Qusar, 27 iyun, Elxan Yusifli, AZƏRTAC

Şimal bölgəsində turistlərin ən çox üz tutduqları məkanlardan sayılan Şahdağ Qış-Yay Turizm Kompleksi iyunun 15-dən etibarən yay mövsümünü açıq elan edib. Əyləncə-istirahət kompleksləri arasında özünəməxsus xidmətləri ilə seçilən mərkəzdə bu yay mövsümündə də turistlər üçün fərqli istirahət, əyləncə və gözəl təbiətdən zövq almaq imkanı yaradılıb.

AZƏRTAC xəbər verir ki, isti yay günlərində sərin havası və füsunkar təbiəti ilə seçilən Şahdağ Qış-Yay Turizm Kompleksində turistlər üçün 15-ə yaxın müxtəlif əyləncə və idman oyunu nəzərdə tutulub. Mərkəzə gələn qonaqlara macəralar parkı, kvadrosikllər, dağ velosipedi, peyntbol, atla gəzinti və sair xidmətlər təklif olunur. Bu idman növlərindən istifadə etmək üçün təcrübəli təlimatçılar turistlərə yardımçı olurlar. Burada kiçik yaşlı uşaqların (12 yaşa qədər) nəzarət altında əylənməsi üçün xüsusi qalalar da qurulub.

Türkiyənin Adana şəhərindən ölkəmizə qonaq gələn Füsun Tunca AZƏRTAC-a müsahibəsində Şahdağ Qış-Yay Turizm Kompleksində yaradılan şəraitə heyran qaldığını bildirib: “Bakı şəhərində bir neçə dəfə olmuşam. Amma Qusarda yerləşən bu gözəl istirahət mərkəzinə ilk dəfədir ki, gəlirəm. Artıq iki gündür burada oteldə qalırıq. Çox bəyəndim və gördüklərimdən məmnun qaldım. Dağların arasında belə bir möhtəşəm mərkəz yaradılıb. Buranın təbiəti çox gözəldir”.

Balaca oğlunun doğum gününü istirahət mərkəzində qeyd edən Bakı şəhər sakini Vüsal Xanzadayev kompleksdə uşaqlar üçün yaradılan şəraitdən razılığını bildirərək deyib: “Bu gün oğlumun 6 yaşı tamam olur. Ailəmizlə birlikdə bura gəlmişik. Balacaların əylənməsi üçün istirahət mərkəzində hər cür şərait yaradılıb. Onlara bundan böyük hədiyyə edə bilməzdim. Qış aylarında da xizək sürməyə gəlirəm. Çox möhtəşəm istirahət mərkəzidir. Bu cür şəraiti yaratdığına görə dövlətimizin başçısına minnətdarlığımı bildirirəm”.

Mərkəzə gələn qonaqlar daha çox aktiv istirahətə üstünlük verirlər. Odur ki, əsas məqsəd təqdim olunan idman növlərinin sayını artırmaq və turistləri ətraf kəndlərə səyahətə cəlb etməkdir. Qusarın Ləzə kəndinə səyahət, buradakı füsunkar təbiət mənzərələrinə əyani baxış təqdim olunan yeniliklər sırasındadır.

Rusiyada yaşayan həmvətənimiz Moskva Dövlət Beynəlxalq Münasibətlər İnstitutunun IV kurs tələbəsi Ülkər Tağıyeva da həftəsonunu Şahdağ Qış-Yay Turizm Kompleksində keçirir. İkinci dəfədir bu turizm mərkəzinə gəldiyini deyən Ü.Tağıyeva təəssüratlarını bölüşərək bildirib: "İlk dəfə qışda xizək sürməyə gəlmişəm. Kompleksdə yaradılan şərait ürəyimcədir. Buradakı otellərdə komfortlu şərait var. İnsanların rahat istirahət etməsi üçün hər cür şərait yaradılıb. Dağların əhatəsində yerləşən bu istirahət məkanında ən çox bəyəndiyim isə təmiz hava və əzəmətli dağlardır”.

Mərkəzdə qiymətlər əyləncə növünə və xidmətdən yararlanma müddətinə görə təyin olunub. Məsələn bir dəfə kanat yolu ilə səyahət üçün böyüklər 7, balacalar isə 4 manat ödəməlidir. Bununla yanaşı, 11 manat müqabilində dağ velosipedindən, 20 manat ödəməklə isə bobkart, trotinet və kvadrasikldən istifadə etmək olar. Mərkəzə gələn ailələrə müxtəlif güzəştli əyləncə paketləri də təqdim olunur.

Mərkəzdə, həmçinin həftəsonu musiqi sədaları altında pikniklər və digər maraqlı əyləncələrin keçirilməsi üçün də əlverişli şərait yaradılıb.

Bu yay mövsümündə istirahət mərkəzində ilk dəfə olaraq açıq havada hovuz istifadəyə veriləcək və burada müxtəlif su əyləncələri təşkil ediləcək.