İQTİSADİYYAT


Forum çərçivəsində keçirilən növbəti sessiyada turizmin inkişaf perspektivlərinə nəzər salınıb VİDEO

Bakı, 5 may, Xəyalə Məmmədova, AZƏRTAC

Dördüncü Ümumdünya Mədəniyyətlərarası Dialoq Forumu çərçivəsində "Daha yaxşı gələcəyin qurulması naminə turizmin transformativ gücündən istifadə: Müştərək məsuliyyət" mövzusunda panel sessiya keçirilib.

Sessiyanın moderatoru olan Dünya Turizm Təşkilatının baş katibi Taleb Rifai hər zaman aktuallığı ilə seçilən turizm mövzusuna həsr edilən sessiyanın əhəmiyyətini vurğulayıb. O, Forumun yüksək səviyyədə təşkilinə görə Azərbaycan dövlətinə təşəkkür edib.

Petra Milli İnam Fondunun prezidenti Şahzadə Dana Firas "Turizm dünyanı necə yaxşılaşdıra bilər?" mövzusunda çıxış edib. Bildirib ki, turizmin davamlı inkişafı üçün bu sahədə beynəlxalq təcrübəyə əsaslanan səmərəli metodlardan istifadə olunmalıdır. Hər bir ölkənin sosial-iqtisadi reallıqlarına uyğun layihələr işlənilməlidir. Şahzadə Dana Firas hesab edir ki, turizm ölkələrə mənfəət gətirməklə yanaşı, həm də ölkələrin tanıdılmasına yardımçı olur.

Şri-Lankanın turizmin inkişafı və xristian dini işlər üzrə nazir müavini Arundika Fernando ölkəsinin turizmi haqqında ətraflı məlumat verib. Qeyd edib ki, Şri-Lankada turistləri cəlb edən bir amil də buradakı qədim memarlıq abidələridir. Turistlər bu ölkəni daha çox tarixlə yaxından tanış olmaq üçün seçirlər. Şri-Lankada əsasən çoxdinli insanların yaşadığını vurğulayan nazir müavini burada həmin insanların mehriban şəraitdə yaşadıqlarını qeyd edib. “Dini və milli rəngarənglik şəhərin arxitekturasında da özünəməxsus iz buraxıb”, – deyə Arundika Fernando bildirib.

Kambocanın Turizm Nazirliyinin Beynəlxalq Əməkdaşlıq və ASEAN departamentinin direktoru Thok Sokhom ölkəsində müharibələrdən sonra turizmin tamamilə məhv olduğunu diqqətə çatdırıb. Bildirib ki, 1987-ci ildən sonra Kambocada turizmin inkişafı haqqında düşünülməyə başlanılıb. O zaman BMT-nin inkişaf proqramlarından yararlanmaq üçün quruma müraciətlər olub. Thok Sokhom deyib ki, turizmin inkişafı üçün qanunlar qəbul olunmalı və işlək vəziyyətə gətirilməlidir.

Bəhreynin Mədəniyyət və Əntiq Əşyalar İdarəsinin sədri və Dünya İrsi üzrə Ərəb Regional Mərkəzinin prezidenti Şaika Mai Bint Mohammad əl-Xəlifə Bəhreyndə turizmin şaxələndirilməsinə dair həyata keçirilən layihələr barədə məlumat verib. Qeyd edib ki, ölkəsinin özünəməxsus adət-ənənələri var və onlar turistlərin hər zaman diqqətini çəkib. “Bəhreyndə əsasən turizmin keyfiyyəti haqqında düşünülür”, - deyən Şaika Mai Bint Mohammad əl-Xəlifə bu sahənin inkişaf etdirilməsində keyfiyyətin əsas şərtlərdən biri olduğunu vurğulayıb.

Belçika Xarici İşlər Nazirliyinin Flandriya departamentinin baş katibi Koen Verlaext sessiyanın hər kəsdə maraq kəsb etdiyini bildirib. Bu gün bütün dünya ölkələrinin turizmə böyük yatırımlar qoyduğunu vurğulayan Koen Verlaext deyib ki, ölkəsində turistlərin rahatlığı üçün lazımi layihələr həyata keçirilir. Baş katib Flandriyada turistlərin əsasən döyüşlərin baş verdiyi yerlərə, hərbi qəbiristanlıqlara baş çəkdiklərini vurğulayıb.

Azərbaycanın mədəniyyət və turizm naziri Əbülfəs Qarayev ölkəmizin turizm potensialı və turizm siyasətindən danışıb. Turizmdə Azərbaycanın rəqabət imkanlarının çox yüksək olduğunu deyən nazir vurğulayıb ki, Azərbaycan dövləti turizm sahəsinin inkişafını iqtisadiyyatın qeyri-neft sektoru üzrə prioritet istiqamət elan edib. Torpaqlarımızın 20 faizinin işğal altında olmasına baxmayaraq, ölkəmizdə təhlükəsizlik tədbirləri yüksək səviyyədə həyata keçirilir. Nazir əlavə edib ki, Azərbaycanda turizmin inkişafı üçün mükəmməl imkanlar mövcuddur və bu gün həmin imkanlardan kifayət qədər istifadə edilir. Əldə edilən nəticələr, ölkəmizə gələn turistlərin sayının ildən-ilə artması da onu göstərir ki, bu istiqamətdə dövlət və özəl sektorun apardığı birgə siyasət öz səmərəsini verir.

Turizm Vasitəsilə Beynəlxalq Sülh İnstitutunun təsisçisi və prezidenti Luis D Amor özünün təcrübəsindən danışıb. O, turizm sahəsində əldə etdiyi uğurların səbəbini dünya təcrübəsinə uyğunlaşmaqda gördüyünü deyib. Bu sahədə nailiyyətlərə imza atmağın yollarından biri kimi müxtəlif ölkələrin tarixi və mədəniyyəti ilə yaxından tanış olmağı tövsiyə edib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.