Əddis-Əbəbə, 2 sentyabr, AZƏRTAC

Efiopiyanın aparıcı EBC teleradio korporasiyasının baş direktorunun müavini Mulat Gezahegn Əddis-Əbəbədə AZƏRTAC-ın xüsusi müxbiri Asya Hacızadə ilə görüşdə deyib: “EBC teleradio korporasiyası AZƏRTAC-la və Azərbaycanın digər KİV-ləri ilə əməkdaşlıq etməkdə maraqlıdır”.

M.Gezahegnin sözlərinə görə, o, Azərbaycanın qocaman milli agentliyi AZƏRTAC-ın fəaliyyəti və uğurları barədə təqdim edilən məlumatı çox böyük maraqla dinləyib, çoxlu faydalı və maraqlı informasiya əldə edib, Azərbaycan mediası və bu ölkənin özü barədə indiyə qədər bilmədiyi məqamları “kəşf edib”.

Mulat Gezahegn daha sonra bildirib ki, Azərbaycanda “Azərispeys-1” rabitə peykinin olması onu çox maraqlandırıb. O vurğulayıb ki, Efiopiyanın öz rabitə peykləri yoxdur və belə peykləri Misirdən icarəyə götürür.

“Bu sahədə Efiopiya Azərbaycanla rəqabət apara bilməz”, - deyən Efiopiya televiziyasının nümayəndəsi bildirib ki, onların korporasiyası gələcəkdə AZƏRTAC-la xəbərlər və videomateriallar mübadiləsi sahəsində əməkdaşlıq etməyə şad olar, çünki Azərbaycan agentliyinin multimedia kontenti var.

Efiopiya teleradio korporasiyası rəhbərinin müavini deyib: “Ümumiyyətlə, biz Azərbaycanla birgə işləməkdə maraqlıyıq və sizin təcrübənizdən çox şey öyrənə bilərik”.

M.Gezahegn EBC teleradio korporasiyasının fəaliyyəti barədə ətraflı məlumat verərək bildirib ki, EBC Efiopiyanın bütün ərazisində ingilis, fransız və ərəb dillərində yayımlanır. Onun sözlərinə görə, bu il oktyabr ayında 50 illik yubileyini qeyd edəcək EBC televiziyası Efiopiya ərazisinin 86 faizini, EBC radiosu isə ölkə ərazisinin 98 faizini əhatə edir. Efiopiyada radio 90 il bundan əvvəl yaradılıb. Hazırda korporasiyada 2000-dən çox əməkdaş çalışır. Korporasiya rəhbərinin müavini onu da bildirib ki, onlar ENA dövlət informasiya agentliyi ilə, həmçinin VOLTA və FANA müstəqil agentlikləri ilə sıx əməkdaşlıq edir, onların materiallarını televiziya vasitəsilə translyasiya edir, həftənin müəyyən günlərində bu agentliklərə efir vaxtı ayrılır.

M.Gezahegnin diqqətinə çatdırılıb ki, Azərbaycan rəhbərliyi milli KİV-lərin inkişafına və Azərbaycan haqqında obyektiv informasiya yayılması coğrafiyasının genişləndirilməsi məsələlərinə böyük əhəmiyyət verir. Xüsusi vurğulanıb ki, AZƏRTAC bir sıra beynəlxalq xəbər alyanslarının üzvüdür. Agentliyin beynəlxalq media-məkanda fəaliyyəti sayəsində 2016-cı ildə Azərbaycan paytaxtında iki nüfuzlu media strukturun tədbirləri – Asiya və Sakit okean Ölkələrinin Xəbər Agentlikləri Təşkilatının (OANA) XVI Baş Assambleyası və Xəbər Agentliklərinin V Ümumdünya Konqresi keçiriləcək. Bu tədbirlərdən sonra AZƏRTAC 2016-2019-cu illərdə OANA-da və Xəbər Agentlikləri Ümumdünya Konqresində sədrlik edəcəkdir.

Efiopiya Teleradio Korporasiyası baş direktorunun müavininə bildirilib ki, Azərbaycanın aparıcı informasiya agentliyi olan AZƏRTAC dünyanın 40-a yaxın agentliyi ilə tərəfdaşlıq sazişləri bağlayıb. Dünyanın bir sıra ölkələrində geniş müxbir şəbəkəsi olan AZƏRTAC Efiopiya və Afrika qitəsindəki digər ölkələrlə də əməkdaşlıq etmək niyyətindədir.