SİYASƏT


Dünya xəbər agentliklərinin Sankt-Peterburq sammitində yalan xəbərlərlə mübarizə yolları müzakirə olunub VİDEO

Sankt-Peterburq, 2 iyun, AZƏRTAC

İyunun 2-də Sankt-Peterburq Beynəlxalq İqtisadi Forumu çərçivəsində dünyanın aparıcı xəbər agentliklərinin “Yalan, ya doğru informasiya: müasir informasiya dünyasına çağırış” mövzusunda sammiti keçirilib.

AZƏRTAC xəbər verir ki, Rusiyanın TASS agentliyi tərəfindən təşkil olunan sammitdə Associated Press, Reuters, Press Association, Anadolu, Bloomberg, ANSA, DPA, Sinxua, İRNA, Kyodo, Yonhap, France-Presse və digər agentliklərin rəhbərləri və nümayəndələri müzakirələr aparıblar. Azərbaycandan bu sammitdə AZƏRTAC-ın baş direktoru, Dünya Xəbər Agentlikləri Konqresinin prezidenti Aslan Aslanov iştirak edib.

TASS agentliyinin baş direktorunun birinci müavini Mixail Qusman və İtaliyanın ANSA agentliyinin baş direktoru Cüzeppe Çerbonenin moderatorluğu ilə keçən tədbirdə müasir texnologiyaların inkişafı fonunda yalan xəbərlərin qarşısının alınması, onların jurnalistika üçün ciddi problemlər yaratması, belə informasiyalardan qorunmaq yolları ilə bağlı çıxışlar dinlənilib, müzakirələr aparılıb.

Rusiya Xarici İşlər Nazirliyinin informasiya və mətbuat departamentinin direktoru Mariya Zaxarova, TASS agentliyinin baş direktoru Sergey Mixaylov, Yaponiyanın Kyodo agentliyinin beynəlxalq əlaqələr departamentinin direktoru Kakuya Oqata, Associated Press agentliyinin beynəlxalq xəbərlər üzrə vitse-prezidenti İen Filips çıxışlarında əvvəlki dövrlərlə müqayisədə hazırda sosial şəbəkələr vasitəsilə “feyk” məlumatların daha sürətlə yayıldığını və qısa vaxt ərzində böyük auditoriya əldə etdiyini vurğulayıblar. Bildirilib ki, yalan xəbərlərin qarşısının alınması üçün mexanizmlərin yaradılmasına böyük ehtiyac var.

Diqqətə çatdırılıb ki, “feyk” informasiya ilə elə “feyk” xəbərlər vasitəsilə mübarizə aparmaq olmaz. Əsas diqqəti jurnalist resurslarından və sağlam jurnalistika ənənələrindən istifadə edərək həqiqətə yönəltmək lazımdır.

Natiqlər, həmçinin bildiriblər ki, təhsilin səviyyəsini yüksəltməklə, insanlara xəbərlərin necə yaranması mexanizmlərini öyrətməklə yalan xəbərlərə inananların sayını azaltmaq, “feyk” məlumatların yayılmasının qarşısını almaq olar. Jurnalistlər daim mübarizə aparmalı, yalanı məhv etmək üçün məhz həqiqəti aşkar edib göstərməlidirlər. Cəmiyyətdə mediaya etibarın azaldığını qeyd edən ekspertlər bunun əsasən həqiqətin yayılmasına çətinliklər yaratdığını önə çəkiblər. Buna görə də etibarlı mənbə statusunu qoruyub saxlamaq üçün agentliklər öz kollektivlərində əməkdaşların hazırlıqlı olmasına diqqət ayırmalı, onların peşəkarlığını artırmalıdırlar.

Sammitdə xüsusi vurğulanıb ki, agentliklər informasiya yayarkən diqqətli olmalı, illərlə qazanılan imiclərini risk altına atmamalıdırlar. “Feyk” xəbərlər problemi xüsusilə agentliklər üçün böyük çağırışdır, çünki məhz bu media qurumları gündəlik olaraq xəbərlə işləyir, informasiya istehsal edir və yayır.

Forum çərçivəsində sammit işini müzakirələrlə davam etdirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.