DÜNYA
Dünyanın şəhərləri: Afina VİDEO
Bakı, 13 iyun (AZƏRTAC). AZƏRTAC-ın “Dünyanın şəhərləri” silsiləsindən növbəti reportajı başdan-başa antik dövrlərin izlərini əks etdirən Yunanıstanın paytaxtı və dünyanın ən qədim şəhərlərindən biri Afina haqqındadır.
Videoreportajda bildirilir ki, Afina Attika yarımadasında geniş düzənliyin mərkəzində yerləşən sıldırımlı təpədə salınmışdır. Şəhər 3 tərəfdən dağlar və Saronikas körfəzi ilə əhatə olunur.
Yunan mifologiyasında müdriklik, müharibə və incəsənət ilahəsi Afinanın adını daşıyan bu şəhər qədim dövrlərdən bu günə qədər azadlıq rəmzi sayılır. Burda insan məskənlərinin 7 min il əvvəl meydana gəldiyi bildirilir.
Videoreportajda təxminən 5 milyona yaxın əhalinin yaşadığı Afina universitetlərində 100 mindən artıq tələbənin təhsil aldığı, bu şəhərin dinamik, şövqlü həyatı ilə diqqəti cəlb etdiyi vurğulanır. Bildirilir ki, şəhərin mərkəzində nəinki müasir binalara, eyni zamanda, qədim yunan mədəniyyəti tikililərinin qalıqlarına da rast gəlmək mümkündür. Egey dənizi sahilində yerləşən Afina həm də bir liman şəhəridir. Afina limanı dünyanın ən qədim limanlarından biridir.
Bildirilir ki, Avropa mədəniyyətini və ümumiyyətlə dünya sivilizasiyasının inkişafını Afinasız təsəvvür etmək qeyri-mümkündür. Avropa incəsənətinin və Qərb fəlsəfəsinin bünövrəsi Afinada hələ 2300 il bundan əvvəl qoyulmuşdur. Avropa memarlığının ilk şah əsərləri də məhz burada ərsəyə gəlmişdir. Dünyanın ən qədim teatrı olan Avropa teatrı da bu şəhərdə yaranmışdır. Bu gün dünyanın tərəqqi etmiş ölkələrində hakim olan demokratik dövlətçilik ənənəsi də ilk dəfə Afinada təşəkkül tapmışdır. Dünya fəlsəfəsinə, dramaturgiyasına böyük töhfələr verən Aristotel, Platon, Sokrat, Epikür bu şəhərdə yaşamış və qədim yunan fəlsəfə məktəbləri də burda yaranmışdır.
Videoreportajda qeyri-adi dizaynda tikilən və ağ rənglə rənglənən binaları ilə göz oxşayan Afinanın ən yüksək nöqtəsində yerləşən Akropol tarixən Afinanın həm hərbi, həm də dini mərkəzi rolunu oynadığı, Akropolun mərkəzində isə şəhərin hamisi ilahə Afinanın şərəfinə ucaldılmış Parfenon məbədinin yerləşdiyi qeyd edilir.
Videomaterialda qeyd edilir ki, AZƏRTAC-ın kameralarının qarış-qarış lent yaddaşına köçürdüyü qədim və gözəl Afina tarixlə müasirliyi özündə yaşadan intellektual turizm şəhəridir. Buradakı 50-dən artıq muzey, klassik yunan, Roma və Bizans dövrlərinə aid memarlıq abidələri insanı keçmişə maraqlı səyahətə aparır. Şəhərin mərkəzi məhəllələrindəki tavernalarda gözəl yunan musiqisinin sədaları altında yunan mətbəxinin dadına baxmaq mümkündür. Burada Sokratın vaxtilə afinalılara öz fəlsəfi görüşlərini söylədiyi bazar meydanını seyr etmək, Roma işğalı dövründə öz su saatı ilə ən dəqiq vaxtı göstərən “Küləklər qülləsi” yaxınlığındakı tavernaların birində nahar etmək, Akropoldan dünyada ilk demokratiyanın doğulduğu qədim məhəllələrə tamaşa etmək mümkündür.