Bakı, 23 sentyabr, AZƏRTAC

Azərbaycan Respublikasının xarici işlər naziri Elmar Məmmədyarov İqtisadi Əməkdaşlıq Təşkilatına (ECO) üzv dövlətlərin Nazirlər Şurasının növbədənkənar iclasında çıxış edib.

Nazirliyin mətbuat xidmətindən AZƏRTAC-a bildiriblər ki, E.Məmmədyarov çıxışında görüşün təşkilat daxilində son dövrlərdəki fəaliyyət və son zamanlar sürətlə dəyişən mühitdə qurumun öz perspektivlərini müəyyən etməsi baxımından fikir mübadiləsi aparmaq üçün yaxşı imkan olduğunu qeyd edərək deyib: “Bu səbəbdən, hazırkı fürsətdən səmərəli faydalanmalı, həmçinin praktik müzakirələr, o cümlədən təşkilatı həqiqətən də işlək və təsiredici qərarların qəbul olunması üçün istifadə etməliyik.

Bu gün, qlobal iqtisadi fəallığın zəifləməsi, enerji, nəqliyyat və digər qarşılıqlı bağlantılı komponentlərin təsirləri ilə qarşılaşmaq təcrübəsi ölkələrimizin iqtisadi və ticari baxımdan inkişafı üçün daha çox perspektiv vəd edir. Ona görə də nəqliyyatın, ümumən prioritet sahələr arasında əlaqəli məsələlərin inkişafının regional ticarətin artımı üçün mühüm şərt olmasını vurğulamaq vacibdir”.

Nazir vurğulayıb ki, regional və beynəlxalq tərəfdaşlar ilə əməkdaşlıq çərçivəsində Azərbaycanın təşəbbüskarı olduğu və həyata keçirdiyi enerji və nəqliyyat layihələri regional əməkdaşlığa töhfə verib. Biz fəal şəkildə beynəlxalq “Şimal-Cənub” və “Şərq-Qərb” nəqliyyat dəhlizinin həyata keçirilməsində iştirak edirik. Trans-Xəzər Beynəlxalq Marşrutunun yaradılması və gələn il istifadəyə verilməsi, gözlənilən Bakı-Tbilisi-Qars dəmir yolu layihəsinin tikintisi əhəmiyyətli layihələr sırasındadır.

O əminliklə qeyd edib ki, “Şimal-Cənub” nəqliyyat dəhlizinin tərkib hissəsi olan Qəzvin-Rəşt-Astara (İran)–Astara (Azərbaycan) dəmir yolu layihəsinin erkən tamamlanması iqtisadi artıma yeni stimul verəcək, layihəyə cəlb olunan ölkələr, eləcə də bütün region üçün nəqliyyat imkanlarını genişləndirəcək. Ümumi maraq doğuran digər perspektivli sahə isə “Gündəlik 2030” və Davamlı İnkişaf Məqsədlərinə uyğun olaraq davamlı enerji ehtiyatları sahəsi də daxil olmaqla davamlı inkişafda birgə fəaliyyətin gücləndirilməsidir. Biz son meyilləri və ECO regional elektrik enerjisi bazarının yaradılması üzrə inkişafı yaxından müşahidə edirik. Azərbaycan, həmçinin Bakı şəhərində bərpa olunan enerjiyə dair Məlumat İnformasiya Şəbəkəsinin yaradılması təşəbbüsünü irəli sürüb.

Bildirilib ki, Azərbaycan özünün əməli fəaliyyəti ilə ECO-nun məqsəd və hədəflərinə töhfə verməkdə davam edir. Bu il ölkəmiz regionda daxili ticarət və sərmayə, o cümlədən ECO regionunda iqtisadi artım və inkişafın gücləndirilməsinə töhfə verəcək IV ECO Biznes Forumuna ev sahibliyi edəcək.

Ekoloji problemləri həll etmək üçün regional fəaliyyətin inkişafı ECO çərçivəsində əməkdaşlığın prioritet sahələri arasındadır. Bu gündəliyin tərkib hissəsi kimi Azərbaycan nəzərdə tutulan milli səviyyədə müəyyən edilmiş töhfələrini təqdim etmək və İqlim Dəyişikliyinə dair Paris Sazişini imzalamaqla qlobal iqlim sabitliyinə nail olunması istiqamətində iqlim dəyişikliyinə qarşı mübarizə üzrə beynəlxalq səylərə qoşulub.

Nazir diqqətə çatdırıb ki, elm və tədqiqat sahəsində hazırkı səmərəli əməkdaşlıq ECO layihələrinin müəyyənləşdirilməsi və hazırlanması işində təşkilatın potensialını artırır. “Bu baxımdan, biz inanırıq ki, Bakı şəhərində ECO Tədqiqat Mərkəzinin tez bir zamanda yaradılması səmərəli iqtisadi layihələr, tədqiqat proqramları, o cümlədən region ölkələri üçün iqtisadi modellərin hazırlanması yolu ilə ECO-nun gələcək inkişafına öz töhfəsini verəcək.

Biz, həmçinin regional xarakter daşıyan iqtisadi layihələrin uğurla həyata keçirilməsi üçün regional səviyyəli faydalı layihələrin, habelə BMT-nin ixtisaslaşmış qurumları və beynəlxalq maliyyə institutları ilə daha sıx əməkdaşlığın təşkilinin təşviq edilməsini məqsədəuyğun hesab edirik”, - deyə E.Məmmədyarov bildirib.

O qeyd edib ki, bütövlükdə, fəaliyyətin səpələnməsinin əvəzinə üzv dövlətlər və bütün region üçün ümumi olan nəqliyyat, alternativ enerji, ticarət və sərmayələr, kənd təsərrüfatı, informasiya texnologiyaları və turizmin daxil olduğu əsas prioritetlərə diqqət yetirməliyik.

Şuranın bundan əvvəlki iclaslarında təşkilat çərçivəsində əməkdaşlığın mövcud mexanizmini inkişaf etdirmək üçün kreativ yol və vasitələrin tapılmasının zəruriliyini vurğulamışdıq. Hazırda hazırlanmaq mərhələsində olan yeni ECO Baxış 2016-2025 sənədi bütün üzv dövlətlərin maraqlarını əks etdirməlidir. Bu islahatlar prosesi ECO daxilində hazırkı institutlar və fəaliyyətin səmərəliliyinin artırılması məqsədi daşımalıdır.

Azərbaycanın ECO-nun daha da inkişafı naminə fəaliyyətlərin hazırlanması imkanları ilə təmin edə biləcək birgə səylərlə müşayiət olunan islahatlar prosesini dəstəklədiyini diqqətə çatdıran nazir deyib: “Regionda uzunsürən münaqişələr həll olunmadan, təhlükəsizlik və sabitlik təmin edilmədən ECO hərtərəfli regional əməkdaşlığın faydasından bəhrələnməkdə uğursuzluğa düçar olacaq. Azərbaycan ərazilərinin Ermənistan tərəfindən hərbi işğalının davam etməsi iqtisadi inkişaf üçün hələ də qeyri-sabitlik və maneə mənbəyi olaraq qalır.

Ermənistan silahlı qüvvələrinin işğal olunmuş Azərbaycan torpaqlarından çıxarılması, həmçinin qaçqın və məcburi köçkünlərin öz yurd-yuvalarına qayıtmasının təmin edilməsi təkcə Cənubi Qafqazda sülh və təhlükəsizliyə töhfə verməyəcək, eyni zamanda, tamhüquqlu region daxili əməkdaşlığı gücləndirəcək”.