REGİONLAR
Dövlət proqramlarının icrası muxtar respublikanın sosial-iqtisadi inkişafını daha da sürətləndirib
Naxçıvan, 9 iyul, AZƏRTAC
Naxçıvan Muxtar Respublikasının sosial-iqtisadi inkişafını nəzərdə tutan Dövlət proqramlarının həyata keçirilməsi nəticəsində muxtar respublikanın sürətli inkişafı özünün keyfiyyətcə yeni mərhələsinə qədəm qoyub. “Naxçıvan Muxtar Respublikasının 2014-2018-ci illərdə sosial-iqtisadi inkişafı Dövlət Proqramı”nın və “2014-2015-ci illərdə Naxçıvan şəhərinin sosial-iqtisadi inkişafı üzrə Proqramı”n dəqiqliklə icrası qədim diyarda bir sıra müəssisələrin fəaliyyətinin bərpasına və ya yenidən qurulmasına şərait yaradıb.
Naxçıvan Muxtar Respublikası İqtisadiyyat və Sənaye Nazirliyinin mətbuat xidmətinin məlumatına əsasən, bütün bunların nəticəsində bu gün muxtar respublikada 119 növdə, 507 çeşiddə ərzaq, 235 növdə, 588 çeşiddə qeyri-ərzaq olmaqla, 354 növdə, 1095 çeşiddə məhsul istehsal olunur. Müəssisələr 107 növdə ərzaq, 229 növdə qeyri-ərzaq olmaqla, 336 növdə məhsula olan tələbatı tamamilə yerli istehsal hesabına ödəmək gücünə malikdir.
Dövlət proqramlarının icrası Naxçıvan Muxtar Respublikasının sosial-iqtisadi inkişafında nəzərdə tutulan məqsədlərə nail olunmasına, sahibkarlığın inkişafına, sosial problemlərin həllinə və əhalinin rifahının daha da yaxşılaşdırılmasına əsaslı töhfələr verir.
Sosial-iqtisadi inkişafın davamlılığının təmin edilməsi məqsədilə hər bir rayonun istehsal potensialından səmərəli istifadə etməklə sahibkarlığın inkişafı mühüm şərtdir. Bu baxımdan adıçəkilən Dövlət proqramının icrası muxtar respublika iqtisadiyyatının inkişafında mühüm əhəmiyyət kəsb etməklə, sahibkarlıq fəaliyyətinin genişlənməsində, ixracyönümlü və rəqabətədavamlı məhsul istehsal edən yeni müəssisələrin yaradılmasında, əhalinin məşğulluq səviyyəsinin və gəlirlərinin artırılması məqsədilə iş yerlərinin açılmasında müstəsna rol oynayır.
Məlum olduğu kimi, sahibkarlığın, özəl sektorun inkişafına normal şərait yaratmadan iqtisadi yüksəlişi təmin etmək, əhalinin məşğulluq səviyyəsini artırmaq, infrastrukturu yeniləşdirmək, sosial məsələlərin həllinə nail olmaq mümkün deyil. Bu məqsədlə muxtar respublikada iqtisadi sahədə həyata keçirilən siyasətin əsas istiqamətlərindən birini məhz sahibkarlığın inkişafı təşkil edir.
Sahibkarlığa göstərilən qayğı, öz növbəsində, yerli istehsalın inkişafına da şərait yaradır. Yerli istehsalın inkişaf etdirilməsi isə daxili bazarın qorunmasında, xaricə valyuta axınının qarşısının alınmasında və idxaldan asılılığın azaldılmasında mühüm rol oynayır. Məhz bu amil nəzərə alınaraq muxtar respublikada iqtisadiyyatın bütün sahələrində yeni istehsal və xidmət sahələri yaradılır, yaxud mövcud olanların fəaliyyəti bərpa edilir və ya genişləndirilir.
İstehsal potensialının gücləndirilməsi istiqamətində 2015-ci ilin ilk 6 ayı ərzində muxtar respublikada ət qovurması, süd məhsullarının emalı, lavaş istehsalı sahələri, forel balıqçılıq təsərrüfatı, istixana kompleksləri və xidmət olmaqla, 18 sahənin yaradılması başa çatdırılıb. Yaradılmış istehsal və xidmət sahələri hesabına 89 yeni iş yeri açılıb.
Silikon yorğan-döşək və yataq bazası, müxtəlif ölçü və formada qızıl-gümüş zinət əşyaları, medal və döş nişanları, elektrik açarları, alçipan örtüklər, gips, əhəng, beton istehsalı, un-qənnadı məmulatları, lavaş istehsalı, bərk pendir istehsalı, şirniyyat, kompot, mürəbbə və turşu istehsalı, qarğıdalı, toxumçuluq, heyvandarlıq, keçiçilik, quşçuluq, arıçılıq təsərrüfatları, istixana kompleksləri və xidmət olmaqla, 35 sahənin yaradılması istiqamətində isə işlər davam etdirilməkdədir.
Bu ilin 6 ayında yaradılması və ya fəaliyyətinin genişləndirilməsi başa çatdırılan istehsal və xidmət sahələri Naxçıvan şəhəri ilə yanaşı, rayon mərkəzlərini və kəndləri də əhatə edir. Şərur rayonunun İbadulla, Dəmirçi, Oğlanqala, Qarxun, Məmmədsabir, Babək rayonunun Nehrəm, Ordubad rayonunun Əylis kəndlərində, Kəngərli rayonunun Qıvraq qəsəbəsi və Qarabağlar, Sədərək rayonunun Sədərək kəndlərində istehsal sahələrinin yaradılması başa çatdırılıb.
Bu gün muxtar respublika 24 illik blokadanın yaratdığı çətinliklərə baxmayaraq, Azərbaycan Prezidenti İlham Əliyevin diqqət və qayğısı nəticəsində özünün çiçəklənmə, intibah dövrünü yaşayır. Qədim diyarda çoxşaxəli iqtisadiyyatın formalaşdırılması istiqamətində ardıcıl tədbirlərin həyata keçirilməsi, lazımi islahatların aparılması, mühüm əhəmiyyətə malik Dövlət proqramlarının reallaşdırılması Naxçıvanı sosial-iqtisadi inkişaf baxımından ölkəmizdə lider səviyyəsinə yüksəldib.
AZƏRTAC-ın Naxçıvan Muxtar Respublikasındakı
bürosu