Bakı, 21 noyabr, AZƏRTAC

2015-ci ilin ölkəmizdə “Kənd təsərrüfatı ili” elan edilməsi haqqında Azərbaycan Respublikası Prezidentinin 12 yanvar 2015-il tarixli Sərəncamına və “2016-2025-ci illərdə mədəni bitkilərin genetik mühafizəsi və səmərəli istifadəsi sahəsində Dövlət Proqramı”na uyğun olaraq respublikamızda Azərbaycanın aqrobiomüxtəlifliyinin qorunması və ekoloji təmiz kənd təsərrüfatı məhsullarının əldə edilməsində məktəblilərin fəal iştirakının təmin olunması, bu sahədə onların bilik və bacarıqlarının artırılması məqsədilə Təhsil Nazirliyinin Respublika Ekoloji Tərbiyə və Təcrübəçilik Mərkəzi, Ekologiya və Təbii Sərvətlər və Kənd Təsərrüfatı nazirliklərinin birgə əməkdaşlığı ilə Bakı Ekspo Mərkəzində təşkil edilən 7-ci Azərbaycan Beynəlxalq Ətraf Mühit “Caspian Ecology” sərgisi çərçivəsində noyabrın 16-dan 18-dək “Ekoloji təmiz məhsul və aqrobiomüxtəliflik” mövzusunda müsabiqənin stendi nümayiş etdirilib və Bakı Biznes Mərkəzində məktəblilərin respublika müsabiqəsinin final mərhələsi keçirilib.

Bir il ərzində məktəblilər ekoloji təmiz yerli mədəni bitki sortlarının becərilməsi, yerli heyvan cinslərinin qorunub saxlanılması, kənd təsərrüfatı sərvətlərinin öyrənilməsi, onların səmərəli istifadəsi, bərpası və mühafizəsinə dair nәzәri vә praktik biliklәr öyrәniblər.

Keçirilən müsabiqənin 8 zona mərhələsində 9 nominasiya -“Meyvəçilik”, “Arıçılıq”, “Heyvandarlıq”, “Meşə məhsulları”, “Tərəvəzçilik”, “Subtropik bitkilər”, “Gülçülük”, “Dənli bitkilər”, “Balaca fermer” üzrə 1500 nəfər iştirak edib və onlardan 100 məktəbli yekun mərhələdə iştirak etmək hüququ qazanıb. Final mərhələsində Dağlıq Şirvan zonası üzrə Şamaxı, Qobustan, İsmayıllı, Ağsu, Gəncə-Qazax zonası üzrə Gəncə, Göygöl, Şəmkir, Goranboy, Tovuz, Qazax, Naxçıvan zonası üzrə Naxçıvan, Aran zonası üzrə Göyçay, Salyan, Ağdam, Hacıqabul, Ucar, Yevlax, Bərdə, Lənkəran-Astara zonası üzrə Lənkəran, Şəki-Zaqatala zonası üzrə Şəki, Oğuz, Balakən, Zaqatala, Qax, Bakı-Abşeron zonası üzrə Bakı, Sumqayıt və Şabran rayonlarının orta ümumtəhsil məktəblərinin şagirdlərinin, rayon ekoloji tərbiyə və təcrübəçilik mərkəzlərinin dərnək üzvləri iştirak ediblər.

Noyabrın 18-də Bakı Biznes Mərkəzində keçirilən respublika müsabiqəsinin final mərhələsinin rəsmi açılışında Təhsil Nazirliyinin tabeliyində fəaliyyət göstərən Respublika Ekoloji Tərbiyə və Təcrübəçilik Mərkəzinin direktoru Firuzə Sultanzadə Azərbaycanda aqrobiomüxtəlifliyin qorunması və ekoloji təmiz kənd təsərrüfatı məhsullarının əldə edilməsində məktəblilərin gördüyü işlər barədə ətraflı məlumat verib.

Digər çıxış edənlər - Təhsil Nazirliyinin məktəbdənkənar fəaliyyətin təşkili şöbəsinin müdiri Vasif Məmmədov, Kənd Təsərrüfatı Nazirliyinin bitkiçilik şöbəsinin müdir müavini Seymur Səfərli, Milli Məclisin təbii ehtiyatlar, ekologiya və energetika şöbəsinin sektor rəhbəri Şamil Hüseynov, Ukraynanın Azərbaycandakı səfiri Aleksandr Mişşenko ölkәmizdә aqrar sektorun inkişafının vә gәnc nәslin bu istiqamәtә yönlәndirilmәsinin vacibliyini vurğulayıblar.

Çıxışlardan sonra gənc tədqiqatçılara medallar, diplom və sertifikatlar təqdim edilib.