REGİONLAR
Düşmənin təxribatlarına mətanətlə sinə gərən Tərtərdə tikinti-quruculuq işləri davam etdirilir
Tərtər, 21 fevral, Tahir Ağaməmmədov, AZƏRTAC
Ötən il cəbhədə baş verən gərginliklərə, erməni silahlılarının yaşayış məntəqələrimizi artilleriya atəşinə tutmasına baxmayaraq, Tərtər rayonunun sosial-iqtisadi inkişafı davam edib. Düşmənin təxribatlarına mətanətlə sinə gərən rayonda geniş tikinti-quruculuq işləri aparılıb, infrastruktur layihələri həyata keçirilib.
AZƏRTAC xəbər verir ki, bu barədə Tərtər rayonunda 2016-cı ilin yekunlarına həsr edilmiş hesabat yığıncağında məlumat verilib. Rayon icra hakimiyyətinin başçısı Müstəqim Məmmədovun hesabat məruzəsində bildirilib ki, ötən ilin aprel ayında düşmənin artilleriya zərbələri nəticəsində Tərtər şəhərində və kəndlərdə 256 yaşayış evinə, 4 məktəb binasına, 2 tibb məntəqəsinə, 1 körpələr evi-uşaq bağçasına, qaz, su və elektrik təsərrüfatına ciddi ziyan dəyib, 3 mülki vətəndaş həlak olub. Dövlətimizin başçısı həmin günlərdə cəbhə bölgəsinə səfər edib, düşmənin atəşi nəticəsində dağılan evə baxış keçirib, rayon ictimaiyyətinin nümayəndələri ilə görüşüb. Səfərdən sonra mülki əhaliyə dəymiş ziyanın aradan qaldırılması ilə bağlı Sərəncam imzalanıb. Sərəncama əsasən 1 ev yenidən tikilib, 8 ev bərpa edilib, 18 ev əsaslı təmir olunaraq sakinlərin istifadəsinə verilib.
Diqqətə çatdırılıb ki, dövlətimizin başçısı dekabrın 3-də rayona növbəti səfəri zamanı Tərtər çayı üzərində inşa edilmiş yeni körpünün, Tərtər şəhərində Uşaq-Gənclər Şahmat Məktəbinin, 100 yerlik körpələr evi-uşaq bağçasının, Yeni Azərbaycan Partiyası rayon təşkilatının yeni inzibati binasının açılışında, “Tərtər şəhərinin içməli su təchizatı və kanalizasiya sistemlərinin yenidən qurulması” layihəsinin başa çatması münasibətilə keçirilən tədbirdə iştirak edib, ötən ilin aprelində düşmənin atəşi nəticəsində ziyan dəymiş evlərin tikinti, bərpa və təmir işləri ilə tanış olub.
Məlumat verilib ki, 2016-cı ildə Kənd Təsərrüfatı İdarəsi üçün inzibati bina tikilərək istifadəyə verilib, Tərtər şəhərində çoxmərtəbəli 8 yaşayış binasının dam örtüyü əsaslı təmir olunub, 7 yaşayış binasının fasadı və blokları suvanaraq rənglənib. Prospekt və küçələr asfaltlanıb. Rayonun 9 kəndi təbii qazla təmin olunub. Ev təsərrüfatları üzrə qazlaşdırılma 97 faizə çatıb. Ekoloji tarazlığın qorunması məqsədilə 32 mindən çox müxtəlif növ ağac, 1 milyon 300 mindən çox həmişəyaşıl və gül kolları əkilib.
Hazırda tarix-diyarşünaslıq muzeyinin inşasında son tamamlama işləri aparılır, Tərtər çayı sahilində 5 hektar ərazidə yeni park salınır. Şəhər 6 nömrəli tam orta və Qazyan kənd ümumi orta məktəblərində əsaslı təmir işləri, Seydimli kənd tam orta məktəbi üçün yardımçı binaların tikintisi davam etdirilir.
Yığıncaqda rayonun sosial-iqtisadi inkişafına dair statistik göstəricilərə də nəzər salınıb. Bildirilib ki, 2015-ci illə müqayisədə 2016-cı ildə rayon üzrə ümumi məhsul buraxılışının həcmi 46,4 faiz artaraq, 181 milyon 600 min manat olub. Əhalinin gəlirləri 7,6 faiz, kənd təsərrüfatı məhsulunun həcmi 8,2 faiz, sənaye məhsullarının həcmi 29,3 faiz, informasiya və rabitə xidmətlərinin həcmi 0,8 faiz artıb. Bu dövrdə 11 milyon 885,1 min manat dəyərində əsas fondlar istifadəyə verilib, əsas kapitala 77 milyon 699,9 min manat investisiya yönəldilib.
Aqrar sahədə görülən işlərdən danışılarkən diqqətə çatdırılıb ki, Prezident İlham Əliyevin respublikada kənd təsərrüfatının, o cümlədən pambıqçılığın, baramaçılığın və bağçılığın inkişafı, yerli istehsalın artırılması, əhalinin məşğulluğunun yüksəldilməsi barədə verdiyi tapşırıqların icrası istiqamətində rayonda bir sıra tədbirlər görülüb. Ötən il 2332 ton pambıq, 29 min 586 ton buğda, 56 min 872 ton şəkər çuğunduru istehsal edilib. 12,1 hektarda fındıq, 24,4 hektarda xurma, 10 hektarda digər meyvə bağları salınıb. Baramaçılığın inkişafını təmin etmək üçün 3 hektarda 32 min ədəd çəkil tingi əkilib.
Yığıncaqda əhalinin təbii qaz, elektrik enerjisi, rabitə və digər xidmətlərlə təminatının yaxşılaşdırılması istiqamətində görülən işlərdən, təhsil, mədəniyyət, səhiyyə sahələrindəki vəziyyətdən də ətraflı bəhs edilib, mövcud problemlərə toxunulub, onların həlli yollarından və qarşıda duran vəzifələrdən danışılıb.
Bildirilib ki, 2017-ci ildə 3 min hektarda pambıq, 2 min hektarda şəkər çuğunduru əkilməsi, barama istehsalının artırılması, İncəçay üzərində yeni körpünün tikilməsi, Tərtər-Goranboy magistral yolunun və şəhərin küçələrinin asfaltlanması, dövlətimizin başçısının Sərəncamı ilə Tərtər şəhərində çoxmənzilli 24 binanın əsaslı təmiri qarşıda duran əsas vəzifələrdir.
Prezident Administrasiyasının məsul işçisi Arif Novruzov və Milli Məclisin deputatı Sahib Alıyev yığıncaqda çıxış ediblər.