REGİONLAR


Dövlət qayğısı nəticəsində tütünçülüyə maraq göstərənlərin sayı xeyli artıb

Zaqatala, 7 avqust, Mustafa Dadaşov, AZƏRTAC

Respublikamızın şimal-qərb rayonlarında tütünçülüyün inkişaf etdirilməsi üçün zəngin ənənə və potensial mövcuddur. İxrac potensialı yüksək olan bu sahə uzun illər diqqətdən kənarda qalsa da, son illər ölkə rəhbərliyi tərəfindən həyata keçirilən məqsədyönlü tədbirlər nəticəsində tütünçülük yenidən dirçəlməyə başlayıb, bu gəlirli sahəyə maraq göstərənlərin sayı xeyli artıb.

Dövlətimizin başçısının regionların mövcud iqtisadi potensialından səmərəli istifadə edilməsi ilə bağlı verdiyi tapşırıq və tövsiyələrə uyğun olaraq, son iki ildə bölgənin rayonlarında digər ənənəvi sahələr kimi, tütünçülüyün inkişaf etdirilməsi istiqamətində də zəruri tədbirlər həyata keçirilməkdədir.

Prezident İlham Əliyevin sədrliyi ilə avqustun 4-də Qaxda keçirilən barama, tütün və fındıq istehsalının inkişafı məsələlərinə dair respublika müşavirəsində dövlətimizin başçısı tütünçülüklə bağlı atılmış ilk addımların artıq öz nəticəsini verdiyini vurğulayaraq deyib: “Tütünçülüyün inkişafına dair Dövlət Proqramı qəbul ediləcəkdir. Proqram demək olar ki, hazırdır. Bu gün səslənən fikirlər və mənim səfərim nəticəsində apardığım müşahidələr də o proqrama əlavə olunaraq tezliklə qəbul ediləcək. Bu proqramın qəbulu bir daha onu göstərir ki, dövlət bu sahəyə çox ciddi fikir verir”.

Hazırda şimal-qərb bölgəsinə daxil olan rayonlarda tütün yığımının qızğın çağıdır. “Azərtütün” MMC-nin sədr müavini Mübariz Qədimovun verdiyi məluma görə, cəmiyyətin Zaqatala, Qax və Şəki rayonlarında fəaliyyət göstərən tütün istehsalı və emalı məntəqələrinə mövsümün əvvəlindən indiyədək 3860 ton “Virciniya” növlü yaşıl tütün kütləsi daxil olub. Eyni zamanda, məntəqələrdə bu günədək 274 ton quru tütün istehsal edilib.

AZƏRTAC-ın müxbiri Zaqatala tütün istehsalı və emalı məntəqəsində olub, yaşıl tütünün qəbulu və emalı prosesini izləyib, fermerlərlə söhbətləşib.

Hər gün məntəqəyə 55-60 ton yaşıl tütün kütləsi daxil olur. Hazırda məntəqədə olan 56 ədəd odla tütünqurutma kamerasının hamısına qurudulmaq üçün tütün qoyulub. Məntəqənin məsul nümayəndəsi Mohuma Hüşənovun verdiyi məlumata görə, indiyədək bu məntəqəyə fermer təsərrüfatlarından 1667 ton yaşıl tütün kütləsi gətirilib, 116 ton quru tütün istehsal olunub. Ötən ilin müvafiq dövründə isə məntəqəyə 785 ton yaşıl tütün kütləsi daxil olmuş, 71 ton quru tütün istehsal edilmişdi.

Fermerlərlə söhbət zamanı onlar dövlətimizin başçısının Qaxda keçirilən müşavirədəki nitqini diqqətlə dinlədiklərini, tütünçülüyün inkişafı ilə bağlı görülən işlərdən razı qaldıqlarını vurğulayıblar.

Rayonun Lahıc kəndindən olan fermer Cavanşir Qurbanov üç ildir ki, tütünçülüklə məşğul olur. Bu il 15 hektar sahədə tütün yetişdirib. İndiyədək məntəqəyə 30 ton yaşıl tütün kütləsi təhvil verib. Zaqatalalı fermer cari mövsümdə 150 ton tütün istehsal etməyi qarşısına məqsəd qoyub. Fermerin təsərrüfatında əsas işçi qüvvəsi ailə üzvləridir. Onlar bu il tütün istehsalından ailə büdcələrini daha da artırmağı düşünürlər.

Bölgə rayonlarında tütün yığımı davam edir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.