CƏMİYYƏT


Ekologiya və Təbii Sərvətlər Nazirliyi arıçılara müraciət edib

Bakı, 9 iyun, AZƏRTAC

Yaz fəslinin gəlişi ilə ölkənin arıçılıq təsərrüfatlarında bal arılarının (Apis mellifera L.) yetişdirilməsi, çoxaldılması, arıçılıq məhsullarının istehsalı və emalı üzrə fəaliyyət aktivləşir. Bununla əlaqədar vətəndaşlar tərəfindən arı ailələrinin yaşadığı qutuların meşə ərazilərində yerləşdirilməsi ilə bağlı Ekologiya və Təbii Sərvətlər Nazirliyinə (ETSN) çoxsaylı müraciətlər edilir.

Nazirliyin mətbuat xidmətindən AZƏRTAC-a verilən məlumata görə, arıçılığın ənənəvi kənd təsərrüfatı sahəsi olmasını, arıçılıq fəaliyyətinin entomofil bitkilərin tozlandırılmasında əvəzsiz əhəmiyyətini nəzərə alaraq Ekologiya və Təbii Sərvətlər Nazirliyi (ETSN) arıçı fermerlərə müraciət edərək bildirir ki, nazirliyin istifadəsində olan bütün növ kateqoriyalı meşə ilə örtülü ərazilərə arı ailələrinin heç bir ödəniş olunmadan, müvafiq qaydada qeydiyyatdan keçmək yolu ilə yerləşdirilməsinə icazə verilir.

Nazirliyin rəhbərliyinin regionlarda əhali ilə keçirilən görüşlərində də vətəndaşlar tərəfindən belə müraciətlər edilir və arıçılıqla məşğul olan fermerlərə meşə sahələrindən bu məqsədlə istifadə üçün müvafiq tövsiyələr verilir.

Çiçəkləmə dövründə arıçı meşə və ekologiya idarələri ilə razılaşdıraraq müəyyən olunmuş ərazilərdə arı qutularını yerləşdirə və özü də onların yanında qala bilər (həmin şəxslərin əksəriyyəti meşəyə öz mal-qarasını da gətirmək istəyir, bu isə meşə üçün ziyanlı olduğuna görə qadağandır). Qeyd edək ki, arıların meşədə saxlanılması, təkcə arılar üçün deyil, həm də meşə bitkiləri üçün, otlaqlar üçün yaxşıdır və bu, ikitərəfli faydalıdır.

Ekologiya və Təbii Sərvətlər Nazirliyi arı ailələrinin yerləşdirilməsi ilə bağlı hər hansı problem yaranarsa yerli meşə idarələrinə və nazirliyin 168 nömrəli “Qaynar Xətt” xidmətinə məlumat verilməsini xahiş edir.

Nazirlikdən həmçinin bildiriblər ki, bəzi işbazlar və şəxsi maraq güdən bir sıra saytlar nazirlik tərəfindən arıçılara verilən bu hüquqlardan sui-istifadə edir, öz maraqları üçün KİV-lərdə yanlış məlumatlar yayır, məsələni özlərinin qazanc mənbəyinə çevirməyə cəhd edirlər.

ETSN olaraq arıçılıqla məşğul olan fermerlərə bir daha müraciət edir ki, arı qutularının meşə ərazilərində yerləşdirilməsi ödənişsizdir və arılarını müəyyən olunmuş ərazilərdə bəsləyə bilərlər. Bununla bağlı hər hansı anlaşılmazlıq yarandığı təqdirdə, bilavasitə yerli meşə idarələrinə və nazirliyə məlumat versinlər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.