Berlin, 25 yanvar, AZƏRTAC

Ermənistan diplomatiyasına növbəti ləzzətli şapalaq dəydi. Bu ölkənin nümayəndə heyətinin Dağlıq Qarabağın Azərbaycana məxsus olduğunu təsdiq edən qətnamənin AŞPA-da qəbul edilməsinə yol verməmək üçün göstərdiyi bütün cəhdlər iflasa uğradı. Yanvarın 24-də plenar iclasda Ukrayna nümayəndə heyətinin başçısı, elm, mədəniyyət, təhsil və media komitəsinin sədri Vladimir Aryevin “Avropada jurnalistlərə və mətbuat azadlığına hücumlar” mövzusunda məruzəsi dinlənilib.

Ermənistan nümayəndə heyətinin öz ampluasına uyğun coşub özündən çıxması ilə müşayiət olunan dinləmələrin və sərt müzakirələrin yekunlarına görə qəbul edilən qətnamənin 9-cu bəndində Dağlıq Qarabağın Azərbaycana, Abxaziya və Cənubi Osetiyanın Gürcüstana, Dnestryanı bölgənin Moldovaya məxsus olması növbəti dəfə təsdiq edilib, həmin əraziləri nəzarətdə saxlayan rejimlərin separatçı mahiyyəti ("de facto controlled by separatist regimes") qabardılıb, bu ərazilər “qanunsuzluğun hökm sürdüyü tamamilə qeyri-şəffaf zonalar” ("totally non-transparent and lawless areas") adlandırılıb. Ermənistan nümayəndə heyətinin bu müddəaları çıxarmaq ilə bağlı düzəliş etmək üçün iki uğursuz cəhdi təyini-müqəddərat nəzəriyyəsindən infuzoriya və amöb mütəxəssisi Şavarş Koçaryandan daha yaxşı başı çıxan AŞPA üzvlərinin əksəriyyəti tərəfindən rədd edilib. Yolunu azaraq səhvən XİN-ə gəlib çıxmış S.Koçaryan bu yaxınlarda tarix sahəsində bilikləri ilə “parlayaraq” xatırladıb ki, Azərbaycan Respublikası dünyanın xəritəsində cəmi 100 il əvvəl yaranıb, amma o, əlavə etməyi unudub ki, Ermənistan Respublikası da elə həmin xəritədə ilk dəfə nə bir gün tez, nə də bir gün gec, məhz həmin gün peyda olub. Cəhənnəm olsun Koçaryan. İndi o, ölkəsi üçün növbəti rüsvayçı qətnamədə uzun müddət “konfet” axtarmalı olacaq.

Biz prinsipial mövqeyinə və Ermənistan nümayəndə heyətinin şantaj və təhdidlərindən çəkinmədiyinə görə məruzəçi Vladimir Aryevə təşəkkür edirik, Azərbaycanın Avropa Şurasındakı nümayəndə heyətini və daimi nümayəndəlikdəki diplomatlarımızı bu sanballı işə görə təbrik edirik.

Fürsət düşmüşkən, Aryevə təzyiqlər barədə: Ermənistan nümayəndə heyətinin marginal səviyyəsini və onun xanım üzvlərinin küçə qadınları kimi vay-şivən qoparmaq istedadını belə bir fakt da təsdiq edir ki, nüfuzlu məruzəçini guya onun ulu nənəsinin “azərbaycanlı” olmasında ittiham ediblər (məhz ittiham ediblər). Ah bu “azərbaycanlı ulu nənələr!” Gör onlar nə boyda “fəlakətə” səbəb olublar, bədbəxt ermənilərin nə qədər qanını içiblər! Ermənistanın AŞPA-dakı nümayəndə heyətinin üzvü xanım Rustamyana çətin çatsın ki, hesabat müəllifinin təkcə ulu nənəsi deyil, lap bütün nəsli azərbaycanlı olsa belə, onun məruzəsi AŞPA-nın BÜTÜN tərkibinin sərverməsinə çıxarılır və burada da belə deyək də, heç də hamının nəsil şəcərəsində “azərbaycanlı ulu nənə” kimi bir sərvət yoxdur və onların azad səsvermə zamanı ulu nənənin “iz qoyduğu” bəndlərdə ermənilərin düzəlişlərini dəstəkləmək imkanı var.

Ancaq burası da var ki, Şavarş Koçaryanın və bütün Ermənistan nümayəndə heyətinin səviyyəsindən intəhasız danışmaq olar.

Qəbul edilmiş qətnamə ilə bağlı Emin Hüseynov başda olmaqla, siyasi mühacirlər sırasından bir qrup üzüdönüyün səylərini xatırlamaq da xüsusi aktuallıq kəsb edir. Onlar bu günlərdə AŞPA-ya müraciət edərək, qurumu bütün Azərbaycan nümayəndə heyətinin səsvermə hüququnu dayandırmağa çağırıblar. Hesab etmək olar ki, bu addım belə mühüm səsvermə ərəfəsində, əvvələn, sifarişçilərin qrantlarının əvəzini ödəmək, ikincisi, sözügedən qətnaməni darmadağın etməkdə erməni nümayəndə heyətinə kömək etmək məqsədi ilə atılıb. Bu petisiyanı imzalayan “vətəndaş cəmiyyətinin fəalları” deyilən 58 nəfər arasında yaxın günlərdə Prezident İlham Əliyevin Fərmanı ilə əfv olunanlar çoxdur.

Vüqar Seyidov

AZƏRTAC-ın xüsusi müxbiri

Berlin