İQTİSADİYYAT


Dünya Gömrük Təşkilatının 11-ci illik PICARD konfransı başa çatıb

A+ A

Bakı, 30 sentyabr, AZƏRTAC

Filippin Respublikasının paytaxtı Manilada təşkil olunan Dünya Gömrük Təşkilatının 11-ci illik PICARD (“Gömrük sahəsində akademik araşdırmalar və inkişaf üzrə əməkdaşlıq proqramı”) konfransı başa çatıb. Sentyabrın 27-dən 29-dək davam edən konfransda Azərbaycan Respublikası Dövlət Gömrük Komitəsinin sədri, gömrük xidməti general-leytenantı Aydın Əliyevin rəhbərliyi ilə nümayəndə heyəti iştirak edib.

Gömrük Komitəsindən AZƏRTAC-a bildirilib ki, Dünya Gömrük Təşkilatının (DGT) 11-ci illik PICARD konfransı üç gün ərzində məruzəçilərin maraqlı təqdimatları və bunun ardınca iştirakçılar arasında aparılan dinamik müzakirələrlə əlamətdar olub. Konfransa gömrük idarələri, akademik və tədqiqat birlikləri, beynəlxalq və regional təşkilatlar və özəl sektordan olmaqla, 50 ölkədən 200 nəfərə yaxın nümayəndə qatılıb.

Filippin Gömrük Bürosunun ev sahibliyi etdiyi konfransın ilk iş günündə DGT-nin araşdırmalar bölməsinin rəhbəri və PICARD konfransının sədri Robert Aylend, Filippin Respublikası maliyyə nazirinin müavini xanım Antonett Tionko, DGT-nin baş katibi Kunio Mikuriya, Filippin Gömrük Bürosunun rəhbəri Nikanor Faeldon, Filippin Maliyyə Departamentinin katibi Karlos Domingez və başqaları nitq söyləyiblər.

DGT-nin baş katibi PICARD konfransına ev sahibliyi etdiyinə və iştirakçıları səmimi qarşıladığına görə Filippin Gömrük Bürosuna minnətdarlığını bildirib, bəzi məruzəçilərin iştirakına verdiyi dəstəyə görə isə Koreya Gömrük Xidmətinə təşəkkür edib.

K.Mikuriya qeyd edib ki, builki konfransın dörd əsas mövzusu - rəqəmsal gömrük, gəlirlər, qanunsuz ticarət və təhlükəsizlik məsələləri üzrə araşdırmalar və müzakirələr gömrük xidmətləri və əlaqəli təşkilatların gündəlik işinə və onların qərar qəbuletmə proseslərinə böyük dəstəkdir.

Sonra gündəlikdə nəzərdə tutulan məsələlərə dair təqdimatlar keçirilib. Eyni zamanda, Filippində gömrük idarəetməsi, tranzit və ticarətin sadələşdirilməsi, elektron gömrük və təhlükəsizlik məsələləri ilə bağlı fikir mübadiləsi aparılıb.

Konfransın davam etdiyi sonrakı günlərdə isə mədəni sərvətlərin qanunsuz ticarəti, Səlahiyyətli İqtisadi Operator institutunun tətbiqindən irəli gələn faydalar və etibarlı ticarət marşrutları, tədqiqat və akademik məsələlər barədə müzakirələr aparılıb. Ümumiyyətlə, konfrans iştirakçıları gömrük məsələləri, beynəlxalq ticarət və sərhədlər üzrə araşdırma və siyasi təhlillərlə bağlı inteqrəedilmiş yanaşmadan faydalanıblar.

Beynəlxalq Gömrük Universitetləri Şəbəkəsinin (INCU) katibi Mixail Kaşubskinin “Son nailiyyətlər və gələcək planlar” adlı təqdimatında isə bu qurumun Azərbaycanla bağlı fəaliyyətindən bəhs olunub.

Öz növbəsində, Azərbaycan Respublikası Dövlət Gömrük Komitəsinin Fəaliyyətin Qiymətləndirilməsi və İnkişaf Proqramları Baş İdarəsinin rəisi, gömrük xidməti general-mayoru İqbal Babayev “Elektron gömrüyün inkişaf etdirilməsi üçün layihələrin idarə olunmasının əsas prinsipləri” mövzusunda təqdimatla çıxış edib.

Konfrans çərçivəsində baş tutan Gənclər Forumu isə konfrans zamanı qaldırılan mövzularla bağlı, həmçinin gömrük və beynəlxalq ticarət sahəsində gələcək karyera imkanlarını müzakirə etmək üçün müxtəlif universitetlərin tələbələrini bir araya gətirib.

Konfransın bağlanış mərasimində DGT-nin araşdırmalar bölməsinin rəhbəri Robert Aylend tədbirin uğurlu təşkili üçün göstərdiyi səylərə görə Filippin Gömrük Bürosuna minnətdarlığını ifadə edib və yazıçı David Simondan sitat gətirərək “PICARD yeni işlər görür və burada bütün amillər əhəmiyyətlidir” deyə vurğulayıb.

Xatırladaq ki, DGT-nin PICARD konfransı 2006-cı ildən etibarən hər il dünyanın müxtəlif ölkələrində keçirilir və məqsəd gömrük idarələri və aidiyyəti akademik qurumlar arasında əlaqələri genişləndirməkdir.

Dünya Gömrük Təşkilatının 10-cu illik PICARD konfransı isə ötən il Bakı şəhərində keçirilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.