd əsl gülüstana çevrilib. Həyata keçirilən tədbirlər kəndin turizm imkanlarını artırıb. Hər bir sakin fəxr edir ki, müstəqilliyimizin bəhrəsi olan müasir Azərbaycan kəndində yaşayır. Yaradılan bu şərait imkan verir ki, təsərrüfatlarımızı daha da genişləndirək, bol məhsul istehsal edək. Sakinlər kəndin inkişafında, abadlaşmasında bundan sonra da yaxından iştirak edəcəklər.

x x x

Gülüstanda kənddaxili 2700 metr rabitə xətti və 1100 metr elektrik xətti çəkilib, mövcud elektrik xətlərində və transformatorlarda təmir işləri aparılıb. Abadlıq işləri aparılarkən qaz xətləri də yenilənib.

Gülüstan kəndindəki quşçuluq təsərrüfatının 

fəaliyyəti genişləndirilir

Muxtar respublikamızda sahibkarlığın inkişafı və yerli istehsalın həcminin artırılması sahəsində ardıcıl tədbirlər görülür. Yaradılan əlverişli şərait, güzəştli şərtlərlə kreditlərin verilməsi şəhər və rayon mərkəzləri ilə yanaşı, kəndlərdə də yeni təsərrüfat sahələrinin yaradılmasına imkan verir.

Oktyabrın 13-də Naxçıvan Muxtar Respublikası Ali Məclisinin Sədri Vasif Talıbov Gülüstan kəndindəki quşçuluq təsərrüfatının fəaliyyəti ilə maraqlanıb.

Məlumat verilib ki, quşçuluq təsərrüfatı 2013-cü ildə Sahibkarlığa Kömək Fondu tərəfindən verilən güzəştli kredit hesabına yaradılıb. Ətlik və yumurtalıq istiqamətində fəaliyyət göstərən təsərrüfatda 1000 başdan çox hindquşu saxlanılır. Muxtar respublikada quşçuluq təsərrüfatları üçün qüvvəli yem istehsalının həyata keçirilməsi və daxili bazarın qorunması təsərrüfatın rentabelli işləməsinə və fəaliyyətinin daha da genişləndirilməsinə imkan verir. İstehsal olunan məhsullar rahat şəkildə bazara və kənd təsərrüfatı məhsullarının satışı yarmarkalarına çıxarılır.

Sahibkar Bəhruz İsmayılov yaradılan şəraitə və göstərilən qayğıya görə minnətdarlıq edib.

Ali Məclisin Sədri muxtar respublikanın kəndlərində heyvandarlıq və quşçuluq təsərrüfatlarının yaradılmasının əhəmiyyətini bildirib, özəl bölmənin inkişafı üçün yaradılan şəraitdən səmərəli istifadə etdiyinə görə sahibkara təşəkkür edib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.