MƏDƏNİYYƏT
Fərəh Ələkbərli: “Zamanın izləri” sərgisi regionda yaşayan gənclərin müasir incəsənətə marağını artıracaq
Qax, 9 iyul, Mustafa Dadaşov, AZƏRTAC
“Zamanın izləri” adlı sərginin əsas məqsədi regionda yaşayan əhalinin, xüsusilə də gənclərin müasir incəsənətə olan marağını artırmaq, mümkün qədər çox insanı müasir incəsənətlə məşğul olmağa cəlb etməkdir.
AZƏRTAC xəbər verir ki, bu sözləri YARAT Müasir İncəsənət Məkanının Qaxda təşkil etdiyi “Zamanın izləri” adlı sərginin kuratoru Fərəh Ələkbərli jurnalistlərə müsahibəsində deyib.
O bildirib ki, sərgi üçün seçilən əsərlərin hər biri gündəlik həyatımızı əks etdirir. “Bu əsərlərdə gündəlik həyatımızda bəzən fikir vermədiyimiz, o qədər də əhəmiyyətli hesab etmədiyimiz hadisələr insanlar tərəfindən canlandırılır və müasir incəsənətin müxtəlif növlərində öz əksini tapır”, - deyə F.Ələkbərli qeyd edib.