CƏMİYYƏT


Ekologiya və Təbii Sərvətlər Nazirliyi təkcə son 3 ayda 160 mindən çox ağac əkib

A+ A

Bakı, 23 mart, AZƏRTAC 

Ekologiya və Təbii Sərvətlər Nazirliyi “Azərbaycan Yaşıllaşdırma və Landşaft Quruluşu” Açıq Səhmdar Cəmiyyətinin (“Azəryaşlandşaft” ASC) tabeli qurumları tərəfindən xidməti ərazilərdə 2016-cı ilin 3 ayında ümumilikdə 160 min 390 ədəd ağac və kol bitkisi əkilib.

Nazirliyin mətbuat xidmətindən AZƏRTAC-a verilən məlumata görə, bunun 84 min 390 ədədi 81 hektar yeni əkin sahəsində, 76 mini isə əvvəlki illərin 185 hektarlıq əkin yerlərində doldurma-bərpa işləri aparılmaqla həyata keçirilib. Belə ki, Zığ-Heydər Əliyev adına Beynəlxalq Aeroportu magistral avtomobil yolunun ətrafındakı ərazilərdə son aylarda 55 hektar sahədə 45 min 175 ədəd ağac əkilib. Respublikanın digər magistral avtomobil yollarının ətrafında, o cümlədən Bakı-Astara və Bakı-Quba magistral avtomobil yolunun Ələt-Salyan və Siyəzən-Şabran hissələrində yeni suvarma sistemləri qurulub. Ələt-Salyan yolunda 8 hektarda 6 min 664 ədəd, Siyəzən-Şabran yolunda isə 3 hektarda 2 min 550 ədəd ağac əkilərək yaşıllıqlar salınıb. Bakı-Şamaxı və Bakı-Qazax magistral avtomobil yollarının ətrafında əvvəlki illərdə salınmış yaşıllıqlarda isə doldurma-bərpa işləri aparılıb və bu işlərə 76 mindən çox ağac və kol bitkisi sərf edilib.

Eyni zamanda, “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na uyğun olaraq Bakının Səbail rayonu Bayıl yamacı-20-ci sahə ətrafında da (Bibiheybət hissəsi) ərazilərin yaşıllaşdırılması işləri davam etdirilib. Bayıl yamacı-20-ci sahə ətrafında 2014-cü ildən 2016-cı ilin I rübünədək yaşıllıqların ümumi sahəsi 72 hektara, əkilmiş ağacların sayı 463 min 274 ədədə çatdırılıb, o cümlədən bu ilin yazında 15 hektarda 30 min ədəd müxtəlif cinsli ağac əkilib, bütün ərazilər müasir damcılı suvarma sistemləri ilə təchiz olunub.

Ümumilikdə ASC tərəfindən xidməti ərazilərdə 2008-ci ildən 2016-cı ilin I rübünədək 3 min 740 hektarda 4 milyon 796 min 100 ədəd ağac və kol bitkisi əkilib və bunun 1 milyon 258 mini zeytundur.

Keyfiyyətli əkin materiallarının yetişdirilməsi sahəsində də “Azəryaşlandşaft” ASC tərəfindən uğurlu və sabit iş aparılır. Bu ilin ilk aylarından ASC-nin tingliklərində 282 min ədədi dibçək və paketlərdə olmaqla ümumilikdə 342 min ədəd müxtəlif cinsli ağac, kol bitkilərinin toxmacar və tinglərin yetişdirilməsinə başlanılıb. 877 min ədəd müxtəlif cinsli ağac və kol bitkilərinin çilingi kökləndirilmək üçün xüsusi quraşdırılıb, suvarma və qızdırıcı sistemlərlə təmin edilmiş istixanalarda ləklərə basdırılıb. Bu çilinglərin 819 min ədədi zeytundur. Bundan əlavə, Eldar şamı, zeytun, sərv, Şərq çinarı, akasiya, şirin badam, daş palıd və digər qiymətli ağac və kol cinslərinin toxumları tədarük edilərək tingliklərə səpilib. Əkin materiallarının yetişdirilməsi ASC-yə payız aylarından başlayaraq özünü keyfiyyətli, kökü bağlı əkin materialları ilə təmin etməyə və yaşıllıqların maya dəyərini aşağı salmağa imkan verəcək.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.