MƏDƏNİYYƏT


Fəxri xiyabanda Zəfər Nemətov anılıb

Bakı, 7 iyun, AZƏRTAC 

Fəxri xiyabanda Azərbaycanın görkəmli rejissoru, Əməkdar İncəsənət Xadimi, pedaqoq Zəfər Nemətovun anım tədbiri keçirilib.

AZƏRTAC xəbər verir ki, xatirə mərasimində Mədəniyyət və Turizm Nazirliyinin rəsmiləri, mədəniyyət və incəsənət xadimləri, rejissorun ailə üzvləri iştirak edib.

Zəfər Nemətovun oğlu, Azərbaycan Teatr Xadimləri İttifaqının sədri, Akademik Milli Dram Teatrının bədii rəhbər-direktoru, Xalq Artisti Azərpaşa Nemətov atasının Azərbaycan teatrının inkişafındakı xidmətlərindən danışıb, onun quruluş verdiyi tamaşaların bədii-estetik həllindən bəhs edib.

Azərpaşa Nemətov qeyd edib ki, Zəfər Nemətov Azərbaycan teatrında təkcə rejissor kimi yox, pedaqoq, özündən sonra bizim teatra yüzlərlə tələbə bəxş edən müəllim kimi hörmət və ehtiramla yad edilir: “O, bütün həyatını Azərbaycan xalqı və bizim böyük mədəniyyətimiz üçün həsr edib. Zəfər Nemətovun görmək istədiyi bütün işləri biz davam etdirməliyik. O, görkəmli rejissor kimi qısa və mənalı ömür yaşayıb. Eyni zamanda, deyə bilərəm ki, həyatı çətin keçsə də, özündən sonra silinməz izlər qoyub. Bu gün Azərbaycan Teatr Xadimləri İttifaqının binası onun zəhməti və xidməti nəticəsində yaranıb. Anım mərasimində iştirak edən bütün şəxslərə, o cümlədən Mədəniyyət və Turizm Nazirliyinin nümayəndələrinə minnətdarlığımı bildirirəm. Zəfər Nemətovun xatirəsi sizin simanızda əziz tutulur və bu ehtiram hissinə görə hər birinizə ailəmiz adından təşəkkür edirəm”.

Qeyd edək ki, Zəfər Nemətov 1917-ci il iyunun 6-da Bakıda anadan olub. 1931-ci ildən 1941-ci ilədək Azərbaycan Dövlət Gənc Tamaşaçılar Teatrında aktyor, 1942-ci ildən 1953-cü ilədək quruluşçu rejissor, 1954-cü ildən 1969-cu ilədək isə baş rejissor vəzifəsində çalışıb. Gənc Tamaşaçılar Teatrında “Məlik Məmməd”, “Müfəttiş”, “Qaraca qız”, “Yaşar”, “Romeo və Culyetta”, “Komsomol poeması”, “Əlvida Hindistan” və başqa tamaşalara quruluş verib. Zəfər Nemət 1971-ci il noyabrın 19-da 54 yaşında vəfat edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.