İDMAN


Formula-1 Azərbaycan Qran-Prisinin birinci günündə “Red Bull Racing" komandasının pilotları fərqləniblər

Bakı, 23 iyun, AZƏRTAC

İyunun 23-də Bakıda Formula-1 üzrə dünya çempionatının səkkizinci mərhələsinə – Azərbaycan Qran-Pri yarışlarına start verilib.

AZƏRTAC xəbər verir ki, yarışın birinci günündə pilotlar 6 kilometrlik Bakı şəhər halqasında iki sərbəst yürüşdə güclərini sınayıblar.

İlk sərbəst yürüşdə “Red Bull Racing” komandasının pilotu Maks Ferstappen birinci olub. Pilot 1 dəqiqə 44,410 saniyəlik nəticə ilə bütün rəqiblərini qabaqlayıb. Onun komanda yoldaşı Daniel Rikkiardo ikinci olub. Sebastyan Fettel (Ferrari) isə yarışı üçüncü pillədə başa vurub.

M.Ferstappen ikinci sərbəst yürüşdə də fərqlənməyi bacarıb. Belə ki, pilot 1 dəqiqə 43,362 saniyəlik nəticə ilə birinci olub. “Mercedes”in pilotu Valtteri Bottas ikinci, “Red Bull Racing”in sürücüsü D.Rikkiardo üçüncü olublar.

İyunun 24-də Formula-1 Azərbaycan Qran-Prisində üçüncü sərbəst yürüş və sıralama turu, bir gün sonra isə əsas yarış keçiriləcək.

Dünyanın məşhur pilotlarının mübarizə apardığı Bakı şəhər halqası elə qurulub ki, yarış zamanı pilotlar və milyonlarla televiziya tamaşaçıları UNESCO-nun ümumdünya mədəni irs siyahısına daxil olan İçərişəhəri, paytaxtın müasir memarlıq abidələrini və Xəzərin sahilboyu hissəsini özündə birləşdirən ecazkar mənzərəni görə bilirlər. Layihənin müəllifi bütün müasir Formula-1 treklərinin memarı olan Herman Tilkedir. Trekin ən geniş hissəsinin eni 13, ən dar hissəsinin eni isə İçərişəhər ətrafında, o cümlədən 7-ci və 8-ci döngələrdə 7,6 metr təşkil edir.

Yarışın start və finiş xətti Azadlıq meydanındadır. Burada, həmçinin “Paddok klub”, komandaların boksları və pit-leyn qurulub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.