Vaşinqton, 3 mart, AZƏRTAC 

Martın 2-də Florida ştatının Qalfport şəhərində yerləşən Stetson Universitetinin Hüquq Kollecində beynəlxalq hüquq üzrə fəlsəfə doktoru, dosent Gülayət Hacıyevanın təşəbbüsü və təşkilatçılığı, Azərbaycanın ABŞ-dakı səfirliyi və Türkiyənin Mayami şəhərindəki baş konsulluğunun dəstəyi ilə konfrans təşkil edilib. Konfransın əsas məqsədi Xocalıda Azərbaycan xalqına qarşı törədilmiş soyqırımı ilə bağlı həqiqətlərin ABŞ ictimaiyyətinin diqqətinə çatdırılması, eləcə də ermənilərin qondarma “erməni soyqırımı” iddialarının ifşa edilməsi olub.

Konfransda Florida ştatının Stetson Universitetinin müəllim və tələbə heyəti, yerli Azərbaycan və türk icmalarının nümayəndələri ilə yanaşı, Azərbaycanın Vaşinqtondakı səfirliyinin konsulu Emil Səfərov, Türkiyənin Mayami şəhərindəki baş konsulu Özgür Kıvanç Altan, Tennessi ştatının Texnoloji Universitetinin Sosioloji və Siyasi Elmlər Departamentinin siyasi elmlər üzrə professoru Maykl Gunter və Azərbaycan Amerika Mədəniyyət Assosiasiyasının rəhbəri Töhfə Eminova iştirak ediblər.

G.Hacıyeva Azərbaycan və Türkiyə xalqlarına qarşı törədilmiş erməni cinayətləri ilə bağlı elmi konfransın keçirilməsinin önəmindən bəhs edib. O, Ermənistan tərəfindən əsassız olaraq iddia edilən “erməni soyqırımı” ilə bağlı tarixi faktları əhatə edən təqdimatla çıxış edib. Həmçinin Ermənistan-Azərbaycan, Dağlıq Qarabağ münaqişəsi və onun həlli istiqamətində dünya dövlətlərinin həssaslığının vacibliyini diqqətə çatdırıb.

Tennessi Texnoloji Universitetinin professoru Maykl Gunter 1915-ci il hadisələri ilə bağlı tədqiqatçı-faktoloji təqdimatla çıxış edərək, erməni lobbisinin dünyaya tanıtmağa çalışdığı qondarma “erməni soyqırımı” ilə bağlı həqiqətə uyğun olmayan iddiaların əsassızlığını göstərib.

Azərbaycanın ABŞ-dakı səfirliyinin əməkdaşı Emil Səfərov Azərbaycanın strateji müttəfiqi ABŞ ilə gündən-günə güclənən münasibətlərin bugünkü inkişaf səviyyəsindən, həmçinin iki ölkənin beynəlxalq müstəvidə əməkdaşlıq apardığı sahələrdən söz açıb. E.Səfərov 1991-ci ildə müstəqilliyini bərpa etmiş Azərbaycana qarşı Ermənistan tərəfindən başladılmış müharibə, bunun nəticəsində torpaqlarımızın 20 faizinin işğal edilməsi, 1 milyon azərbaycanlının evlərindən didərgin düşərək qaçqın və məcburi köçkünə çevrilməsi ilə bağlı faktları diqqətə çatdırıb. O, həmçinin Azərbaycan torpaqlarının işğaldan azad edilməsi ilə bağlı BMT və digər beynəlxalq təşkilatların hüquqi sənədlərini qeyd edib. E.Səfərov insanlığa qarşı cinayət olan Xocalı soyqırımı barədə danışaraq bildirib ki, 1992-ci ilin fevralın 25-dən 26-na keçən gecə Xocalı şəhərinin silahsız sakinlərinə qarşı erməni təcavüzkarlarının törətdiyi qətliam nəticəsində 106-sı qadın, 63-ü körpə olmaqla 613 nəfər qətlə yetirilib. Bu cinayət Dağlıq Qarabağ bölgəsində azərbaycanlı əhaliyə qarşı etnik təmizləmə siyasətinin tərkib hissəsi olub. Eyni zamanda, ötən 23 il ərzində aparılan uğurlu təbliğat işləri nəticəsində dünyanın bir sıra ölkələri və ABŞ-ın 15-dən artıq ştatı bu soyqırımını tanıyıb.

Diplomat, həmçinin dostluq, qardaşlıq əsasında qurulan Türkiyə-Azərbaycan əlaqələrinin strateji əməkdaşlıq səviyyəsində inkişafından bəhs edib, xalqlarımıza qarşı ermənilər tərəfindən törədilmiş cinayətlər barədə həqiqətlərin beynəlxalq müstəvidə tanıdılması məqsədilə birgə mübarizənin aparılmasının vacibliyini vurğulayıb.

Türkiyənin Mayamidəki baş konsulu Özgür Kıvanç Altan Azərbaycan və Türkiyə xalqlarının tarixi dostluq və qardaşlıq əlaqələrindən qaynaqlanaraq hər işdə olduğu kimi, erməni cinayətlərinin beynəlxalq aləmdə tanıdılması işində də birgə fəaliyyətin önəmini vurğulayıb. O, Xocalı qətliamı ilə bağlı Türkiyənin Azərbaycan xalqının ağrısını bölüşdüyünü bildirib.

Daha sonra Xocalı qətliamı haqqında sənədli film nümayiş etdirilib.

Yusif Babanlı

AZƏRTAC-ın xüsusi müxbiri

Vaşinqton