DÜNYA
Ermənistanın “mavi yanacaq”la bağlı borcu 300 milyon dollara çatıb
Bakı, 20 sentyabr, AZƏRTAC
Ermənistanda vəziyyət gündən-günə ağırlaşır. İflas strateji sahələrdə özünü daha qabarıq göstərir, xüsusən də enerji sektorunda. İşğalçı ölkənin “mavi yanacaq”la bağlı borcu artıq 300 milyon dollara çatıb. Ona görə də hökumət enerji tariflərinə yenidən baxmağı qərara alıb. Qiymət artımının qaçılmaz olduğu bildirilir. Əks təqdirdə, Ermənistan Elektrik Şəbəkəsi tamamilə çökəcək. Qiymətlər artmasa, 2-3 ildən sonra vəziyyət daha kritik ola bilər.
Ermənistanda sonuncu dəfə ötən ilin avqustunda “mavi yanacağ”ın qiyməti qaldırılıb. Bundan sonra ölkəni etiraz dalğası bürüdü. Polis zorakılığı ilə müşahidə olunan aksiyalar belə hökuməti qərarından döndərmədi. Həmin ərəfədə Ermənistan Elektrik Şəbəkəsi iddia edirdi ki, artımdan sonra problemlər həllini tapacaq. Amma zaman əksini göstərdi. Ermənistanın Enerji və Təbii Ehtiyatlar Nazirliyindən bildirilir ki, “mavi yanacağ”ın qiyməti artandan sonra elektrik enerjisində də qiymət artımı olacaq.