MƏDƏNİYYƏT
“Euronews” telekanalı "Muğam aləmi" Beynəlxalq Muğam Festivalı barədə süjet yayımlayıb VİDEO
Bakı, 21 mart, AZƏRTAC
“Euronews” telekanalında Bakıda keçirilən "Muğam aləmi" Beynəlxalq Muğam Festivalı barədə süjet yayımlanıb.
AZƏRTAC xəbər verir ki, süjetdə Festivalın ənənəvi olaraq Heydər Əliyev Fondunun, Azərbaycan Mədəniyyət və Turizm Nazirliyi və Bəstəkarlar İttifaqının təşkilatçılığı ilə iki ildən bir Azərbaycanın paytaxtı Bakıda keçirildiyi bildirilir.
Süjetdə qeyd edilir ki, Festival çərçivəsində Bakıda və Azərbaycanın regionlarında dünyanın tanınmış musiqiçilərinin iştirakı ilə elmi simpozium və muğam müsabiqələri təşkil olunur. Azərbaycanın milli musiqi janrlarından biri olan muğam 2008-ci ildən UNESCO-nun qeyri-maddi mədəni irs siyahısına daxil edilib.
Həmçinin süjetdə Azərbaycan Bəstəkarlar İttifaqının sədri Firəngiz Əlizadənin və tanınmış musiqiçi Əlirza Qorbaninin festivalla bağlı fikirləri də səslənib. Bildirilir ki, tanınmış muğam ustalarının bu sahədəki nəzəri və praktiki təcrübələri Qərb dinləyicisinə Azərbaycanın müasir mədəni həyatı ilə də tanış olmaq imkanı yaradır.
Telekanalın yayımladığı süjetdə Festival çərçivəsində Azərbaycanın tanınmış musiqiçisi və caz-muğam janrının banisi Vaqif Mustafazadənin xatirəsinə həsr edilən konsert barədə məlumat da yer alır. Tamaşaçıların diqqətinə çatdırılır ki, "Muğam aləmi" Beynəlxalq Muğam Festivalı iki ildən sonra Azərbaycanın paytaxtı Bakıda yenidən təşkil ediləcək.