SİYASƏT


Elmar Məmmədyarov: Bakı-Tbilisi-Qars dəmir yolunun tikintisi bu ilin sonunadək yekunlaşacaq YENİLƏNİB

Bakı, 19 iyul, AZƏRTAC

İyulun 19-da Bakıda Azərbaycan, Türkmənistan və Türkiyə xarici işlər nazirlərinin üçtərəfli görüşü keçirilib.

AZƏRTAC xəbər verir ki, görüşdən sonra nazirlərin iştirakı ilə mətbuat konfransı təşkil olunub.

Azərbaycanın xarici işlər naziri Elmar Məmmədyarov görüşün əhəmiyyətindən danışıb, bir sıra önəmli məsələlərin müzakirə olunduğunu bildirib. Nazir deyib ki, Azərbaycan, Türkmənistan və Türkiyə arasında çox maraqlı böyük layihələr mövcuddur.

Bu il Azərbaycan-Türkiyə və Azərbaycan-Türkmənistan diplomatik əlaqələrinin 25 illiyinin qeyd edildiyini xatırladan Elmar Məmmədyarov deyib ki, üçtərəfli görüşdə həyata keçirilən birgə layihələr, siyasi, iqtisadi əlaqələrin dərinləşdirilməsi, mədəniyyət, humanitar, nəqliyyat sahələrində əməkdaşlıq və qarşılıqlı maraq doğuran digər məsələlər ətrafında müzakirələr aparılıb. Nazir Aşqabadda qəbul edilmiş 2015-2017-ci illər üçün Azərbaycan-Türkiyə-Türkmənistan əməkdaşlığına dair Çərçivə Proqramına toxunub, bu yol xəritəsinin əhəmiyyətini qeyd edib, bəzi məsələlərin artıq həllini tapdığını bildirib. “Çox güman ki, növbəti görüşə Türkmənistan ev sahibliyi edəcək. 2018-2020-ci illər üçün Azərbaycan-Türkiyə-Türkmənistan əməkdaşlığının yeni yol xəritəsinin hazırlanması üzərində ekspertlər səviyyəsində işin başlanması üçün artıq tapşırıqlar verilib”, - deyə E.Məmmədyarov əlavə edib.

Nazir həmkarlarını Ermənistan-Azərbaycan, Dağlıq Qarabağ münaqişəsinin həlli üzrə danışıqların hazırkı vəziyyəti barədə də geniş məlumatlandırdığını bildirib, görüşün yekununda Bakı Bəyannaməsinin imzalandığını vurğulayaraq deyib: “Biz Xəzər tranzit keçidləri üzrə birgə texniki komitənin iclaslarını keçirmişik. Həmçinin ölkələrimiz arasında dəmir yolları səviyyəsində danışıqlar aparılıb, o cümlədən nəqliyyat nazirləri, dəniz limanlarının, gömrük komitələrinin rəhbərləri, sərhədçilər səviyyəsində görüşlər keçirilib. Bəzi məsələlər artıq öz həllini tapıb. Deyə bilərəm ki, bu, ildən ilə daha da gücləndiriləcək. Mövlud bəyin söylədiyi kimi, Bakı-Tbilisi-Qars layihəsinin tikintisi bu ilin sonunadək yekunlaşacaq və əlbəttə, böyük imkanlar açılacaq”.

Türkiyənin xarici işlər naziri Mövlud Çavuşoğlu da görüşdə regional mövzuların, habelə üç ölkə arasında bir çox sahələrdə, o cümlədən diplomatik, iqtisadi sahələrdə əməkdaşlığın gücləndirilməsinə dair məsələlərin müzakirə olunduğunu qeyd edib. “Bugünkü görüşümüzdə Azərbaycan-Türkiyə-Türkmənistan əməkdaşlığının gücləndirilməsi, beynəlxalq əlaqələrimizin, o cümlədən Birləşmiş Millətlər Təşkilatı çərçivəsində münasibətlərimizin genişləndirilməsi yollarını müzakirə etdik. Ölkələrimiz arasında iqtisadi, ticarət əlaqələri də çox önəmlidir. Bu əlaqələri genişləndirmək üçün güclü potensial var”, - deyə M.Çavuşoğlu vurğulayıb.

Türkiyəli nazir deyib ki, Bakı-Tbilisi-Qars dəmir yolunun sınaq müddəti başlayır. Layihə tamamlanıb, çatışmazlıqlar həllini tapıb və bu il ərzində artıq səfərlər başlayacaq. Amma ölkələrimiz arasında həyata keçiriləcək layihələr çoxdur. Limanlarla bağlı layihələr də var.

“Mən, həmçinin iyulun 4-də Azərbaycanın Füzuli rayonunun Alxanlı kəndinə ermənilərin xaincəsinə hücumu nəticəsində şəhid olan uşağa Allahdan rəhmət diləyirəm, şəhid olanların ailələrinə və qardaş Azərbaycan xalqına da başsağlığı verirəm. Biz Ermənistanın beynəlxalq hüquq çərçivəsində hərəkət etməsini və bu cür təhrikedici hücumlardan əl çəkməsini tələb edirik. Xatırladırıq ki, Ermənistan silahlı qüvvələri Azərbaycanın işğal olunmuş torpaqlarından dərhal çıxarılmalıdır. Dağlıq Qarabağ münaqişəsi beynəlxalq hüquq çərçivəsində və Azərbaycanın ərazi bütövlüyü əsasında həll olunmalıdır. Biz beynəlxalq aləmi, Minsk qrupunu daha fəal olmağa çağırırıq. Türkiyə hər zaman Azərbaycanın yanındadır və hər bir dəstəyi verməyə hazırdır. Mən, həmçinin Türkiyədə ötən il baş vermiş xain dövlət çevrilişi cəhdinin ildönümündə dost və qardaş Türkmənistana və Azərbaycana bizlərə verdikləri dəstəyə görə təşəkkür edirəm”, - deyə M.Çavuşoğlu əlavə edib.

Türkmənistan Nazirlər Kabineti Sədrinin müavini, xarici işlər naziri Rəşid Meredov qeyd edib ki, görüşdə bir sıra önəmli məsələlər, o cümlədən enerji, ticarət və mədəniyyət sahələrində əməkdaşlığın müxtəlif istiqamətləri üzrə müzakirələr aparılıb. Nazir deyib: “Biz iqtisadi, siyasi, energetika, mədəniyyət sahələrində münasibətləri genişləndirmək niyyətindəyik və nəzərdə tutulanların hamısını həyata keçirməyə hazırıq. Bugünkü görüşdə müzakirə olunan məsələlərdən biri də dövlət başçılarının Türkmənistanda keçirilməsi nəzərdə tutulan birinci üçtərəfli Zirvə görüşü ilə bağlı idi. Nazir Məmmədyarov da qeyd etdiyi kimi, bu il Türkmənistan-Azərbaycan və Türkmənistan-Türkiyə diplomatik əlaqələrinin 25 ili tamam olur. Biz bu əlaqələrə böyük əhəmiyyət veririk”.

Sonra jurnalistlərin sualları cavablandırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.