Bakı, 2 mart, Cavid Bədəlov, AZƏRTAC

Martın 2-də Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov Bakıda keçirilən Dünya Xəbər Agentlikləri Konqresi Şurası (NACO) iclasının və AZƏRTAC-ın 95 illik yubileyi mərasiminin iştirakçıları ilə görüşüb.

AZƏRTAC-ın baş direktoru Aslan Aslanov Dünya Xəbər Agentlikləri Konqresi Şurasının üzvlərinə və agentliyin 95 illik yubileyi münasibətilə Bakıya gəlmiş qonaqlara təşəkkürünü bildirdi.

Aslan Aslanov dedi ki, beynəlxalq münasibətlər sisteminin yenidən formalaşdığı şəraitdə informasiyanın əhəmiyyəti daha geniş, qlobal xarakter alır. Dünya gözlərimizin önündə dəyişir. O, heç də həmişə bizim istədiyimiz kimi dəyişmir. Çünki zamanın öz çağırışları var və biz ona cavab verməyə məcburuq. Bu baxımdan bizim hamımızı, xüsusən klassik, ənənəvi media təmsilçilərini düşündürən xeyli suallar meydana çıxır. Bəzən oyun qaydalarının pozulduğu, piar xarakterli informasiyaların xəbər məkanını doldurduğu bir vaxtda, müasir texnologiyaların inqilabi dəyişikliklər dalğası fonunda bu sualların cavabını tapmaq informasiya istehsalçıları olaraq bizim üzərimizə düşür.

Baş direktor dedi: “Bu suallara cavab tapmaq üçün biz Avropa Xəbər Agentlikləri Alyansının həm yaz, həm də payız sessiyalarında, Asiya və Sakit Okean Ölkələri İnformasiya Agentlikləri Alyansının toplantılarında, həmçinin demək olar ki, bütün qitələrdə həm siyasətçilərin, həm elm adamlarının, həm də media təmsilçilərinin diqqətini cəlb etmiş Bakı Beynəlxalq Humanitar Forumunda ətraflı fikir mübadilələri, geniş müzakirələr aparırıq”.

Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov görüşdə çıxış edərək Dünya Xəbər Agentlikləri Konqresi Şurasının Bakıda keçirilən növbəti iclasının iştirakçılarını və AZƏRTAC-ın 95 illik yubileyi mərasimində iştirak edən yaxın-uzaq xarici ölkələrin informasiya agentliklərinin rəhbərlərini qədim tarixə və zəngin mədəniyyətə, demokratik ənənələrə malik Azərbaycanın paytaxtında salamladı.

Əli Həsənov Dünya Xəbər Agentliklərinin V Konqresinin 2016-cı ildə Bakıda keçirilməsi barədə qərarın 2013-cü ilin noyabrında Səudiyyə Ərəbistanı Krallığının paytaxtı Ər-Riyadda – qurumun IV Konqresində qəbul olunduğunu xatırlatdı. Bildirdi ki, qərara əsasən, AZƏRTAC 2016-2019-cu illərdə Konqresə sədrlik edəcək. Prezident Administrasiyasının rəsmisi Azərbaycana göstərilən bu yüksək etimada görə Konqres Şurasının və üzv agentliklərin rəhbərlərinə minnətdarlığını bildirdi.

Əli Həsənov qeyd etdi ki, həmçinin 2016-cı ildə Asiya və Sakit Okean Ölkələri İnformasiya Agentlikləri Təşkilatının (OANA) XVI Baş Assambleyası Dünya Xəbər Agentliklərinin V Konqresi ilə eyni vaxtda Bakıda keçiriləcək. OANA da UNESCO-nun qərarı ilə yaradılan nüfuzlu beynəlxalq media qurumlarından biridir. OANA-nın növbəti Baş Assambleyasının Azərbaycanda keçirilməsi barədə qərar 2013-cü ilin sentyabrında Moskva toplantısında qəbul olunub. Biz bu qərarları Azərbaycan Respublikasının beynəlxalq aləmdə nüfuzunun getdikcə artmasının, həmçinin ölkənin milli informasiya agentliyi olan AZƏRTAC-ın dünya informasiya məkanına inteqrasiyasının daha bir təsdiqi kimi qiymətləndiririk.

Prezidentin ictimai-siyasi məsələlər üzrə köməkçisi dedi ki, Azərbaycan tarixən Şərq ilə Qərbin, sivilizasiyaların qovuşduğu və bütün dövrlərdə yüksək tolerantlığı, qonaqpərvərliyi ilə tanınan ölkədir. Azərbaycan həm də müsəlman Şərqində 97 il əvvəl parlamentli ilk demokratik respublikanın qurulduğu, 142 il əvvəl ilk dünyəvi teatrın, 107 il əvvəl ilk operanın yarandığı, 140 il əvvəl ilk qəzetin nəşrə, 95 il əvvəl isə ilk milli informasiya agentliyinin fəaliyyətə başladığı ölkədir.

Azərbaycanda yaradılan demokratik respublika 1920-ci ildə sovet imperiyasının hərbi təcavüzü nəticəsində süquta uğradı. Azərbaycan 70 il sovet imperiyasının tərkibində yaşamağa məcbur oldu. Bu illərdə respublikamızın dünya informasiya məkanına birbaşa çıxış imkanları yox dərəcəsində idi. Azərbaycan öz mədəniyyətini, tarixi həqiqətlərini sərbəst şəkildə dünyaya çatdıra bilmirdi. Bu illərdə sovet ideologiyasına uyğun jurnalistika ənənələri formalaşmışdı. Yalnız Azərbaycan müstəqilliyini bərpa etdikdən sonra ümummilli lider Heydər Əliyevin rəhbərliyi ilə mediamız beynəlxalq informasiya məkanına inteqrasiya etməyə, dünyada formalaşan jurnalistika ənənələrindən bəhrələnməyə başladı, ölkədə azad media formalaşdı. Bunun üçün çox mühüm siyasi və hüquqi islahatlar həyata keçirildi, qanunvericilik bazası formalaşdırıldı. 1998-ci ildə mətbuat üzərində senzura ləğv edildi. Daha bir il sonra “Kütləvi informasiya vasitələri haqqında” Avropa standartlarına cavab verən Qanun qəbul olundu.

Bu demokratik islahatlar sırasına, həmçinin mətbuatın fəaliyyətinə nəzarət funksiyasını həyata keçirən nazirliyin ləğv olunması, “Televiziya və radio yayımı haqqında”, “İnformasiya əldə etmək haqqında” qanunların qəbul edilməsi və digər tədbirlər daxildir. 2008-ci ildə media ilə bağlı daha bir mühüm hüquqi sənəd qüvvəyə mindi. Azərbaycan Prezidenti İlham Əliyevin Sərəncamı ilə təsdiq edilmiş “Azərbaycan Respublikasında Kütləvi İnformasiya Vasitələrinin inkişafına dövlət dəstəyi Konsepsiyası” adlanan bu sənəddə fikir, söz və mətbuat azadlığının inkişaf etdirilməsinin əsas müddəaları əksini tapıb.

Əli Həsənov dedi: “Bütün bunları sadalamaqda məqsədim odur ki, Azərbaycanda azad, demokratik, dünyəvi informasiya mühiti formalaşdırılması istiqamətində davamlı və məqsədyönlü iş aparıldığı barədə sizdə aydın təsəvvür yaransın. İndi Azərbaycan dövləti özünün daxili həyatını azad mediasız təsəvvür etmir. Hazırda ölkə mediası tam sərbəstdir və istənilən mövzuda yaza bilir, istədiyi məsələni qaldırır, ictimai müzakirəyə çıxarır. Təsəvvür edin ki, Azərbaycanda 5 minə yaxın KİV qeydiyyatdan keçib, 40-a yaxın gündəlik, 300-dən çox həftəlik və aylıq qəzet, 100-dən çox jurnal, 55 televiziya və radio kanalı, çoxsaylı internet resursları, 20-yə yaxın informasiya agentliyi fəaliyyət göstərir.

Ölkədə internetə giriş də tam sərbəstdir. Respublikanın ən ucqar regionunda belə həm mobil, həm də digər internet kanallarına çıxış var. Bu, eyni zamanda, ölkəmizdə sosial medianın əhatə dairəsinin genişlənməsinə şərait yaradır. Yalnız “Facebook” istifadəçilərinin sayı 1 milyon yarıma yaxınlaşır”.

Prezident Administrasiyasının rəsmisi bildirdi ki, bu gün dünyada gedən qloballaşma proseslərində müasir media qarşısında mühüm vəzifələr durur. Onlar müəyyən problemlərlə, deyərdim ki, bəzən hətta ciddi, taleyüklü problemlərlə qarşılaşırlar. Kəskin rəqabət gedir. Əlbəttə, media qurumları arasında rəqabət təbiidir. Amma gərək bu rəqabət sağlam zəmin üzərində aparılsın, dünyada qəbul edilən dəyərləri gözdən salmağa deyil, onları daha da zənginləşdirməyə yönəlsin.

Təəssüf ki, bəzən biz bunun əksi ilə qarşılaşmalı oluruq. Dünyada cərəyan edən hadisələr hətta çox nüfuzlu xəbər agentlikləri tərəfindən müxtəlif rakursda işıqlandırılır, siyasi mənafelərə uyğun şəkildə təqdim olunur. Bir sıra hallarda mediaya yoxlanılmamış və ya qərəzli informasiya, yaxud sifariş xarakterli informasiya yol tapır. Bu isə beynəlxalq aləmdə ikitərəfli münasibətlərə zərər vurur. Müxtəlif media qurumlarının, xəbər agentliklərinin əlbəttə, öz informasiya siyasəti var. Bu, belə də olmalıdır. Lakin obyektivlik, qərəzsizlik, faktın dəqiqliyi jurnalistika üçün çox vacibdir. Biz yalnız bu halda sağlam düşüncəyə əsaslanan ümumi anlaşmaya nail ola bilərik. Bu, xüsusən indi – bəşəriyyətin siyasi qarşıdurmalar, terrorizm, separatçılıq, dini ekstremizm, transmilli cinayətkarlıq kimi təhlükələrlə üzləşdiyi bir vaxtda daha vacibdir. İnsanların obyektiv informasiya ala bilməsi onlara təkcə öz ölkələrində deyil, həm də ümumən dünyada baş verən hadisələri doğru-düzgün qiymətləndirmək imkanı verir.

Sonda Əli Həsənov bu mötəbər iclasda səmərəli dialoq, qarşıya qoyulan vəzifələrin həlli yollarının tapılmasında uğurlar arzuladı. “Hamınızı 2016-cı ilin noyabrında Bakıda keçiriləcək Dünya Xəbər Agentliklərinin V Konqresində görməyə şad olacağıq”, - deyə Əli Həsənov bildirdi.

Sonra Dünya Xəbər Agentlikləri Konqresinin və Səudiyyə Xəbər Agentliyinin (SPA) prezidenti Abdullah bin Fəhd Əl-Hüseyn çıxış edərək qlobal məkanda informasiya siyasətini müəyyənləşdirən xəbər agentlikləri alyanslarının, aparıcı informasiya qurumlarının rəhbərləri və nümayəndələrinin iştirak edəcəkləri Konqres Şurasının Bakı iclasında səmərəli müzakirələrin aparılacağını bildirdi, AZƏRTAC-ın 95 illik yubileyi münasibətilə təbriklərini çatdırdı. O, 2016-cı ildə Bakıda keçiriləcək V Konqresə AZƏRTAC tərəfindən aparılan hazırlıq işlərini yüksək qiymətləndirdi.

Avropa Xəbər Agentlikləri Alyansının (EANA) prezidenti, Böyük Britaniyanın Press Association agentliyinin baş icraçı direktoru Klayv Marşal hər dəfə Azərbaycana gələndə ölkəmizdə sürətli inkişafın şahidi olduğunu söylədi. O, Azərbaycanda media sahəsinin də inkişaf etdiyini diqqətə çatdırdı. K.Marşal EANA-ya üzv agentliklərin bu gün dünyanın nüfuzlu informasiya qurumları olduqlarını vurğuladı. Bu agentliklərin arasında AZƏRTAC-ın da olmasından məmnunluğunu bildirdi. O, 2016-cı ildə - Azərbaycanın müstəqilliyinin bərpasının 25-ci ildönümünün qeyd ediləcəyi bir vaxtda AZƏRTAC-ın ev sahibliyi ilə V Konqresin yüksək səviyyədə keçəcəyinə əminliyini bildirdi.

Asiya və Sakit Okean Ölkələri İnformasiya Agentlikləri Təşkilatının (OANA) prezidenti, Rusiyanın TASS agentliyinin baş direktoru Sergey Mixaylov Azərbaycanın Prezident İlham Əliyevin rəhbərliyi ilə dinamik inkişaf etdiyini bildirdi. İki il əvvəl ilk dəfə Bakıya gəldiyini və ötən müddətdə şəhərdə böyük dəyişikliklər gördüyünü vurğulayan S.Mixaylov 2016-ci ildə Bakıda V Konqreslə eyni vaxtda OANA-nın XVI Baş Assambleyasının da keçiriləcəyini, bu tədbirdə media ilə bağlı çox vacib məsələlərin, yeni trendlərin müzakirə olunacağını vurğuladı. TASS-ın baş direktoru 95 illik yubileyini qeyd edən AZƏRTAC-ın son vaxtlar qazandığı nailiyyətlərə diqqəti cəlb etdi.