İQTİSADİYYAT
Elmir Vəlizadə: “Bakutel ” beynəlxalq sərgisi xarici şirkətlər üçün böyük maraq kəsb edir
Bakı, 1 dekabr, Xatirә Cәfәrova, AZƏRTAC
“Bakutel ” Azərbaycan Beynəlxalq telekommunikasiya və informasiya texnologiyaları sərgi və konfransı xarici şirkətlər üçün böyük maraq kəsb edir. Dekabrın 2-dən 5-dək Bakıda keçiriləcək “Bakutel 2015” beynəlxalq sərgisində 200-dən artıq şirkətin iştirakı təsdiq olunub.
AZӘRTAC xəbər verir ki, bu barədə rabitə və yüksək texnologiyalar nazirinin müavini Elmir Vəlizadə beynəlxalq sərginin açılışına həsr olunmuş mətbuat konfransında məlumat verib.
Qeyd olunub ki, yeni şirkətlərin diqqətini cəlb edən sərgidə bu il debütantların sayı iştirakçıların ümumi sayının 15 faizini təşkil edir. Sərgidə ilk dəfə olaraq “AVAYA”, “Google”, “Laboratoriya Kasperskoqo” və digər aparıcı şirkətlər iştirak edir. İştirakçıların 40 faizi “Bakutel”in daimi eksponentləridir. Sərgi iştirakçıları arasında aparıcı informasiya-kommunikasiya texnologiyaları (İKT) şirkətləri, Azərbaycanın mobil rabitə operatorları, internet provayderləri, sistem inteqratorları və tanınmış brendlərin distribüterləri yer alır. Ənənəvi olaraq, sərgidə Rabitə və Yüksək Texnologiyalar Nazirliyinin dəstəyi ilə iştirak edən bir sıra ölkələrin milli stendləri təqdim olunacaq. Ümumilikdə, sərgidə 15 milli stendin iştirakı gözlənilir. Sərgidə informasiya texnologiyaları sahəsi üzrə yeni nəsil və milli genişzolaqlı internet üzrə həll variantları, 4-5G mobil texnologiyalar, fiber-optik və “bulud” texnologiyaları üzrə xidmətlər, elektron-hökumət, “Smart-Azərbaycan” layihəsi üçün yeni texnologiyalar, eləcə də informasiya təhlükəsizliyi yer alır.
“İTE Qrup” şirkətinin icraçı direktoru Edvard Stroon bildirib ki, İnformasiya texnologiyaları üzrə məhsul və xidmətlərin nümayiş olunduğu əsas meydança kimi, “Bakutel” möhkəm əlaqələrin qurulduğu və yeni müəssisələrin təsis olunduğu başlıca biznes-platformaya çevrilib. Sərginin ziyarətçiləri yaxın gələcəkdə ölkə bazarına daxil olacaq yüksək texnologiyalı həll variantları və xidmətlərlə tanış olacaqlar. “Bakutel” sərgisi bu il də yeni bilik və ideyaların axınına, eləcə də yeni əlaqələrin qurulmasına şərait yaradacaq.
Beynəlxalq tədbir çərçivəsində keçiriləcək çoxsaylı görüşlər, forumlar və konfranslarda İKT sahəsi üzrə ən son nailiyyətləri, eləcə də Azərbaycanda İKT sektorunun inkişaf perspektivləri müzakirə olunacaq. Sərgidə işgüzar görüş və danışıqlarla yanaşı, bir sıra sürprizlər, eləcə də müsabiqə və viktorinalar təşkil ediləcək.
Qeyd olunub ki, uzun illər “Bakutel” sərgisindən öz dəyərli dəstəyini əsirgəməyən Rabitə və Yüksək Texnologiyalar Nazirliyi sərginin inkişafında və formalaşmasında mühüm rol oynayıb. BMT, Beynəlxalq Telekommunikasiya İttifaqı və Rabitə sahəsində Regional Birlik kimi beynəlxalq təşkilatların dəstəyi, eləcə də Dünya Sərgi Sənayesi Assosiasiyası tərəfindən sərgiyə verilmiş keyfiyyət nişanı “Bakutel”in beynəlxalq nüfuzunu bir daha təsdiq edir.
Sərginin qeydiyyat üzrə sponsoru “Eurodesign” şirkətidir. Sərgidə “startap” şirkətlərinə iş üçün xüsusi yer ayrılıb. Bundan əlavə, İKT texnologiyaları sahəsi üzrə dövlət layihələri təqdim olunacaq. Sərginin təşkilatçıları qismində “Iteca Caspian” və “Caspian Event Organisers” şirkətləri çıxış edirlər.
Rabitə və yüksək texnologiyalar nazirinin müavini Elmir Vəlizadə Azərbaycanın ikinci telekommunikasiya peyki ilə bağlı sualı cavablandıraraq bildirib ki, “Azerspace-2” peykini orbitə "Arianespace" şirkəti çıxaracaq. Bununla bağlı "Bakutel-2015" beynəlxalq sərgi-konfransı çərçivəsində sənədin imzalanacağı gözlənilir. "Azerspace-2/Intelsat 38" peykinin orbitə 2017-ci ildə çıxarılması nəzərdə tutulur. Yeni peykin xidmət zonası Avropa, Asiya, Yaxın Şərq və Afrika ölkələrini əhatə edir.
Qeyd edilib ki, Azərbaycanın ikinci peyk proqramının dəyəri 191,36 milyon ABŞ dolları təşkil edəcək. Bu vəsait “Azerspace-2/Intelsat 38” ikinci geostasionar peykin tikintisinə və yeni yerüstü peyk avadanlığının alınmasına sərf olunacaq.